كەز-كەلگەن سالانىڭ سەرپىندى دامۋىن قامتاماسىز ەتۋ ءۇشىن باسقارۋشى ەليتانى ۇنەمى جاڭارتىپ وتىرۋ قاجەت ەكەنى بەلگىلى. رەفورمالاردى جۇزەگە اسىراتىن – بىلىكتى كادرلار. سوندىقتان وڭتايلى وزگەرىستەر ورىن الۋى ءۇشىن تاجىريبەلى جانە وزىندىك جاڭا كوزقاراسى قالىپتاسقان جاڭا بۋىن وكىلدەرىن تارتۋ قاجەت، دەگەن جازبا پايدا بولدى قر ءبىلىم جانە عىلىم ءمينيسترى اسحات ايماعامبەتوۆتىڭ پاراقشاسىندا, دەپ جازدى Dalanews.kz.
وزدەرىڭىز بىلەتىندەي، ەل پرەزيدەنتى جاستاردى مەملەكەتتى باسقارۋ ىسىنە تارتۋ ماسەلەسىنە كوپ كوڭىل بولەدى. ماسەلەن، جاستار كادرلىق رەزەرۆىن قالىپتاستىرۋ، مەملەكەتتىك قىزمەتتى رەفورمالاۋ جانە مەملەكەت باسشىسىنىڭ باسقا دا باستامالارى قولعا الىندى. ءبىز پرەزيدەنتتىڭ ساياساتىن، سونىڭ ىشىندە ءبىلىم بەرۋ جۇيەسىنە جاڭا كوشباسشىلاردى تارتۋ بويىنشا جۇمىستاردى جالعاستىرىپ كەلەمىز. جاڭا كوشباسشىلار – ءوز ەلىن، جەرىن سۇيەتىن پاتريوتتاردان قۇرالعان جاس ۇرپاق. كوبىنىڭ حالىقارالىق تاجىريبەسى بار، ولار – كاسىبي ورتادا كەڭىنەن تانىمال جانە مامان رەتىندە قالىپتاسقان تۇلعالار.
تاعايىندالعان باسشىلاردىڭ باسىم بولىگى “بولاشاق” باعدارلاماسىنىڭ تۇلەكتەرى جانە الەمنىڭ ۇزدىك جوعارى وقۋ ورىندارىندا ءبىلىم العان بولسا، ەندى ءبىر بولىگى نازارباەۆ ۋنيۆەرسيتەتىندە وقىعان نەمەسە جۇمىس ىستەگەن ماماندار.
تەك سوڭعى ءۇش ايدىڭ ىشىندە اباي اتىنداعى قازۇپۋ، قوجا احمەت ياساۋي اتىنداعى قازاق-تۇرىك ۋنيۆەرسيتەتى، قىزدار ۇلتتىق ۋنيۆەرسيتەتى، ساتباەۆ ۋنيۆەرسيتەتى، قوزىباەۆ ۋنيۆەرسيتەتى سياقتى جەتەكشى جوعارى وقۋ ورىندارىنىڭ رەكتورلارى بولىپ زور الەۋەتى مەن مول تاجىريبەسى بار كوشباسشىلار تاعايىندالدى.
بۇل رەتتە ادامي كاپيتالدى دامىتۋ جونىندەگى مەملەكەتتىك ساياساتتى ازىرلەۋ جانە ىسكە اسىرۋ كەزىندە جەرگىلىكتى جەرلەردەگى جاعدايدى نەعۇرلىم ساپالى جانە تولىق ەسكەرۋ ءۇشىن ءبىز وڭىرلەردە قىزمەت اتقارىپ جاتقان مامانداردى جۇمىسقا بەلسەندى تۇردە تارتۋعا تىرىسامىز.
جاس كوشباسشىلار ءوز ءبىلىمى مەن تاجىريبەسىن ەلىمىزدىڭ گۇلدەنۋى جولىندا پايدالانىپ، ەڭبەك ۇلەستەرىن قوسقىلارى كەلەدى. ولاردىڭ ارقايسىسىنا ۇلكەن ءۇمىت ارتىلىپ وتىر.
