كەلەسى وقۋ جىلىنان باستاپ اقتوبەدەگى قازاق-ورىس ۋنيۆەرسيتەتى ءوز جۇمىسىن توقتاتۋى مۇمكىن، دەپ حابارلايدى “ادىرنا” ۇلتتىق پورتالى Tengrinews.kz-كە سىلتەمە جاساپ.
بۇل تۋرالى ۋنيۆەرسيتەت ستۋدەنتتەرىنە الدىن الا ەسكەرتۋ جاسالعان.
الايدا قر عىلىم جانە جوعارى ءبىلىم مينيسترلىگى قازىرگى وقۋ جىلىنىڭ اياقتالاتىنىن، ستۋدەنتتەر جىل سوڭىنا دەيىن وقۋدى جالعاستىرا الاتىنىن مالىمدەدى.
داۋ ءساۋىر ايىندا باستالعان. ونداعان ستۋدەنتتىڭ ساباقتان قالۋىنا بايلانىستى جاپپاي وقۋدان شىعارىلعانى جونىندە اقپارات تاراعان. مينيسترلىك ارنايى كوميسسيا قۇرىپ، تەكسەرىستى باستادى.
تەكسەرۋ ناتيجەسىندە ستۋدەنتتەردى وقۋدان شىعارماۋعا شەشىم قابىلدانىپ، ولارعا وقۋ جىلىن اياقتاۋعا مۇمكىندىك بەرىلدى. الايدا ۋنيۆەرسيتەتتىڭ بولاشاعى بەلگىسىز كۇيدە قالىپ وتىر.
مينيسترلىكتىڭ الدىن الا دەرەگىنشە، وقۋ ورنىنىڭ قۇرىلتايشىسى ۋنيۆەرسيتەتتىڭ قىزمەتىن توقتاتۋ تۋرالى شەشىم قابىلداعان. شىن مانىندە، بۇل شەشىم تۋرالى ءوتىنىشتى وقۋ جىلىنىڭ باسىندا-اق تاپسىرعان، الايدا كەيىن وقۋ پروتسەسى جالعاسقان. قازىرگى تاڭدا ۋنيۆەرسيتەت باسشىلىعى رەسمي پىكىر بىلدىرۋدەن باس تارتىپ وتىر.
“اتا-انالار مەن ستۋدەنتتەردىڭ نازارىنا! باسقا جوو-لارعا اۋىسۋ – ناقتى بەكىتىلگەن ەرەجەلەر بويىنشا جۇرگىزىلەدى. اۋىسۋعا رۇقسات بەرىلەتىن شارتتار مەن راسىمدەر ارنايى جۇمىس توبى ارقىلى قاراستىرىلادى. بۇل توپ اكتوبە قالاسىندا سەسسيا مەن وقۋ جىلى اياقتالعان سوڭ جۇمىس ىستەيدى”، – دەپ حابارلادى مينيسترلىك.
ۇقساس جاڭالىقتار
