شىمكەنت قالاسىندا پاندەمياعا بايلانىستى قۇرىلعان جەدەل شتابتىڭ كەزەكتى وتىرىسىندا COVID-19-عا قارسى ءىس-قيمىلدىڭ ناتيجەلەرى، ۆاكتسينالاۋ، تاعى باسقا ماسەلەلەر تالقىعا ءتۇستى.
قازىرگى تاڭدا الەمدە ەپيدەميولوگيالىق احۋال كۇردەلى. ەلىمىزدە دە «قىزىل ايماققا» كىرگەن وڭىرلەردىڭ قاتارى ارتۋدا. شىمكەنت قالاسى پاۆلودار، قىزىلوردا، سقو جانە ماڭعىستاۋ وبلىستارىمەن بىرگە «سارى ايماقتا» تۇر.
قالا اكىمى مۇرات ايتەنوۆ شاھاردا ەپيدەميولوگيالىق جاعدايدىڭ كۇردەلەنە تۇسكەنىن ايتىپ، تۇرعىندار اراسىندا بەتپەردە رەجيمىن ساقتاۋ، كوروناۆيرۋسپەن كۇرەستە ۆاكتسينالاۋدىڭ ماڭىزدى ەكەنىن ايتتى.
– ىندەتتى جەڭۋدىڭ جولى – ۆاكتسينالاۋ. سانيتارلىق تالاپتاردى ساقتاي وتىرىپ، ەكپە ەگۋ جۇمىستارىن قارقىندى جالعاستىرۋ قاجەت. ۆاكتسينالاۋدىڭ ماڭىزدىلىعى بويىنشا ناسيحات جۇمىستارىن كۇشەيتۋ كەرەك. ەكپە ەگىلگەن ازاماتتاردىڭ جاعدايىن ءبىلىپ، سولاردىڭ پىكىرىن بەرىپ وتىرايىق. سونىمەن قاتار، ۆاكتسينالاۋ ءىس-شارالارىن ناسيحاتتاۋعا باس دارىگەرلەردىڭ دە قاتىسۋىن قولعا الىڭىزدار. قالادا ىندەت جۇقتىرعاندار سانى كۇن سايىن ارتىپ وتىر. بۇل قاۋىپتى ىندەتتەن قورعانۋدىڭ بىردەن-ءبىر جولى كوروناۆيرۋسقا قارسى ۆاكتسيناتسيانى قابىلداۋ، – دەدى قالا اكىمى.
قالالىق دەنساۋلىق ساقتاۋ باسقارماسىنىڭ باسشىسى ب. پوزيلوۆتىڭ ايتۋىنشا، بۇگىندە شىمكەنت قالاسىندا جالپى كوروناۆيرۋسقا قارسى ەكپەنىڭ 1-ءشى كومپونەنتى 13 087 ادامعا ادامعا، ەكىنشى كومپونەنتى 5307 ادامعا ەگىلگەن. بيىل جىل باسىنان بەرى 1872 ادام كوۆيد ينفەكتسياسىن جۇقتىرعان. 21 ادام قايتىس بولدى.
– شىمكەنتتە 7 ساۋىردەن باستاپ بارلىق ساناتتاعى ادامدارعا ەكپە سالىنىپ جاتىر. قالاعا 30 مىڭ دوزا ۆاكتسينا كەلدى. ەكپە ەگۋ سەنبى، جەكسەنبى كۇندەرى دە، تاڭعى ساعات سەگىزدەن كەشكى سەگىزگە دەيىن جۇرگىزىلەدى. ازىرگە 37 بەكەت جەتكىلىكتى. بەكەتتىڭ ىشىنەن تاعى قوسىمشا بولىمدەر اشىپ جاتىرمىز، – دەدى باسقارما باسشىسى.
ايتا كەتەيىك، وتكەن تاۋلىكتە كۆي-ءدىڭ 72 جاعدايى تىركەلدى: بەلگىلەرى بار - 50, بەلگىلەرى جوق - 22. 18 ادام ينفەكتسيالىق ستاتسيونارعا جاتقىزىلىپ، 54 ادام ءۇي باقىلاۋىنا الىنعان. قازىرگى تاڭدا مامانداندىرىلعان ينفەكتسيالىق ستاتسيونارلاردا بارلىعى 1010 ورىن بار (قالالىق ينفەكتسيالىق ورتالىق – 490, «اتامەكەن» كلينيكاسى – 450, ورىنباي گبوو - 70 ورىن).
ينفەكتسيالىق ستاتسيوناردا 260 ناۋقاس ەمدەلۋدە (كۆي-153, پنەۆمونيا- 99, جرۆي- 8), جان ساقتاۋ بولىمىندە - 10 (5 يۆل، 5 نيۆل).
شىمكەنت قالاسى اكىمدىگىنىڭ ءباسپاسوز قىزمەتى
