اقتوبەلىك زەينەتكەر ءۇش ايدان بەرى ءوزىنىڭ ءتىرى ادام ەكەنىن دالەلدەي الماي ءجۇر، دەپ حابارلايدى ”ادىرنا” ۇلتتىق پورتالى استانا ارناسىنا سىلتەمە جاساپ.
اقپارات بويىنشا، ەمحاناداعى ستاتيست-دارىگەر جەكە سايكەستەندىرۋ نومىرىندە ءبىر ساندى قاتە جازىپ، ول ولىلەر تىزىمىنە ەنىپ كەتكەن. روماحان كەنجەباەۆ سول قاتەلىكتىڭ زاردابىن ءالى تارتىپ ءجۇر. زەينەتكەر ەمحاناعا بارىپ، ءوزىنىڭ ءبىر كۇن بۇرىن قايتىس بولعانىن ەستىگەن. سوندىقتان ونىڭ بارلىق قۇجاتتارى جارامسىز بولىپ قالدى. ەمحانا سول كەزدە قاتەلىگىن تولىقتاي مويىنداپ، قۇجاتتارىن رەتتەپ بەرگەن. بىراق ءۇش ايدان بەرى زەينەتكەر زەينەتاقىسىن الا الماي وتىر.
«ءۇش اي بۇرىن باستالدى. مەنى ءولتىرىپ تاستادى. دارىگەرلىك قاتەلىك دەپ كەلىپ ءبارىن ىستەدىك ەندى. ءۇش اي بولدى پەنسيامدى الا الماي ءجۇرمىن. كۇندە ەرتەڭ، ارعى كۇنى دەپ قايتارادى»، – دەيدى روماحان كەنجەباەۆ.
«ازاماتتارعا ارنالعان ۇكىمەت» كورپوراتسياسىنىڭ وبلىستىق فيليالىنا زەينەتكەردىڭ قازا بولعانى تۋرالى مالىمەت 7 قازاندا تۇسكەن. زاڭ بويىنشا، كەلەر ايدان باستاپ زەينەتاقى تولەۋ توقتاتىلعان. ال قاتەلىك كەتكەنىن بۇل ورتالىقتىڭ ماماندارى تەك ءۇش اپتا بۇرىن عانا ەستىپتى.
«مالىمەت انىقتالعان بويدا ازاماتتارعا ارنالعان ۇكىمەت كورپوراتسياسىنىڭ قىزمەتكەرلەرى بارلىق شارالاردى ورىنداپ، اتالعان ازاماتتىڭ زەينەتاقىسى الدىنداعى ايدىڭ 1-ىنەن باستاپ جۇرگىزىلەتىن بولادى»، – دەدى «ازاماتتارعا ارنالعان ۇكىمەت» مەملەكەتتىك كورپوراتسيسى اقتوبە وبلىستىق فيليالىنىڭ PR-مەنەدجەرى اسىلگۇل ايداروۆا.
