قازاقستاننىڭ تاۋەلسىز ەل بولعانىنا بيىل – 30 جىل. ازاتتىق اق تاڭىنىڭ ارايلاپ اتۋى، تاۋەلسىزدىگىمىزدىڭ تۇعىرلى بولۋى، بەيبىت ءومىردىڭ جالعاسۋى – باسىمىزدىڭ باياندى باعى. وسى ءبىر تەڭدەسسىز سىي سوناۋ 1991 جىلى دۇنيە ەسىگىن اشقان تاۋەلسىزدىكتىڭ ءتول قۇرداستارىمەن بىرگە قۇندىلىعىن ەش جوعالتقان ەمەس. سول كەزەڭدەردە ومىرگە كەلگەندەر بۇگىندە 30 جاسقا تولۋدا. وسىنداي وردا بۇزار شاققا كەلگەندەردىڭ قاتارىندا قاراساي اۋداندىق كوپسالالى اۋرۋحانا باسشىسىنىڭ ۇيىمداستىرۋ-ادىستەمەلىك ءىسى بويىنشا ورىنباسارى رۋسلان كۋككۋزوۆ تا بار. ەگەمەندىكتىڭ مەرەيتويى اياسىندا جاس دارىگەر جايلى اڭگىمە وربىتسەك دەيمىز.
قاراپايىم وتباسىنان شىققان رۋسلان ەرلانۇلى – وسى اۋلەتتە مەديتسينا جولىن قۋعان جالعىز ءوزى. رايىمبەك اۋدانى، نارىنقول اۋىلىنىڭ تۋماسى ول – اعاسى جاسۇلان مەن اپكەسى فاريدادان كەيىن دۇنيەگە كەلگەن ءۇيدىڭ كەنجەسى. اكەسى ەرلان مەن اناسى جۇماگۇل – ءۇي شارۋاسىنداعى، اۋىلداعى تىنىمسىز تىرشىلىكپەن اينالىساتىن ادامدار. رۋسلان بالا كەزىنەن ناعاشى اعاسى نۇرحالىققا قاتتى جاقىن بولىپ، قاسىنان ءبىر ەلى قالماعان. العاش مەكتەپ تابالدىرىعىن دا وسى ناعاشى اعاسى تۇراتىن اۋىلدا اتتاعان. بۇل ق.شورمانوۆ اتىنداعى ءبىلىم ۇياسى بولاتىن. مۇندا وقۋشى رۋسلان 8-ءشى سىنىپقا دەيىن وقىدى. كەيىن اناسىنىڭ سىرقاتتانعانىن ەستىپ، قاسىندا تابىلۋ ءۇشىن تۋعان اۋىلىنا ورالىپ، قالعان ءبىلىمىن ب.سوقپاقباەۆ اتىنداعى ورتا مەكتەپتە جالعاستىردى. وسى جەردەن 2009 جىلدىڭ تۇلەگى اتانىپ، ۇبت-دان جوعارى باللداردىڭ ءبىرىن جيناپ، ەلىمىزگە بەلگىلى س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنە گرانتقا وقۋعا ءتۇستى. ستۋدەنت رۋسلان بۇل جوعارى وقۋ ورنىندا 2009-2014 جىلدارى «جالپى مەديتسينا» ماماندىعى بويىنشا باكالاۆرلىق ءبىلىم الدى. ال، 2014-2016 جىلدارى ءدال وسى مەديتسينا ۋنيۆەرسيتەتىندە ينتەرناتۋرانى اياقتاپ، «جالپى تاجىريبەلىك دارىگەر» ماماندىعىن يگەردى.
رۋسلان ەرلانۇلىنىڭ دارىگەرلىك ماماندىقتى سەرىك ەتۋىنە ومىرىندەگى ەلەۋلى ءبىر وقيعا سەبەپ بولعان. انىعىن ايتقاندا، جوعارىدا اتاپ وتكەن ناعاشى اعاسى نۇرحالىقتىڭ اۋىر دەرتتەن 39 جاسىندا دۇنيەدەن ەرتە وتۋىمەن بايلانىستى. جاستايىنان ۇلگى تۇتقان اعاسىنىڭ مەزگىلسىز اجال قۇشۋى بالا رۋسلانعا اۋىر ءتيدى.
