بۇل تۋرالى بۇگىن اقپاراتتىق-كوممۋنيكاتسيالىق ورتالىعىندا وتكەن ءباسپاسوز ماجىلىسىندە شىمكەنت قالاسى اكىمىنىڭ ورىنباسارى ماقسۇت يساحوۆ مالىمدەدى.
– بيىل شىمكەنت قالاسىنىڭ اكىمى مۇرات ايتەنوۆتىڭ تاپسىرماسىنا سايكەس، جول جوندەۋ جۇمىستارى بارىسىندا شالعاي اۋداندارداعى ىشكى ورامدىق كوشەلەردىڭ قۇرىلىسىنا باسىمدىق بەرىپ وتىرمىز. الايدا جول جوندەۋ ماۋسىمىن باستاپ كەتۋگە اۋا رايىنىڭ قولايسىزدىعى كەدەرگى كەلتىرۋدە. بىلتىر ناۋرىز ايىنىڭ باسىندا ويىقتاردى جاماۋ جانە جولاق سىزۋ جۇمىستارى باستالىپ ەدى. ال بۇل جىلى جوندەۋ جۇمىستارىنا ءساۋىر ايىنىڭ ورتاسىنا قاراي تولىققاندى كىرىسكەلى وتىرمىز، – دەدى م.يساحوۆ.
وسى ورايدا قالا اكىمىنىڭ ورىنباسارى جولاۋشىلار كولىگىنە بايلانىستى ماسەلەلەرگە دە نازار اۋداردى.
– شىمكەنت قالاسىندا جولاۋشىلارعا قىزمەت كورسەتۋ ساپاسىن جاقسارتۋ ءۇشىن مەتان گازىمەن جۇرەتىن 590 جاڭا اۆتوبۋس ساتىپ الىنعان بولاتىن. قازىرگى تاڭدا ونىڭ 150-ءى ىسكە قوسىلعان. ال قالعانى گاز تولتىرۋ كومپرەسسورلىق ستانتسياسىنا بايلانىستى بولىپ تۇر. سول سەبەپتى بۇل جۇمىستارعا كۇش سالۋدامىز. ياعني، بۇگىندە ەكىنشى ستانتسيانى سالۋ جۇمىسى اياقتالۋعا جاقىن. ەكىنشى بەكەت 15 ساۋىردە ىسكە قوسىلعان سوڭ، 300 جاڭا اۆتوبۋستى جۇرگىزەمىز. جالپى، جىل سوڭىنا دەيىن ساتىپ الىنعان قوعامدىق كولىكتىڭ ءبارىن تولىق جۇرگىزۋدى جوسپارلاپ وتىرمىز، – دەدى ول.
سپيكەردىڭ سوزىنشە، بۇگىندە قالاداعى ەلەكتروندى بيلەتتەندىرۋ جۇيەسى ءبىر ىزگە قويىلعان. اتالعان جۇيە جەكە ينۆەستوردىڭ قاراجاتىنا جۇرگىزىلۋدە. ياعني، بۇل وزگەرىسكە قالالىق بيۋدجەتتەن قارجى جۇمسالىپ وتىرعان جوق. وسى رەتتە ماقسۇت پەرنەبايۇلى ستۋدەنتتەر مەن وقۋشىلارعا تولەم كارتاسىن راسىمدەۋ ۋاقىتى 15 ساۋىرگە دەيىن سوزىلعانىن تىلگە تيەك ەتتى.
بريفينگ بارىسىندا شىمكەنت قالالىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ەرجان جولداسوۆ 2021 جىلدىڭ جول-كولىك ينفراقۇرىلىمى بويىنشا جان-جاقتى باياندادى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو – ەرنار مامىر
