Qazaqstannyń halyq ártisi, ánshi, kompozıtor Eskendir Hasanǵalıev pen jary Darıko Hasanǵalıevanyń uly Birjan Hasanǵalıev koronavırýs juqtyrǵan ata-anasynyń hal jaǵdaıy týraly baıandady, dep habarlaıdy "Adyrna" ulttyq portaly Tengrinews.kz-ke silteme jasap.
Birjan Hasanǵalıevtiń aıtýynsha, anasy Darıko Hasanǵalıevanyń jaǵdaıy ońalǵan.
"Anamnyń jaǵdaıy jaqsaryp keledi, emin alyp jatyr. Jaqyn kúnderi jansaqtaý bóliminen shyǵady. Dál qazirgi armanymyz - ata-anamyzdyń aman-esen ortamyzǵa oralýy. Qasıetti Ramazan aıynda balalarymyzǵa deıin tilegen duǵa, tilegimiz qymbat jandarymyzdyń bul dertten qutylýy bolyp tur. Sahnada 60 jyl júrgen Eskendir Hasanǵalıev ómirin qazaq halqyna arnap keledi, halyq ta tileýin tilep, qazir alańdaýly", - dedi ol.
Ánshiniń aıtýynsha, Eskendir Hasanǵalıevtiń jaǵdaıyna dárigerler "asa aýyr" degen baǵa beripti.
"Ákemniń jaǵdaıyna qatysty dárigerler keıingi tórt kúndegi kórsetkishterge súıenip, "asa aýyr" degen baǵa berip otyr. Osydan eki jarym jyl buryn ákem júregine kúrdeli ota jasatqan bolatyn, sonyń da áseri bar ma dep oılaımyz. Ókinishke qaraı, qazir IVL (jasandy tynys aldyrý apparaty - Avt.) apparatyna qosylǵan. Alaıda dárigerlerdiń aıtýynsha, aldaǵy 5-6 kún ishinde jaǵdaıy jaqsaryp qalýy múmkin. Búkil halyq bolyp ákemniń tileýin tilep, jyly tilekterin jaýdyryp jatyr, sodan bolar ózimizde de senim paıda boldy. Qazaq "Kóptiń tileýi kól", dep beker aıtpaıdy", - dedi Birjan Hasanǵalıev.
"Adyrna" ulttyq portaly
