Aıda Balaeva «Jýrnalıstıka: Analıtıka jáne zertteý» mamandyǵynyń ashylýyn qoldady

2079

QR Aqparat jáne qoǵamdyq damý mınıstri Aıda Balaeva elimizde jańadan ashylǵan «Jýrnalıstıka: analıtıka jáne zertteý» mamandyǵymen tanysty. M.S. Nárikbaev atyndaǵy KAZGIýÝ Ýnıversıtetine arnaıy barǵan mınıstr Facebook-tegi paraqshasynda joǵary oqý ornynan alǵan áserimen bólisti.

«KAZGIýÝ — tek bilim berýge ǵana emes, stýdenttiń damýyna da kóp kóńil bóletin, halyqaralyq deńgeıdegi zamanaýı ýnıversıtettiń etalony. Sportqa basa nazar aýdaratynyna, stýdentterdiń qyzyǵýshylyǵy boıynsha túrli qosymsha sabaqtarǵa mán beretinine rıza boldym. Bylaısha aıtqanda, stýdentter ýnıversıtettegi ýaqytyn óz paıdasyna ótkizedi, damıdy ári qosymsha qabiletterdi meńgerip shyǵady»,- dep jazady Aıda Balaeva.

Kezdesý barysynda mınıstr men ýnıversıtet basshylyǵy birlesip atqaratyn jumystary týraly áńgimelesti. Jýrnalıstik etıka boıynsha semınar ótkizý týraly, stýdentterdiń elimizdegi úzdik buqaralyq aqparat quraldarynda is-tájirıbeden ótýi máselelerin talqylady. KAZGIýÝ Ýnıversıtetiniń Basqarma tóraǵasy Talǵat Nárikbaev áleýmettik jelilerdegi paraqshasynda mınıstrmen kezdeskende qandaı taqyryptardy qozǵaǵany týraly jazdy.

«Aıda Ǵalymqyzymen birge sheshýge bolatyn máselelerdi ashyq talqyladyq. Mass-medıa salasynda bilikti mamandardyń jetispeýshiligi, kóptegen JOO-larda bilim baǵdarlamasy mazmunynyń eskirýi, baspasóz betterindegi shyqqan materıaldarda derekterdiń taldanbaýynan BAQ-taǵy ádeptilik deńgeıiniń tómen bolýy syndy máselelerdi aıttyq», - deıdi ýnıversıtet basshylyǵy.

Esterińizge sala keteıik, jaqynda KAZGIýÝ ýnıversıteti osy jyldyń qyrkúıek aıynda «Jýrnalıstıka: analıtıka jáne zertteý» mamandyǵy ashylatyny týraly habarlady. Jańa bilim berý baǵdarlamasynyń maqsaty — quqyqtyq jáne ekonomıkalyq salada, ásirese sybaılas jemqorlyqqa qarsy saıasat salasynda tereń bilimi bar analıtık-jýrnalıst mamandar daıyndaý.

 

M.S. Nárikbaev atyndaǵy KAZGIýÝ Ýnıversıtetiniń baspasóz qyzmeti

8 (7172) 70-30-42

Pikirler
Redakııa tańdaýy