بۇگىندە اياق-قولى ءبۇتىن، قۇلقىن ساۋ، ماڭايى ءبۇتىن بولا تۇرا ومىردەن باز كەشىپ، كۇپىرلىكپەن كۇن كەشىپ جۇرگەن جانداردى قوعامنان ءجيى كەزدەستىرۋگە بولادى. ءتاڭىردىڭ بەرگەن شەكسىز مۇمكىندىگىن دۇرىس پايدالانباي، التىن ۋاقىتىن تەككە وتكىزىپ جۇرگەندەرى قانشاما؟ شىنى كەرەك، كەيدە سولارعا قاراپ ىشتەي ناليسىڭ. ءبىز وسى ورايدا ەكى اياعى ارباعا تاڭىلىپ قالعان ساعدات مەلىسۇلىنىڭ ومىرگە دەگەن قۇشتارلىعى ءھام ونىڭ سپورتتاعى جەتىستىگى وزگەلەرگە ۇلگى بولسىن دەگەن نيەتپەن قالام تەربەگەندى ءجون كوردىك.
س.دۇيسەمباەۆ – كوكسۋ اۋدانىنىڭ تۋماسى. ساداق اتۋدان (مۇگەدەكتەر اراسىندا) قازاقستاننىڭ ەكى دۇركىن چەمپيونى جانە سپورت شەبەرى دەگەن بىلدەي ءبىر اتاعى بار. ەندى ول مۇنداي جەتىستىكە قالاي جەتتى؟ ونىڭ مۇگەدەكتەر ارباسىندا وتىرۋىنا نە سەبەپ؟ اڭگىمەمىزدى وسىدان باستاساق.
ساعدات 2005 جىلى پاۆلودار قالاسىنداعى ءبىر زاۋىتتا تاسىمالداۋشى بولىپ قىزمەت اتقارعان. تاعدىردىڭ جازۋى بولار سول جاقتا جۇرگەندە بويىنا اۋىر بەينەتتى جابىستىرىپتى.
- بىردە دەمالىس ۋاقىتىن پايدالانىپ، ەرتىس وزەنىنە شومىلۋعا بارعانمىن. سوندا سۋعا سۇڭگىمەك بولىپ، جەرگە موينىممەن قۇلادىم. ومىرتقاما قاتتى زاقىم ءتيدى، - دەدى كەيىپكەرىمىز.
ساعدات وتا جاساتقان سوڭ پاۆلوداردا ءۇش اي جاتىپ، كەيىننەن تالدىقورعانعا ورالعان. ءومىرى كۇرت وزگەرگەن ول باستاپقىدا قاتتى قينالعانىن جاسىرمادى. مىنا جارىق الەم، قورشاعان ورتا بارلىعى وعان قىزىقسىز بولىپ قالعانداي كورىندى. الايدا، جاقىندارىنىڭ دەمەۋىمەن كەيىپكەرىمىز ەڭسەسىن تىكتەپ، ومىرگە دەگەن ماحابباتىن قايتا وياتا ءبىلدى. ءتىپتى، دەنساۋلىعى دۇرىستالعان بويدا، «ەلدەن قالىسپايىنشى» دەپ جۇمىس جاساعان كۇندەرى دە بولعان ەكەن.
ياعني ول العاشقىدا كولىككە وتىرىپ، قالا ىشىندە ءبىراز تاكسي قىزمەتىن اتقارىپ كورىپتى. ۋاقىت وتە كەلە بۇل دەنساۋلىققا زيان ەكەنىن ءتۇسىنىپ، رايىنان قايتۋعا تۋرا كەلگەن. دەگەنمەن، بويىندا جىگەرى تاسىپ تۇرعان ازاماتقا ۇيدە بوس جاتا بەرۋ – اۋىر ءتيدى. ءبىر نارسەمەن اينالىسقىسى، اياققا جابىسقان كەسەلدى ۇمىتقىسى كەلەدى-اق. ەندى، قايتپەك كەرەك؟
نەگىزى ساعدات بۇرىننان سپورتقا اۋەس ەدى. اسىرەسە، فۋتبول دەسە بار ءىسىن كەيىنگە شەگەرۋگە ءازىر تۇعىن. وكىنىشتىسى سول، ەندى وعان بۇل سپورتتىڭ ەسىگى جابىق. بىراق، باتىل جىگىت ەلدەردەن سۇراستىرا كەلە باسقا سپورتتان ءوزىنىڭ ورنىن تابا ءبىلدى.