– ناعاشى اعام قازىرگى تاڭداعى مەديتسينامەن ەمدەلگەندە، بالكىم، ءتىرى جۇرەر مە ەدى؟ ول كىسى اۋرۋىمەن ارپالىسقاندا جاعداي باسقاشا بولدى عوي. مەنىڭ وسى سالادا ەڭبەك ەتۋىمە وسى وقيعا سەبەپ بولۋى دا مۇمكىن، – دەپ وتكەن شاقتى ءبىر ەسكە الدى دارىگەر رۋسلان.
رۋسلان كۋككۋزوۆتىڭ ەڭبەك جولى ۋنيۆەرسيتەتتى اياقتاعان سوڭ باستالدى. 2016 جىلى رايىمبەك اۋداندىق اۋرۋحاناسىنا ورنالاسىپ، مۇندا تەراپيا بولىمىندە ەمدەۋشى دارىگەر مىندەتىن ءبىر جىل اتقاردى. ودان كەيىن 2017-2019 جىلدارى ارالىعىندا جالپى تاجىريبەلىك دارىگەر رەتىندە مەديتسينا سالاسىنداعى بىلىكتىلىگىن شىڭداي ءتۇستى. ال 2019 جىلى وسى اتالمىش اۋرۋحانادا جاۋاپتى قىزمەتكە تاعايىندالىپ، باس دارىگەردىڭ ورىنباسارى بولدى. بۇل لاۋازىمدا 1 جىل 3 اي ەڭبەك ەتىپ، وزىنە جۇكتەلگەن مىندەتتى ابىرويمەن اتقارا ءبىلدى. دارىگەر رۋسلاننىڭ قاراساي اۋداندىق كوپسالالى اۋرۋحاناسىنداعى جۇمىسى بىلتىر، قىركۇيەك ايىندا كوروناۆيرۋس ىندەتىنىڭ ءورشىپ تۇرعان شاعىندا باستالدى دەسەك ارتىق ايتقاندىق ەمەس. العاشىندا ستاتيست-دارىگەر رەتىندە قىزمەت اتقارىپ، ەكى ايدان كەيىن باس دارىگەردىڭ ۇيىمداستىرۋ-ادىستەمەلىك ءىسى بويىنشا ورىنباسارى لاۋازىمىنا تاعايىندالدى. قازىرگى ۋاقىتتا وسى جاۋاپتى مىندەتتى ابىرويمەن اتقارىپ كەلەدى.
ارىپتەستەرىنە سىيلى، جۇمىسىنا جاۋاپتى رۋسلان ەركىنۇلى ءوزىنىڭ تاۋەلسىزدىكتىڭ قۇرداسى بولعانىن ماقتان ەتەدى. اڭگىمە بارىسىندا ەگەمەندى ەل بولۋدىڭ قانشالىقتى قاستەرلى، قاسيەتتى ەكەنىن ءبىر اۋىز سوزبەن جەتكىزە كەتتى.
– تاۋەلسىز ەل بولۋ – اسقان بايلىق. ايبىنى اسقاق اتامەكەنىڭ، ۇلان-بايتاق جەرىڭ، مەملەكەتتىك ءتىلىڭ بولعاننان اسقان باقىت جوق شىعار. الەمدە قانشاما ۇلتتار بار! كەيبىرىنىڭ، ءتىپتى، ورتاق وتانى جوق. ولاردىڭ قاسىندا ءبىز الدەقايدا العا وزعان مەملەكەتتەردىڭ قاتارىندامىز دەپ بىلەمىن. ويتكەنى، ازات ەل بولىپ، وركەنيەتى قالىپتاسقان ەلدەرمەن يىق تىرەستىرە قاتار دامىپ كەلەمىز. مەن ءوز ەلىمدى ماقتان ەتەمىن! – دەپ ويىن تۇيىندەدى پاتريوت رۋسلان كۋككۋزوۆ.
جاس دارىگەردىڭ العا قويعان ماقسات-مىندەتتەرى ايقىن. ونىڭ قازىرگى بار ويلايتىنى – ىندەتتىڭ قۇرساۋىنان حالىقتى امان الىپ قالۋ. وسى جولدا كۇن دەمەي، ءتۇن دەمەي تاباندىلىق تانىتۋدان شارشاعان ەمەس. قانشا دەگەنمەن دەنساۋلىقتىڭ ساقشىسى عوي. تۇسىنەمىز. ادام ومىرىنە اراشا بولىپ جۇرگەن ازاماتقا تەك قانا جاقسىلىق تىلەيمىز! "تاۋەلسىزدىكتىڭ ءتول قۇرداسى بولىپ، ەگەمەندى ەلمەن ءوسىپ-وركەندەي بەر!" دەگىمىز كەلەدى.
ديدار مۋحاماديەۆ
