مەملەكەت باسشىسى ءال-فارابي اتىنداعى قازۇۋ رەكتورى جانسەيىت تۇيمەباەۆتى قابىلدادى، دەپ حابارلايدى «ادىرنا» ۇلتتىق پورتالى اقورداعا سىلتەمە جاساپ.
پرەزيدەنتكە ۋنيۆەرسيتەتتەگى مامان دايارلاۋ ءىسىنىڭ، عىلىمي-زەرتتەۋ جۇمىستارىنىڭ ناتيجەلەرى تۋرالى باياندالىپ، كەلەسى جىلى 90 جىلدىعىن اتاپ وتەتىن جوعارى وقۋ ورنىنىڭ ستراتەگيالىق دامۋ جوسپارى تانىستىرىلدى، - دەلىنگەن حابارلامادا.
جانسەيىت تۇيمەباەۆتىڭ ايتۋىنشا، قازىر ۋنيۆەرسيتەتتە جالپى قۇنى 8,1 ميلليارد تەڭگە بولاتىن 400 عىلىمي جوبا ىسكە اسىرىلىپ جاتىر.
پرەزيدەنتتىڭ مامىر ايىنداعى قحر-عا رەسمي ساپارى اياسىندا قازۇۋ-دا قىتايدىڭ سولتۇستىك-باتىس پوليتەحنيكالىق ۋنيۆەرسيتەتىنىڭ فيليالىن اشۋ جونىندە كەلىسىمگە قول قويىلعان بولاتىن. 12 قازاندا ۋنيۆەرسيتەت بازاسىندا اتالعان وقۋ ورنىنىڭ فيليالى اشىلدى.
بۇدان بولەك، مەملەكەت باسشىسىنا 2024-2026 جىلدارى قازۇۋ قالاشىعى قۇرىلىسىنىڭ ەكىنشى كەزەڭى جۇزەگە اسىرىلاتىنى جونىندە مالىمەت بەرىلدى. جاڭا قالاشىقتا 8 وقۋ كورپۋسى، تەحنوپارك جانە 12 جاتاقحانا بوي كوتەرمەك. جۋىق ارادا 3180 ورىندىق 3 جاتاقحانانىڭ قۇرىلىسى باستالادى.
كەزدەسۋ سوڭىندا قاسىم-جومارت توقاەۆ ءبىلىم ساپاسىن جاقسارتۋ، ەلىمىزدىڭ دامۋىنا عىلىمنىڭ قوساتىن ۇلەسىن ارتتىرۋ جانە ۋنيۆەرسيتەت قالاشىعىن جاڭعىرتۋ جونىندە ناقتى تاپسىرمالار بەردى.
«ادىرنا» ۇلتتىق پورتالى
