قازاقستاننىڭ حالىق ءارتىسى، ءانشi, كومپوزيتور ەسكەندىر حاسانعاليەۆ پەن جارى داريكو حاسانعاليەۆانىڭ ۇلى ءبىرجان حاسانعاليەۆ كوروناۆيرۋس جۇقتىرعان اتا-اناسىنىڭ حال جاعدايى تۋرالى باياندادى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
ءبىرجان حاسانعاليەۆتىڭ ايتۋىنشا، اناسى داريكو حاسانعاليەۆانىڭ جاعدايى وڭالعان.
"انامنىڭ جاعدايى جاقسارىپ كەلەدى، ەمىن الىپ جاتىر. جاقىن كۇندەرى جانساقتاۋ بولىمىنەن شىعادى. ءدال قازىرگى ارمانىمىز - اتا-انامىزدىڭ امان-ەسەن ورتامىزعا ورالۋى. قاسيەتتى رامازان ايىندا بالالارىمىزعا دەيىن تىلەگەن دۇعا، تىلەگىمىز قىمبات جاندارىمىزدىڭ بۇل دەرتتەن قۇتىلۋى بولىپ تۇر. ساحنادا 60 جىل جۇرگەن ەسكەندىر حاسانعاليەۆ ءومىرىن قازاق حالقىنا ارناپ كەلەدى، حالىق تا تىلەۋىن تىلەپ، قازىر الاڭداۋلى", - دەدى ول.
ءانشىنىڭ ايتۋىنشا، ەسكەندىر حاسانعاليەۆتىڭ جاعدايىنا دارىگەرلەر "اسا اۋىر" دەگەن باعا بەرىپتى.
"اكەمنىڭ جاعدايىنا قاتىستى دارىگەرلەر كەيىنگى ءتورت كۇندەگى كورسەتكىشتەرگە سۇيەنىپ، "اسا اۋىر" دەگەن باعا بەرىپ وتىر. وسىدان ەكى جارىم جىل بۇرىن اكەم جۇرەگىنە كۇردەلى وتا جاساتقان بولاتىن، سونىڭ دا اسەرى بار ما دەپ ويلايمىز. وكىنىشكە قاراي، قازىر يۆل (جاساندى تىنىس الدىرۋ اپپاراتى - اۆت.) اپپاراتىنا قوسىلعان. الايدا دارىگەرلەردىڭ ايتۋىنشا، الداعى 5-6 كۇن ىشىندە جاعدايى جاقسارىپ قالۋى مۇمكىن. بۇكىل حالىق بولىپ اكەمنىڭ تىلەۋىن تىلەپ، جىلى تىلەكتەرىن جاۋدىرىپ جاتىر، سودان بولار وزىمىزدە دە سەنىم پايدا بولدى. قازاق "كوپتىڭ تىلەۋى كول", دەپ بەكەر ايتپايدى", - دەدى ءبىرجان حاسانعاليەۆ.
"ادىرنا" ۇلتتىق پورتالى
