4 ساۋىردە الماتىدا بەلگىلى دارىگەر-گاستروەنتەرولوگتى اتىپ كەتكەن ەدى. دارىگەردى ءۇيىنىڭ ماڭىنداعى كولىك تۇراعىندا ءولتىرىپ كەتكەن. كوپ ۇزاماي كۇدىكتى دە قولعا ءتۇستى. پوليتسەيلەر شۋمكوۆتى ءوزى ەمدەگەن ناۋقاس اتۋى مۇمكىن ەكەنىن العا تارتقان، دەپ حابارلايدى “ادىرنا” ۇلتتىق پورتالى “استانا” ارناسىنا سىلتەمە جاساپ.
يۋري شۋمكوۆ دۇيسەنبى كۇنى ادەتتەگىدەي ءۇيىنىڭ ماڭىنداعى تۇراققا كەلىپ، كولىگىن وتالدىرعان. جۇرگىزۋشى كولىگىندە وتىرعان وعان الدىمەن الىستان وق اتىلعان. كەيىن قاسكوي ءوز قۇربانىنىڭ اۋىزىنان تاعى ءبىر رەت اتقان. جارالى دارىگەردى العاشقىلاردىڭ ءبىرى بولىپ كورگەن تۇراق كۇزەتشىسى سادىقجان يۋلداشەۆ ەكەن.
"اتىس داۋىستارىن ەستىدىم. كەلدىم، بارلىق جەر قان بولدى. ءتىپتى باستاپقىدا كىم ەكەنىن تانىماي قالدىم. ءدال اۋىزىنان اتىپ كەتكەن. بەتى تولىعىمەن قان بولدى", - دەيدى كۇزەتشى سادىقجان يۋلداشەۆ.
كۋاگەرلەر ەكى رەت اتقان سوڭ دا دارىگەردىڭ ءتىرى بولعانىن ايتادى. ال قاسكوي قىلمىس ورنىنان كەتۋگە اسىقپاعان. جولدا ونى كوك ءتۇستى كولىك كۇتىپ تۇرىپتى.
"الدىمنان قارۋمەن جۇگىرىپ ءوتتى. كۇتىپ تۇرسا كەرەك، كولىككە ءمىندى دە كەتىپ قالدى. تەك مەملەكەتتىك ءنومىرىن كورىپ ۇلگەردىم. كوك ءتۇستى كولىك، ءنومىرى 309", - دەپ قوستى سادىقجان يۋلداشەۆ.
قىلمىسكەرگە بىردەن ىزدەۋ جاريالانعان. قالادا ارنايى تۇتقىنداۋ جوسپارى جاريالانىپ، بىرنەشە ساعاتتىڭ سوڭ كۇدىكتى قولعا ءتۇستى. ول 35 جاستاعى قالا تۇرعىنى ەكەن. پوليتسەيلەر كۇدىكتىنىڭ دارىگەردە قارالعان ناۋقاس بولۋى مۇمكىن ەكەنىن العا تارتتى.
"قىلمىسقا نە سەبەپ بولعانى انىقتالىپ جاتىر. ەر ادامنىڭ دارىگەردە ەم قابىلداعان ناۋقاس بولۋى مۇمكىن ەكەنىن جوققا شىعارمايمىز. قولىندا قارۋ بولعان. تاركىلەنىپ، سوت-بالليستيكالىق ساراپتاماعا جىبەرىلدى", - دەدى الماتى قالاسى پوليتسيا دەپارتامەنتىنىڭ رەسمي وكىلى سالتانات ازىربەك.
مارقۇمنىڭ ارىپتەستەرى قاي ناۋقاستىڭ مۇنداي قىلمىستى جاساۋى مۇمكىن ەكەنىن بىلمەيدى. يۋري شۋمكوۆ ءوز ءىسىنىڭ مامانى بولعان. گاستروەنتەرولوگيا ينستيتۋتى باسشىسىنىڭ سوزىنشە، ەشكىممەن جانجالعا تۇسپەگەن.
"بىزگە پسيحوسوماتيكا بويىنشا ەم الۋعا كەلەدى. مۇمكىن پسيحيكاسى بۇزىلعان شىعار. الايدا تىزىمنەن مۇنداي ناۋقاستى تاپپادىق. كەرەمەت دارىگەر ەدى. ەمدەگەن ناۋقاستارى وتە كوپ. بارلىعى تەك وڭ پىكىر قالدىراتىن. جاۋلارى جوق. سەبەبى ۇنەمى كوڭىلدى جۇرەتىن ادام ەدى", - دەدى گاستروەنتەرولوگيا ينستيتۋتىنىڭ ديرەكتورى ءلايلا تاشەنوۆ.
مارقۇمنىڭ ارتىندا ەكى بالاسى قالدى. قازىر قىلمىستىق ءىس قوزعالعان. قىلمىسى دالەلدەنسە، تۇتقىندالعان ازامات 15 جىلعا دەيىن باس بوستاندىعىنان ايىرىلۋى مۇمكىن.
“ادىرنا” ۇلتتىق پورتالى
