شىمكەنتتە «جاسىل قالا» اعاش وتىرعىزۋ ءىس-شاراسى ءوتتى. يگى شاراعا قالا اكىمى مۇرات ايتەنوۆ، سونىمەن بىرگە بىرقاتار زيالى قاۋىم وكىلدەرى مەن قالا تۇرعىندارى قاتىستى.
اتالعان ءىس-شارانى ۇيىمداستىرۋشى ءارى دەمەۋشىلىك كورسەتۋشى – «مەيىرىم شۋاعى» قوعامدىق قورى بولدى. 1000 ءتۇپ اعاش شىمسيتي شاعىن اۋدانىندا ەگىلدى.
«مەيىرىم شۋاعى» قوعامدىق قورىنىڭ جەتەكشىسى اسقار مولدابەك: «ءجۇز جىلدىعىن ويلاعان اعاش ەگەدى دەگەن. ءىس-شارانىڭ وتۋىنە ات سالىسىپ جاتقان ازاماتتاردىڭ بارلىعى ەلىم دەگەن جاناشىرلار، قالا بەلسەندىلەرى. بارلىعىمىز قالانىڭ گۇلدەنگەنىن قالايمىز» دەيدى.
شاھار باسشىسى قالا تىرشىلىگىنە بەيقام قارامايتىن بەلسەندى تۇرعىندارعا ءوز العىسىن جەتكىزدى. بۇدان بولەك، ەلىمىزدە جاريالانعان توتەنشە جاعداي كەزىندە قوردىڭ اتىنان مەديتسينا مەكەمەسىنە يۆل اپپاراتتارى مەن تۇرعىندارعا ءدارى-دارمەك، ازىق-تۇلىك ۇلەستىرىلگەنىن دە اتاپ ءوتتى.
جالپى، «مەيىرىم شۋاعى» قوعامدىق قورىنىڭ ماقساتى كوپبالالى، جالعىزباستى انا، تۇرمىسى تومەن وتباسىلارعا الەۋمەتتىك جانە مورالدى كومەك كورسەتۋ ارقىلى ولاردىڭ قوعامنىڭ ءوزىن-ءوزى قامتىعان وتباسىلار قاتارىنا قوسىلۋىنا ىقپال ەتۋ. بۇگىنگى تاڭدا بالالاردى رەابيليتاتسيالىق-تۇزەتۋ، دامىتۋ جۇمىستارىمەن اينالىسادى. وندا قازىر تىرەك-قيمىل اپپاراتى بۇزىلعان 120-130 بالاعا قىزمەت كورسەتىلىپ جاتىر.
شىمكەنت قالاسى اكىمدىگىنىڭ ءباسپاسوز قىزمەتى
