بۇگىن — فيلولوگيا عىلىمىنىڭ دوكتورى، اكادەميك، كورنەكتى مەملەكەت جانە قوعام قايراتكەرى مىرزاتاي جولداسبەكوۆتىڭ تۋعان كۇنى. ول 1937 جىلى جامبىل وبلىسى تالاس اۋدانى اقتوبە اۋىلىندا تۋعان. عالىم بيىل 84 جاسقا كەلدى.
1954-1955 جىلدارى اقكول اۋداندىق كەڭەسىنىڭ حاتشىسى بولىپ قىزمەت اتقارعان. قازمۋ-ءدى بىتىرگەن (1960). 1960-1964 - جىلدارى وسى ۋنيۆەرسيتەتتەگى قازاق ادەبيەتى كافەدراسىندا اسسيستەنت، 1964-1967 جىلدارى - اسپيرانت. 1970-1974 جىلدارى اعا وقىتۋشى، دوتسەنت، 1974-1977 جىلدارى فيلولوگيا فاكۋلتەتىنىڭ دەكانى بولدى.
1977-1987 جىلدارى تالدىقورعان پەداگوگيكا ينستيتۋتىنىڭ رەكتورى، 1987-1988 جىلدارى قازاقستاننىڭ وقۋ ءمينيسترى، ءبىلىم ءمينيسترىنىڭ ءبىرىنشى ورىنباسارى، 1988-1990 جىلدارى قازاقستان كومپارتياسى ورتالىق كوميتەتىندە ءبولىم مەڭگەرۋشىسىنىڭ ءبىرىنشى ورىنباسارى، ءبولىم مەڭگەرۋشىسى، 1990 جىلدارى قازاقستاننىڭ مەملەكەت كەڭەسشىسى، 1991-1993 جىلدارى قازاقستان رەسپۋبليكاسى پرەمەر-ءمينيسترىنىڭ ورىنباسارى، 1993-1997 جىلدارى قازاقستان رەسپۋبليكاسىنىڭ يران يسلام رەسپۋبليكاسىنداعى توتەنشە جانە وكىلەتتى ەلشىسى، 1997-2000 جىلدارى قازاقستان رەسپۋبليكاسى سىرتقى ىستەر ءمينيسترى جانىنداعى ديپلوماتيالىق اكادەميانىڭ رەكتورى قىزمەتتەرىن اتقاردى.
2000-2004 جىلدارى استاناداعى ەۋرازيا ۇلتتىق ۋنيۆەرسيتەتىنىڭ رەكتورى، 2006 جىلدان قر پرەزيدەنتتىك مادەنيەت ورتالىعىنىڭ ديرەكتورى بولدى. جولداسبەكوۆ قازاق ادەبيەتىنىڭ العاشقى قاينار باستاۋلارىن، جامبىل جاباەۆ شىعارماشىلىعىن زەرتتەۋگە مول ۇلەس قوستى. تۇرىك قاعاناتى كەزىندەگى ورحون-ەنيسەي جازبا ەسكەرتكىشتەرىن قازاق عالىمدارى اراسىندا العاشقىلاردىڭ ءبىرى بولىپ جاڭاشا زەردەلەپ، قازاق تىلىندەگى اۋدارماسىن عىلىمي اينالىمعا ەنگىزدى. جامبىلدىڭ اقىندىق مەكتەبىن زەرتتەپ، ونىڭ تۇستاستارى مەن شاكىرتتەرىنىڭ تۋىندىلارىن جان-جاقتى تالدادى.
«حالىقتار دوستىعى»، «قۇرمەت»، «پاراسات»، «بارىس» وردەندەرىمەن ماراپاتتالعان.
"ادىرنا" ۇلتتىق پورتالى
