كوروناۆيرۋسقا قارسى ۆاكتسينا جاساۋدى قامتيتىن قازاقستاننىڭ بيولوگيالىق قاۋىپسىزدىگى تۋرالى عىلىمي زەرتتەۋلەر ءۇشىن عالىمدارعا جىل سايىن ميلليارد تەڭگە بولىنەدى. بۇل تۋرالى ءبىلىم جانە عىلىم مينيسترلىگى عىلىم كوميتەتىنىڭ ءتورايىمى جاننا قۇرمانعاليەۆا مالىمدەدى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
جاننا قۇرمانعاليەۆا QazVac كوروناۆيرۋسىنا قارسى قازاقستاندىق ۆاكتسينا جاسايتىن بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ عالىمدارىنىڭ جالاقىسىن ارتتىرۋ تۋرالى سۇراققا جاۋاپ بەردى.
«عالىمداردىڭ جالاقىسىن كوتەرۋگە قاراجات ءبولىندى. ينستيتۋتتىڭ عىلىمي قىزمەتكەرلەرىنىڭ ورتاشا جالاقىسى 325 مىڭ تەڭگەدەن جانە ودان جوعارى بولادى. اكىمشىلىك جانە قىزمەت كورسەتەتىن قىزمەتكەرلەردىڭ جالاقىسى 250 مىڭ تەڭگەگە دەيىن بولادى.
سونىمەن قاتار، 2022-2024 جىلدارى ينستيتۋتتىڭ عىلىمي زەرتتەۋلەرىنە ەلدىڭ بيولوگيالىق قاۋىپسىزدىگىن قامتاماسىز ەتۋ ماسەلەلەرى بويىنشا 2,8 ميلليارد تەڭگە ءبولىندى»، دەدى قۇرمانعاليەۆا وكق بريفينگىندە.
ونىڭ ايتۋىنشا، قازىر ينستيتۋت جانىندا عىلىمي-زەرتتەۋ ينستيتۋتىنىڭ قىزمەتكەرلەرى ءۇشىن ءۇش ءۇي سالىنۋدا. بارلىعى — 180 پاتەر.
«وسىدان بىرنەشە كۇن بۇرىن وسى 180 پاتەردەگى تۇرمىستىق تەحنيكانى، جيھازدى جانە باسقا جابدىقتاردى ساتىپ الۋعا رەسپۋبليكالىق بيۋدجەتتەن 293 ميلليون تەڭگە بولىنگەن بولاتىن. ياعني، ءبىزدىڭ عالىمدار مەن ينستيتۋت قىزمەتكەرلەرى وسى پاتەرلەرگە كەلگەندە، ولار جايلى ءومىر ءسۇرۋ ءۇشىن بارلىق قاجەتتىلىكتەرمەن قامتاماسىز ەتەمىز»، دەپ سەندىردى ول.
"ادىرنا" ۇلتتىق پورتالى
