وسكەمەندە №5 ورتا مەكتەپ ديرەكتورىنا قاتىستى التى اكىمشىلىك ءىس قوزعالدى. وعان مەكتەپ مۇعالىمى اسەم نۇرعاليەۆانىڭ جازعان ارىزى سەبەپ بولعان. مۇعالىمنىڭ ءوزى وسىدان ءبىراز كۇن بۇرىن اۋرۋحانادا ءبىر اپتا بويى ەس-ءتۇسسىز جاتىپ كوز جۇمدى. بۇل تۋرالى "31" ارنانىڭ "ينفورمبيۋرو" باعدارلاماسى حابارلايدى.
مارقۇم اسەم نۇرعاليەۆا جۇمىسقا بىلتىر تامىز ايىندا عانا ورنالاسىپتى. ارىپتەستەرىنىڭ ايتۋىنشا، جۇمىسىنا تياناقتى. جاۋاپتى جانە ەڭبەكقور بولعان. بىراق قىزمەتىنە ەندى كىرىسكەن ماماندى مۇنداعى مەكتەپ ديرەكتورى جاقتىرماي، قۋدالاعان.
"قاتتى كۇيزەلىسكە ءتۇسۋى دەپ ويلايمىن. باسشىنىڭ تاراپىنان قۋدالاۋعا تۇسكەندىكتەن ول وتە قاتتى كۇيزەلىستە بولدى. مەن ءوز كوزىممەن كورىپ ءجۇردىم، اسەمدى. جانە دە اسەم ماعان ايتىپ جۇرەتىن. ۇنەمى ايتىپ ءجۇردى", - دەدى مەكتەپتىڭ پەداگوگ-پسيحولوگى مارجان قاناتبەكقىزى.
ارىپتەستەرىنىڭ ايتۋىنشا، مارقۇم قاتتى قينالعان كەزدە قۇزىرلى ورگاندارعا بىرنەشە رەت شاعىمدانباق بولعان. بىراق ديرەكتوردى جەڭە الامىز با دەگەن كۇدىكپەن كوپ جۇرگەن.
قازىر مەكتەپتىڭ وزگە دە ۇستازدارى باسشىسىنىڭ ارەكەتىنە قاتىستى قۇزىرلى مەكەمەلەرگە شاعىمدانۋدا.
