قازاقستاندىقتار كوروناۆيرۋسقا قارسى ەكى ۆاكتسينانىڭ ءبىرىن تاڭداي الا ما؟ بۇل سۇراققا دارىگەر، پروفەسسور ساكەن امىرەەۆ جاۋاپ بەردى، دەپ حابارلايدى "ادىرنا" ۇلتتىق پورتالى، Tengrinews.kz-كە سىلتەپ.
قر كلينيكالىق جانە ىرگەلى مەديتسينا اكادەميگى، اسفەندياروۆ اتىنداعى قازۇمۋ ەپيدەميولوگيا كافەدراسىنىڭ پروفەسسورى، قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتىنىڭ پروفەسسورى ساكەن امىرەەۆتىڭ ايتۋىنشا، قازاقستاندىقتار كوروناۆيرۋسقا قارسى ەكى ۆاكتسينانىڭ ءبىرىن تاڭداي الادى.
"ەلىمىزدە كوروناۆيرۋسقا قارسى ەكى ءتۇرلى ۆاكتسينا سالىنىپ جاتىر، ەكەۋىنىڭ دە تيىمدىلىگى مەن قاۋىپسىزدىگى دالەلدەنگەن. سوندىقتان، قورقاتىن ەشنارسە جوق. ال، تاڭداۋعا كەلەتىن بولساق، اركىم ءوزى تاڭدايدى، رەسەيلىك پە، وتاندىق پا. ەگۋ بولمەسىندە ەكى ءتۇرى ۇسىنىلادى، ەگەر ءبىر ءتۇرى بولماي قالسا، بارىن سالدىرا بەرىڭىز. تاڭداعان ۆاكتسينانى عانا سالدىرامىن دەسەڭىز، جەتكىزىلۋىن كۇتۋىڭىزگە ابدەن بولادى. مەنىڭ ويىمشا، وتاندىق ۆاكتسيناعا قولداۋ كورسەتۋىمىز كەرەك، ول دا بارلىق رەسمي تەكسەرۋدەن ءساتتى وتكەن. ەكەۋىنىڭ اراسىندا اناۋ نەمەسە مىناۋ جاقسى دەپ ايتۋعا بولمايدى", - دەدى امىرەەۆ.
"ۆاكتسينا سالدىرۋ، نە سالدىرماۋ ارينە اركىمنىڭ ءوز ەركى. الايدا، ءسىز ۆاكتسينا سالدىرماي اۋىرىپ قالساڭىز، اۋرۋ اۋىر دارەجەدە ءوتۋى مۇمكىن. ۆاكتسيناعا قارسى كورسەتىلىم بولماسا ەكپەنى سالدىرعان دۇرىس", - دەدى ول.
ەسكە سالايىق، بۇگىن تسوي تىكەلەي ەفيردە كوروناۆيرۋسقا قارسى ۆاكتسينا سالدىرعان بولاتىن.
"ادىرنا" ۇلتتىق پورتالى
