پرەزيدەنت قاسىم-جومارت توقاەۆقا "سپۋتنيك V" كوروناۆيرۋس ۆاكتسيناسى سالىندى. بۇل تۋرالى مەملەكەت باسشىسىنىڭ ءباسپاسوز حاتشىسى بەرىك ءۋالي مالىمدەدى، دەپ حابارلايدى "ادىرنا" ۇلتتىق پورتالى.
«بۇگىن مەملەكەت باسشىسى قاراعاندى فارماتسەۆتيكالىق زاۋىتى شىعارعان "سپۋتنيك V" ۆاكتسيناسىن قابىلدادى. پرەزيدەنتتىڭ ۆاكتسينا سالدىرعاننان كەيىنگى حال-جاعدايى جاقسى. ەشقانداي جاناما اسەرلەر جوق. مەملەكەت باسشىسى ۆاكتسينا سالدىرىپ، ۇجىمدىق يممۋنيتەت قالىپتاستىرۋ ارقىلى عانا قازاقستان ازاماتتارى كوروناۆيرۋستى جەڭە الاتىنىنا، بارلىق شەكتەۋلەردىڭ الىناتىنىنا، حالىقتىڭ قالىپتى تۇرمىس-تىرشىلىگىنە قايتا ورالاتىنىنا سەنىمدى. قاسىم-جومارت توقاەۆ بارشا حالىقتى مەيلىنشە تەزىرەك ۆاكتسينا سالدىرۋعا شاقىردى. بۇل – ءوزىڭدى جانە جاقىنىڭدى قورعاۋدىڭ جالعىز جولى.
بۇعان دەيىن پرەزيدەنت ۇكىمەتكە جانە جەرگىلىكتى اتقارۋشى ورگاندارعا شەتەلدەن ۆاكتسينا جەتكىزۋدى قامتاماسىز ەتۋدى جانە وتاندىق ۆاكتسينا ءوندىرۋدى جولعا قويۋدى، سونداي-اق، ەكپە سالۋ ۇدەرىسىن ۇيىمداستىرۋدى تاپسىرعان بولاتىن" دەپ جازدى مەملەكەت باسشىسىنىڭ ءباسپاسوز حاتشىسى.
2021 جىلى قاڭتاردا پرەزيدەنت قازاقستاندىق كوروناۆيرۋس ۆاكتسيناسى ءساتتى سىنالعان جاعدايدا وعان ۆاكتسينا ەگىلەتىنىن ايتقان ەدى.
«ءبىز وتاندىق ۆاكتسينانى سىناۋدىڭ وڭ ناتيجەسى بولادى دەپ ۇمىتتەنەمىز. بۇل جاعدايدا مەن قازاقستاندىق ۆاكتسينامەن ۆاكتسيناتسيالانامىن، ەگەر ول ارينە جاقسى ناتيجە كورسەتسە. مەن بۇل جاعداي جاقسى ناتيجە كورسەتەدى دەپ ۇمىتتەنەمىن»، - دەدى توقاەۆ كەڭەيتىلگەن ۇكىمەتتىڭ 26 قاڭتارداعى كەزدەسۋىندە.
"ادىرنا" ۇلتتىق پورتالى
