ۇلتتىق ازا تۇتۋ كۇنى ازامىزدى ازايتا الماسى انىق. دەسە دە «بۇگىندە مەديتسينا سالاسىنىڭ، ءبىر جىرتىعى بولسا جامايىن، قۇلاپ بارا جاتسا دەمەيىن، كىشكەنتاي شوق كورسەم ۇرلەيىن» دەپ ءجۇرىپ، پاندەميامەن كۇرەستە ءوز ومىرلەرىن بەرگەن دارىگەرلەردىڭ ەڭبەگىن ەسكەرۋسىز قالدىرساق، جۇرەگىمىزدىڭ تاس تەمىرگە اينالعانىنىڭ بەلگىسى بولار ەدى. ءبىز ويتپەيمىز.
مەيلى، قاي ەلدىڭ، قاي جەردىڭ دارىگەرى بولسىن ءبىز ءۇشىن قاشان دا جوعارى تۇراتىنى انىق. دەسە دە ەشبىر مەديتسينا قىزمەتكەرى جەتىسىپ جۇرگەن جوق.
ماسەلەن، يتاليالىق دارىگەرلەر «ءبىزدىڭ ءار كۇنىمىز - سوعىس» دەسە، قىتايلىق دارىگەرلەردىڭ كوروناۆيرۋستان تەرىسى تۇتاستاي قارايىپ كەتىپ جاتقان كورىنەدى. رەسەيدە وزگە مەملەكەتتەرگە قاراعاندا قايتىس بولعان مەديتسينالىق قىزمەتكەرلەردىڭ سانى 16 ەسە كوپ ەكەن. ال قازاقستاندىق ىندەتكە شالدىققان اق حالاتتىلاردىڭ سانى 5000-عا جەتىپ قالىپتى. وتكەن اپتاداعى دەرەك بويىنشا، ءبىر عانا تۇركىستان وبلىسى بويىنشا ناقتى تەست تاپسىرىپ، كوروناۆيرۋس جۇقتىرعان 132 مەديتسينا قىزمەتكەرى انىقتالعان. 492 دارىگەرگە پنەۆمونيا دياگنوزى قويىلعان. اقتوبە وبلىسى بويىنشا 100 دارىگەر كوروناۆيرۋسقا شالدىققان. بۇل ەكى وبلىستىڭ عانا ستاتيستيكاسى. وكىنىشكە قاراي، وزگە وڭىرلەر دە بۇدان كەم تۇسپەسى انىق. وسىلاردىڭ ىشىنەن ءوز ومىرىنەن ناۋقاستىڭ ءومىرىن جوعارى قويىپ ءجۇرىپ، جارىق دۇنيەمەن قوشتاسىپ كەتە بارعان دارىگەرلەر سانى دا از ەمەس. الايدا دەنساۋلىق ساقتاۋ مينيسترلىگى دۇنيەدەن وزعان دارىگەرلەردىڭ تولىق اتى-ءجونىن جاريالاماي وتىر.
دەسە دە كورىنبەيتىن جاۋمەن كۇرەسىپ، الدىڭعى شەپتە ءجۇرىپ، ەرلىكپەن قازا تاپقان دارىگەرلەردىڭ ازىرگە ءبىر قاتارىنىڭ عانا ەسىم-سويىن نازارلارىڭىزعا ۇسىنا الامىز.
- قايرات بايمۇحانبەتوۆ
- ءادىلجان حامزين
- يساەۆ ولەگ نيكولاەۆيچ
- قاليحان قوزىباعاروۆ
- كەنباەۆا روزا كەڭەسوۆنا
- ابديكۋلوۆا ماريام قابىلبەكوۆنا
- بالاندين ەۆگەني يۆانوۆيچ
- برالوۆ حايرۋللا بۋرحانوۆيچ
- ءمولدىر عازيزقىزى
- جانىبەك جۋماشوۆيچ
- حاسىم ماماەۆ
- باۋىرجان كۇرەكباەۆ
- ايبەك يبراگيموۆ
- ءلاززات سالىقباەۆا
- ساپار تۋلەپوۆ
- اكزيپا تاجدەنوۆا
- ليۋبوۆ ۆلاديميروۆنا
- بايماحامبەت تاجيدين
- ناۆرۋز مانناپوۆ
- مۋحاببات ريزاەۆا
- يان رۋدولف ميحايلوۆيچ
اتى اتالعان مەديتسينا قىزمەتكەرلەرى ەكى جاقتى پنەۆمونيا دياگنوزىمەن قايتىس بولعان. ولاردىڭ كوبى حيرۋرگ، پەدياتر، گينەكولوگ، ۋلترادىبىستى زەرتتەۋ ءبولىمىنىڭ دارىگەرلەرى ەكەن.
سولاردىڭ ىشىندە "قر دەنساۋلىق ساقتاۋ ءىسىنىڭ ۇزدىگى" اتانعان، بار عۇمىرىن حالىق دەنساۋلىعىن ساقتاۋعا ارناعان، ەڭبەككە قابىلەتتى، مىنەزى كوركەم، اقكوڭىل، جايدارلى قاراسايلىق دارىگەر كەنباەۆا روزا كەڭەسوۆنانىڭ، حالىق «قۇدايدىڭ بىزگە بەرگەن دارىگەرى» دەپ اتايتىن ۋرولوگ، حيرۋرگ، عالىم، پەداگوگ ءادىلجان ءحامزيننىڭ، اقتوبە وبلىستىق ينفەكتسيالىق اۋرۋحاناسىنىڭ باس دارىگەرى قاليحان قوزىباعاروۆتىڭ، الماتى وبلىسىنىڭ باس مەملەكەتتىك سانيتارلىق دارىگەرى 56 جاستاعى قايرات بايمۇحامبەتوۆتىڭ ەسىمدەرى بىزگە ءمالىم.
