شىمكەنت قالاسى ءماسليحاتىنىڭ كەزەكتەن تىس ءتورتىنشى سەسسياسىندا دەپۋتاتتار ءال-فارابي اۋدانىنىڭ اكىمى لاۋازىمىنا ۇسىنىلعان راشيد مامىتۇلى مىڭباەۆتىڭ كانديداتۋراسىن ءبىراۋىزدان قولدادى.
سەسسيا جۇمىسىنا قاتىسقان قالا اكىمى مۇرات ايتەنوۆ اۋدان اكىمى لاۋازىمىنا ۇسىنىلعان راشيد مامىتۇلى كانديداتۋراسىنا قولداۋ كورسەتكەندەرى ءۇشىن حالىق قالاۋلىلارىنا العىس ءبىلدىردى. سونىمەن بىرگە جاڭا اۋدان اكىمىنە جۇكتەلگەن مىندەتتى جوعارى كاسىبي دارەجەدە جۇزەگە اسىراتىنىنا سەنىم بىلدىرە وتىرىپ، ەسكى قالاشىق جوباسى مەن د.قوناەۆ داڭعىلى جالعاسىنىڭ قۇرىلىستارىندا ۇيىمداستىرۋ جۇمىستارىن جۇرگىزۋدى تاپسىردى.
راشيد مىڭباەۆ 1981 جىلى وقو بايدىبەك اۋدانى شايان اۋىلىندا دۇنيەگە كەلگەن. ءبىلىمى - جوعارى، ماماندىعى-زاڭگەر، ەكونوميست، مەملەكەتتىك جانە جەرگىلىكتى باسقارۋ ماگيسترى.
ەڭبەك جولىن 2002 جىلى قر ادىلەت مينيسترلىگىنىڭ نورماتيۆتىك قۇقىقتىق اكتىلەردى كوديفيكاتسيالاۋ جانە جۇيەلەۋ باسقارماسىنداعى نورماتيۆتىك-قۇقىقتىق اكتىلەردى كوديفيكاتسيالاۋ ءبولىمىنىڭ جەتەكشى مامانى بولىپ باستاعان. 2006-2007 جىلدارى زاڭعا تاۋەلدى اكتىلەردى ساراپتاۋ باسقارماسى باستىعىنىڭ ورىنباسارى – قر ادىلەت مينيسترلىگى زاڭعا تاۋەلدى اكتىلەر دەپارتامەنتىنىڭ قورعانىس، قۇقىق ءتارتىبى جانە سىرتقى بايلانىس ماسەلەلەرى بويىنشا اكتىلەردى ساراپتاۋ ءبولىمىنىڭ باسشىسى لاۋازىمىن اتقاردى.
2007 جىلى قر پرەزيدەنتىنىڭ جانىنداعى مەملەكەتتىك باسقارۋ اكادەمياسىنا ءتۇسىپ، 2009 جىلى «مەملەكەتتىك جانە جەرگىلىكتى باسقارۋ» ماگيسترى اتاندى. راشيد مىڭباەۆتىڭ قىزمەتتىك جولى وڭتۇستىك قازاقستان وبلىسى اكىمىنىڭ كەڭەسشىسى، كومەكشىسى، كەيىننەن قوعامدىق قاتىناستار مونيتورينگى ءبولىمىنىڭ مەڭگەرۋشىسى قىزمەتتەرىمەن جالعاستى.
سونىمەن قاتار، 2016-2019 جىلدارى كەنتاۋ قالاسى اكىمىنىڭ ورىنباسارى، شىمكەنت قالاسىنىڭ مادەنيەت، تىلدەردى دامىتۋ جانە ارحيۆتەر باسقارماسىنىڭ باسشىسى بولدى. 2020 جىلدان بۇگىنگى كۇنگە دەيىن قالا اكىمى اپپاراتى باسشىسىنىڭ ورىنباسارى قىزمەتىن اتقارىپ كەلدى.
سەسسيانىڭ كۇن تارتىبىندە سونىمەن قاتار، شىمكەنت قالاسى اكىمدىگىنىڭ دەربەس قۇرامىنا وزگەرىس ەنگىزۋ ماسەلەسى قارالدى.
سەسسيا سوڭىندا قالا باسشىسى بارلىق دەپۋتاتتارعا سانيتارلىق-ەپيدەميولوگيالىق تالاپتاردى ساقتاۋ بويىنشا تۇرعىندارعا ۇندەۋ جاساۋدى ايتىپ، بىرلەسە جۇمىلا جۇمىس ىستەۋگە شاقىردى.
شىمكەنت قالاسى اكىمدىگىنىڭ ءباسپاسوز قىزمەتى