- ساداق اتۋ – توزىمدىلىكتى، دالدىكتى، قىراعىلىقتى تالاپ ەتەدى. سىرت كوزگە وڭاي كورىنەتىن شىعار، بىراق بۇل سپورتتىڭ دا ماشاقاتى كوپ. ماسەلەن، ءبىز كۇنىنە 100-150 رەت وق اتامىز. ساداقتى تارتقان سايىن قولعا ۇلكەن كۇش تۇسەدى. كوبىسى بۇعان شىدامايدى، - دەيدى ساداقشى.
ساعدات مەلىسۇلىنىڭ بۇل سالادا جۇرگەنىنە بيىل 5-ءشى جىل. العاشقىدا مۇگەدەكتەرگە ارنالعان وبلىستىق مامانداندىرىلعان سپورت مەكتەبىنە كەلگەندە ونىڭ مۇمكىنشىلىگىنە ساي كەلەتىن ارنايى ساداق جوق بولىپتى. سونىڭ سالدارىنان ءبىراز ۋاقىتىن جوعالتىپ العان ەكەن. دەگەنمەن، ءساتى ءتۇسىپ، سوڭعى ەكى جىلدا ساداق اتۋمەن بىلەك تۇرە اينالىسىپ كەلەدى. 2019 جىلى سپورت شەبەرلىگىنە ۇمىتكەر بولسا، بيىل سپورت شەبەرى اتاعىن يەلەنىپ وتىر. سوڭعى جەتىستىگىنە كەلەر بولساق، ءبىر اي بۇرىن عانا الماتى قالاسىندا وتكەن ەل بىرىنشىلىگىندە ەكى التىن، ءبىر كۇمىس مەدالدى ەنشىلەگەن. ول جەردە سپورتشى ساداق اتۋدىڭ ءۇش ءتۇرلى ەرەجەسى بويىنشا شەبەرلىگىن سىناپتى. مۇنىڭ الدىندا (2019 جىلى) تالعار قالاسىندا وتكەن قازاقستان چەمپيوناتىندا ءبىر التىن، ءبىر كۇمىس مەدال تاعىپ قايتقانى بار.
ساعدات قازىر چەحيادا وتەتىن الەم بىرىنشىلىگىنە قىزۋ دايىندالۋدا. اشىق اسپان استىندا جاتتىعۋ جاساپ، شەبەرلىگىن بارىنشا شىڭداپ ءجۇر. ارمانى – سول جەردەن جولداما ۇتىپ الىپ، جاپونيادا بولاتىن پاروليمپيادالىق ويىندارعا قاتىسۋ. وسىلايشا، الەمدىك ارەنادا ەلىمىزدىڭ كوك بايراعىن بيىكتەن جەلبىرەتكىسى كەلەدى.
بىزگە ونىڭ باپكەرى ايبەك بەيسەمباەۆپەن دە اڭگىمەلەسۋدىڭ ءساتى ءتۇستى. قازىر ول س.دۇيسەنباەۆتان بولەك، قايرات سىرقۇلوۆ، الەكساندر ريابوۆ، اللا گريزنوۆا سىندى مۇمكىندىگى شەكتەۋلى جاندارعا دا بىلگەنىن ۇيرەتىپ كەلەدى.
- مۇگەدەكتەرگە ارنالعان وبلىستىق مامانداندىرىلعان سپورت مەكتەبىندە جۇمىس جاساعانىما بيىل 10 جىل بولدى. بۇگىندە 8 سپورتشىمەن جۇمىس جاساپ ءجۇرمىن. ولاردىڭ جەتىستىكتەرى دە ايتارلىقتاي. ماسەلەن، ناۋرىز ايىندا قازاقستان چەمپيوناتى ءوتتى. بۇل دودادان ساداقشىلارىمىز 9 التىن، 4 كۇمىس، 3 قولا مەدالدى ەنشىلەپ قايتتى. ەندى شىلدە ايىندا چەحيادا پاروليمپيادا ويىندارىنا ىرىكتەۋ سايىسى وتپەك. قازىر سوعان دايىندالىپ جاتىرمىز، - دەيدى ا.بەيسەمباەۆ.
ول وسى بايراقتى باسەكەگە 4 سپورتشىنى اپارماق نيەتتە. ونىڭ ىشىندە ءبىزدىڭ كەيىپكەرىمىز دە بار. باپكەردىڭ سوزىنە سۇيەنسەك، ساعدات قازىر بابىندا تۇرعان ساداقشى. ءبىر سوزبەن ايتقاندا بولاشاعىنان زور ءۇمىت كۇتۋگە بولادى.