ماسەلەن، 36 جىلدىق دارىگەرلىك سالادا ەڭبەك ءوتىلى بار قاليحان قوزىباعاروۆ اقتوبە «وبلىستىق كلينيكالىق جۇقپالى اۋرۋلار اۋرۋحاناسى» شجق مكك باس دارىگەرى قىزمەتىن ەرلىكپەن اتقاردى.
ناۋقاستاردىڭ ايتۋىنشا، قاليحان قوزىباعاروۆ باس دارىگەر بولعانىنا قاراماستان، كۇنبە-كۇن بارلىق پالاتانى ارالاپ، ەمدەلۋشىلەردىڭ ءحالىن سۇراپ، كوڭىل-كۇيلەرىن كوتەرۋگە تىرىسىپ باققان كورىنەدى. تىپتەن قاليحان قوزىباعاروۆ ىندەت باستالعالى بەرى ءۇي كورمەي، ەڭبەك دەمالىسىنان باس تارتىپ قىزمەت ەتكەن.
سونداي-اق، كوروناۆيرۋستىق ينفەكتسيامەن كۇرەسۋدىڭ العاشقى كۇندەرىنەن باستاپ يساەۆ ولەگ نيكولاەۆيچ ءوزىنىڭ كاسىبي مىندەتىن ادال اتقارعان. ولەگ نيكولاەۆيچ ۇيىنەن كەتىپ، ەركىن تۇردە اۋرۋحاناعا كەلىپ، جۇمىس ورنىندا 12 ساعاتتان استام تۇرىپ، پاتسيەنتتەردىڭ ءومىرىن ساقتاپ قالدى. «كوروناۆيرۋسقا شالدىققان ادامدارعا كومەكتەسەمىن، گيپپوكراتقا بەرگەن انتىما ادال بولۋىم كەرەك» دەپ ءجۇرىپ، دەنەسىنىڭ قورعانىش قاسيەتتەرىنىڭ تومەندەۋىنە اسەر ەتكەن ۇلكەن پسيحولوگيالىق كۇيزەلىسكە ۇشىرادى. ناتيجەسىندە قىزمەت بارىسىندا جارىق دۇنيەمەن قوشتاسىپ كەتە باردى.
مارقۇم بولعان قوس دارىگەردىڭ اتىنا قر پرەزيدەنتى ق. توقاەۆتىڭ 13 شىلدەدەگى قاۋلىسى بويىنشا قازاقستان رەسپۋبليكاسىنا سىڭىرگەن اسا ۇزدىك ەڭبەگى، قىزمەتتىك بورىشىن اتقارۋ ۇستىندە كورسەتكەن جانقيارلىعى ءۇشىن جوعارى دارەجەلى ەرەكشەلىك بەلگىسى – «قازاقستاننىڭ ەڭبەك ەرى» اتاعى بەرىلىپ، ايرىقشا ەرەكشەلىك بەلگىسى – التىن جۇلدىز بەن «وتان» وردەنى تاپسىرىلدى.
وسى ورايدا «وزدەرىنىڭ ءومىرىن باسكە تىگىپ جۇرگەن دارىگەرلەرگە مەملەكەت قانداي كومەك بەرۋدە؟» دەگەن زاڭدى سۇراق تۋاتىنى ءسوزسىز.
دەنساۋلىق ساقتاۋ باسقارماسىنىڭ مالىمدەۋىنشە، اق حالاتتىلارعا ماتەريالدىق ۇستەماقى رەتىندە ناۋرىز-ماۋسىم ايلارىنا 17 368 قىزمەتكەرگە ءۇش سانات بويىنشا بارلىعى 2 867,1 ملن. تەڭگە بەرىلگەن ەكەن. ال بۇل ءبىر دارىگەرگە ورتا ەسەپپەن 165 000 تەڭگە دەگەن ءسوز. ال ىندەت كۇشەيگەن ماۋسىم ايىنان باستاپ شە؟ ولارعا موتيۆاتسيا رەتىندە قانشالىقتى سىي-اقى تارتۋ ەتىلۋدە؟ الدە جاۋىردى جابا توقي سالامىز با؟ بۇل سۇراققا جوعارىداعىلار جاۋاپ بەرە جاتار. ءبىز تەك ىندەتپەن كۇرەستە جانىن سالىپ جۇرگەن دارىگەرلەرگە ماردىمدى جالاقى تولەۋلەرىن تالاپ ەتە الامىز.
سونىمەن، بۇرىندارى الاشتىڭ بەس دارىگەرى ساناتىنا حالەل دوسمۇحامەدوۆ، باقتىعالي بيسەنوۆ، اققاعاز دوسجانوۆا، اسىلبەك سەيىتوۆ، امىرە ايتباقىنى جاتقىزۋشى ەدىك، ەندى تۇتاس قازاق ەلىنىڭ جان ساقتاۋ سالاسىنىڭ ۇزدىكتەرى رەتىندە، ىندەتپەن كۇرەسىپ، ەرلىكپەن قازا تاپقان دارىگەرلەردى ايتا الامىز. بۇگىنگى كۇننىڭ جۇلدىزدارى قىزىلدى-جاسىلدى، جىلتىراققا قۇمار ءانشى ەمەس، باسقا ەمەس، دارىگەرلەر بولماق!
ىندەتتىڭ قۇربانى بولعان اق حالاتتىلاردىڭ ارۋاعى ريزا بولسىن، رۋحى جاساي بەرسىن! قازاقتىڭ سۋداي اققان اققان قان مەن جاسى وسىمەن توقتاسىن..
اقگۇل ايداربەكوۆا،
«ادىرنا» ۇلتتىق پورتالى