مەملەكەت باسشىسى ق.ك.توقاەۆتىڭ ساياساتىن جۇزەگە اسىرۋ جونىندەگى جۇمىستىڭ باسى-قاسىندا دا وسى ماماندار ءجۇرۋى ءتيىس.
ايتپاقشى، جاڭا كوشباسشىلار دەمەكشى، ءبىزدىڭ كوزدەگەنىمىز – جاڭا مامانداردى جۇمىسقا تارتا وتىرىپ، قىزمەتتە جۇرگەن باسشىلاردى تولىعىمەن اۋىستىرۋ ساياساتىن جۇرگىزۋ ەمەس.
ءبىزدىڭ باستى ماقساتىمىز – قازاقستاندىق ءبىلىم مەن عىلىمنىڭ الەۋەتىن بارىنشا كۇشەيتۋ ءۇشىن “جاستىق پەن تاجىريبەنىڭ ۇيلەسىم تابۋىن” قامتاماسىز ەتۋ.
جاڭا كوزقاراسى بار جاس كادرلاردى جۇمىسقا قابىلداي وتىرىپ، تەپە-تەڭدىك پەن ۇرپاقتار ساباقتاستىعى ساقتالاتىن بولادى. مينيسترلىك تاراپىنان ىسكە اسىرىلىپ جاتقان كادرلىق ساياسات تۋرالى قوعامدا نەعۇرلىم تولىق جانە وبەكتيۆتى تۇسىنىك قالىپتاستىرۋ ماقساتىندا الداعى بىرنەشە اپتانىڭ ىشىندە جاڭادان تاعايىندالعان باسشىلار كىشىگىرىم سۇحبات بەرەدى.
سۇحبات بارىسىندا جاس كوشباسشىلار باسقارىپ وتىرعان ۇيىمدارىن ودان ءارى دامىتۋ بويىنشا جۇمىس جوسپارىن (1), جۇزەگە اسىرىلاتىن نەگىزگى رەفورمالار (2), جۇمىس جوسپارىن ىسكە اسىرۋ ءۇشىن جۇيەگە تارتىلاتىن رەسۋرستار (3) جانە جاڭا باسشىنىڭ تاعايىندالۋىنان باستاپ ۇيىمنىڭ الداعى ۋاقىتقا جوسپارلانعان جۇمىس ناتيجەلەرىمەن (4) بولىسەتىن بولادى.
سونىمەن قاتار بۇل جۇمىستى جۇيەلى تۇردە جالعاستىرۋ ءۇشىن جاقىن ارادا ءبىز جاڭا جوبا باستايتىن بولامىز.
اتاپ ايتسام، “كادرلىق رەزەرۆ” جوباسى. ءبىز ءبىلىم جانە عىلىم جۇيەسىندە باسشىلىق لاۋازىمعا ۇسىنۋ ءۇشىن تابىستى ءارى دايىندىعى مىقتى ۇمىتكەرلەردى ىرىكتەۋدى جوسپارلاپ وتىرمىز.
جوبا بويىنشا ىرىكتەۋ شارتتارى مەن ءتارتىبى تۋرالى اقپارات جەكە جاريالانادى.
بۇدان بولەك جاقىن ارادا ءبىزدىڭ باستامامىزبەن جۇزەگە اسىرىلاتىن ديرەكتورلاردى روتاتسيالاۋ ينستيتۋتى، ولاردى تاعايىنداۋدىڭ جاڭا قاعيدالارى جانە مۇعالىمدەردى جۇمىسقا كونكۋرس ارقىلى قابىلداۋدىڭ جاڭا جۇيەسىن ەنگىزەتىن نورمالار جۇزەگە اسىرىلا باستايدى.
ويىمدى قورىتىندىلاي كەلە، مينيسترلىك ءبىلىم مەن عىلىم سالاسىنداعى كادرلىق الەۋەتتى نىعايتۋ جانە ودان ءارى دامىتۋ ماسەلەلەرىنە باستى نازار اۋداراتىنىن اتاپ وتكىم كەلەدى. بۇل ماڭىزدى باعىت ءبىزدىڭ الداعى جۇمىسىمىزدا دا باسىمدىققا يە بولاتىنى ءسوزسىز، دەلىنگەن جازبادا.
"ادىرنا" ۇلتتىق پورتالى
