Şymkent qalasynda pandemiiaǧa bailanysty qūrylǧan jedel ştabtyŋ kezektı otyrysynda COVID-19-ǧa qarsy ıs-qimyldyŋ nätijelerı, vaksinalau, taǧy basqa mäseleler talqyǧa tüstı.
Qazırgı taŋda älemde epidemiologiialyq ahual kürdelı. Elımızde de «qyzyl aimaqqa» kırgen öŋırlerdıŋ qatary artuda. Şymkent qalasy Pavlodar, Qyzylorda, SQO jäne Maŋǧystau oblystarymen bırge «sary aimaqta» tūr.
Qala äkımı Mūrat Äitenov şaharda epidemiologiialyq jaǧdaidyŋ kürdelene tüskenın aityp, tūrǧyndar arasynda betperde rejimın saqtau, koronaviruspen küreste vaksinalaudyŋ maŋyzdy ekenın aitty.
– Indettı jeŋudıŋ joly – vaksinalau. Sanitarlyq talaptardy saqtai otyryp, ekpe egu jūmystaryn qarqyndy jalǧastyru qajet. Vaksinalaudyŋ maŋyzdylyǧy boiynşa nasihat jūmystaryn küşeitu kerek. Ekpe egılgen azamattardyŋ jaǧdaiyn bılıp, solardyŋ pıkırın berıp otyraiyq. Sonymen qatar, vaksinalau ıs-şaralaryn nasihattauǧa bas därıgerlerdıŋ de qatysuyn qolǧa alyŋyzdar. Qalada ındet jūqtyrǧandar sany kün saiyn artyp otyr. Būl qauıptı ındetten qorǧanudyŋ bırden-bır joly koronavirusqa qarsy vaksinasiiany qabyldau, – dedı qala äkımı.
Qalalyq densaulyq saqtau basqarmasynyŋ basşysy B. Pozilovtyŋ aituynşa, bügınde Şymkent qalasynda jalpy koronavirusqa qarsy ekpenıŋ 1-şı komponentı 13 087 adamǧa adamǧa, ekınşı komponentı 5307 adamǧa egılgen. Biyl jyl basynan berı 1872 adam kovid infeksiiasyn jūqtyrǧan. 21 adam qaitys boldy.
– Şymkentte 7 säuırden bastap barlyq sanattaǧy adamdarǧa ekpe salynyp jatyr. Qalaǧa 30 myŋ doza vaksina keldı. Ekpe egu senbı, jeksenbı künderı de, taŋǧy saǧat segızden keşkı segızge deiın jürgızıledı. Äzırge 37 beket jetkılıktı. Bekettıŋ ışınen taǧy qosymşa bölımder aşyp jatyrmyz, – dedı basqarma basşysy.
Aita keteiık, ötken täulıkte KVİ-dıŋ 72 jaǧdaiy tırkeldı: belgılerı bar - 50, belgılerı joq - 22. 18 adam infeksiialyq stasionarǧa jatqyzylyp, 54 adam üi baqylauyna alynǧan. Qazırgı taŋda mamandandyrylǧan infeksiialyq stasionarlarda barlyǧy 1010 oryn bar (qalalyq infeksiialyq ortalyq – 490, «Atameken» klinikasy – 450, Orynbai GBOO - 70 oryn).
İnfeksiialyq stasionarda 260 nauqas emdelude (KVİ-153, pnevmoniia- 99, JRVİ- 8), jan saqtau bölımınde - 10 (5 İVL, 5 NİVL).
Şymkent qalasy äkımdıgınıŋ baspasöz qyzmetı
