جەتىسۋلىق جۇيرىكتەر وليمپيادا ويىندارىنا جولداما ۇتىپ الدى

849

الماتى وبلىسىندا ۇلتتىق سپورت تۇرلەرىنەن 1607 سەكتسيا جۇمىس جاسايدى. وندا 55 مىڭنان استام  ادام اتالعان سپورت تۇرىمەن جۇيەلى تۇردە شۇعىلدانادى. بۇل ءوز كەزەگىندە وبلىس اكىمدىگىنىڭ تاراپىنان كورسەتىلىپ جاتقان قولداۋدىڭ ناتيجەسى.

بۇگىندە جەتىسۋ جەرىندە، ۇلتتىق سپورت تۇرلەرىنەن «سايات»، «سونار» حالىقارالىق جارىسى، ۇلتتىق ات سپورتى تۇرلەرىنەن «جەتىسۋ جۇيرىگى»، «جەتىسۋ ءبورىسى»، «التىن ساقا» «اقبيداي» اۋىل ويىندارى سىندى ءىرى جارىستارى ۇدايى ۇيىمداستىرىلادى.

ايماقتا ۇلتتىق سپورتتى دامىتۋ جۇمىستارى قارقىندى. ايتالىق، قازىردە تالدىقورعان قالاسىندا جانە قاراساي اۋدانىندا ۇلتتىق جانە ات سپورتى تۇرلەرىنەن مامانداندىرىلعان بالالار مەن جاسوسپىرىمدەر سپورت مەكتەبى جانە تالعار اۋدانىندا ۇلتتىق جانە ات سپورت تۇرلەرىنەن ورتالىعى، قاپشاعاي قالاسىندا ات سپورتى مەكتەبى جۇمىس جاساۋدا.

بۇل قاتاردا تەحنيكالىق سپورتتىڭ دا كەنجەلەپ قالماعانىن اتاپ وتكەن ءجون.  وڭىردە 250 ادام تەحنيكالىق سپورت تۇرىمەن اينالىسادى. وعان پاراشيۋتتىق، اۆتوموبيلدىك، موتوتسيكلدىك، جەلكەندى سپورت جانە بايداركا مەن كانوەدان ەسۋ تۇرلەرى كىرەدى.

«ۇلتتىق سپورتتى دامىتۋ – جاس بۋىننىڭ تاريحي ساناسىن جاڭعىرتۋدىڭ ءبىر جولى. بارشاعا بەلگىلى، تاريحي سانا قالىپتاسپاي، وتانشىلدىق سانا ورنىقپايدى. ال تاريحي سانانىڭ تۇعىرى قاشاندا ۇلتتىق بولمىستان.الداعى ۋاقىتتا دا مادەنيەتىمىز بەن قۇندىلىقتارىمىزدىڭ ءبىر بولشەگى بولىپ تابىلاتىن ۇلتتىق سپورت ماسەلەسىن كوتەرە وتىرىپ، وبلىستا بۇقارالىق سپورتتى جانە بالالار سپورتىن دامىتاتىن بولامىز»،-دەيدى الماتى وبلىسى دەنە شىنىقتىرۋ جانە سپورت باسقارماسىنىڭ باسشىسى نۇرباقىت تەڭىزباەۆ.

جەرلەستەر سپورتتىڭ قاي باعىتىندا بولماسىن جۇزدەن جۇيرىك. ونىڭ ايقىن دالەلى، اعىمداعى جىلى سپورتشىلار قر چەمپيوناتتارىندا 10 التىن، 15 كۇمىس جانە 12 قولا مەدالدى قانجىعالارىنا بايلاعانى.  جىگەرى مىقتى وعلاندار جاراپ تۇر. ولار ۇستىمىزدەگى جىلدىڭ 23 شىلدە – 8 تامىز ارالىعىندا وتەتىن توكيوداعى ءXXXIى جازعى وليمپيادا ويىندارىنا 9 بىردەي جولدامانى ۇتىپ الدى. سونىمەن قاتار  تاس جولداعى ۆەلوسپورت، جەڭىل اتلەتيكا (يادرو لاقتىرۋ), اۋىر اتلەتيكا جانە ءجۇزۋ سپورت تۇرلەرىنەن 4 سپورتشى جولداما يەلەنۋگە ۇمىتكەر بولىپ تابىلادى.

سونداي-اق، نۇرباقىت تەڭىزباەۆ «بۇقارالىق جانە بالالار سپورتىن دامىتۋ ماقساتىندا الماتى وبلىسىندا اعىمداعى جىلى جان باسىنا شاققانداعى قارجىلاندىرۋ مەحانيزمىن ىسكە اسىرۋ بارىسىندا سپورتتىق سەكتسيالاردا 6000 بالانى قامتۋ جوسپارلانىپ، جۇمىستى باستاۋعا جەرگىلىكتى بيۋدجەتتەن 250 ملن.تەڭگە قاراجات ءبولىندى»،- دەپ اتاپ ءوتتى.

قاپەرلەرىڭىزگە سالامىز، 2021 جىلى مەملەكەتتىك سپورتتىق تاپسىرىس اياسىندا قامتىلاتىندار سانىن 20 000 بالاعا دەيىن ارتتىرۋ كوزدەلىپ، اتالعان ماقساتقا قوسىمشا 1,4 ملرد.تەڭگە قاراجات ءبولۋ بويىنشا بيۋدجەتتىك ءوتىنىم ۇسىنىلدى.

پىكىرلەر
ۇقساس جاڭالىقتار