Búginde aıaq-qoly bútin, qulqyn saý, mańaıy bútin bola tura ómirden baz keship, kúpirlikpen kún keship júrgen jandardy qoǵamnan jıi kezdestirýge bolady. Táńirdiń bergen sheksiz múmkindigin durys paıdalanbaı, altyn ýaqytyn tekke ótkizip júrgenderi qanshama? Shyny kerek, keıde solarǵa qarap ishteı nalısyń. Biz osy oraıda eki aıaǵy arbaǵa tańylyp qalǵan Saǵdat Melisulynyń ómirge degen qushtarlyǵy hám onyń sporttaǵy jetistigi ózgelerge úlgi bolsyn degen nıetpen qalam terbegendi jón kórdik.
S.Dúısembaev – Kóksý aýdanynyń týmasy. Sadaq atýdan (múgedekter arasynda) Qazaqstannyń eki dúrkin chempıony jáne sport sheberi degen bildeı bir ataǵy bar. Endi ol mundaı jetistike qalaı jetti? Onyń múgedekter arbasynda otyrýyna ne sebep? Áńgimemizdi osydan bastasaq.
Saǵdat 2005 jyly Pavlodar qalasyndaǵy bir zaýytta tasymaldaýshy bolyp qyzmet atqarǵan. Taǵdyrdyń jazýy bolar sol jaqta júrgende boıyna aýyr beınetti jabystyrypty.
- Birde demalys ýaqytyn paıdalanyp, Ertis ózenine shomylýǵa barǵanmyn. Sonda sýǵa súńgimek bolyp, jerge moınymmen quladym. Omyrtqama qatty zaqym tıdi, - dedi keıipkerimiz.
Saǵdat ota jasatqan soń Pavlodarda úsh aı jatyp, keıinnen Taldyqorǵanǵa oralǵan. Ómiri kúrt ózgergen ol bastapqyda qatty qınalǵanyn jasyrmady. Myna jaryq álem, qorshaǵan orta barlyǵy oǵan qyzyqsyz bolyp qalǵandaı kórindi. Alaıda, jaqyndarynyń demeýimen keıipkerimiz eńsesin tiktep, ómirge degen mahabbatyn qaıta oıata bildi. Tipti, densaýlyǵy durystalǵan boıda, «elden qalyspaıynshy» dep jumys jasaǵan kúnderi de bolǵan eken.
Iaǵnı ol alǵashqyda kólikke otyryp, qala ishinde biraz taksı qyzmetin atqaryp kóripti. Ýaqyt óte kele bul densaýlyqqa zııan ekenin túsinip, raıynan qaıtýǵa týra kelgen. Degenmen, boıynda jigeri tasyp turǵan azamatqa úıde bos jata berý – aýyr tıdi. Bir nársemen aınalysqysy, aıaqqa jabysqan keseldi umytqysy keledi-aq. Endi, qaıtpek kerek?
Negizi Saǵdat burynnan sportqa áýes edi. Ásirese, fýtbol dese bar isin keıinge shegerýge ázir tuǵyn. Ókinishtisi sol, endi oǵan bul sporttyń esigi jabyq. Biraq, batyl jigit elderden surastyra kele basqa sporttan óziniń ornyn taba bildi.
- Sadaq atý – tózimdilikti, dáldikti, qyraǵylyqty talap etedi. Syrt kózge ońaı kórinetin shyǵar, biraq bul sporttyń da mashaqaty kóp. Máselen, biz kúnine 100-150 ret oq atamyz. Sadaqty tartqan saıyn qolǵa úlken kúsh túsedi. Kóbisi buǵan shydamaıdy, - deıdi sadaqshy.
Saǵdat Melisulynyń bul salada júrgenine bıyl 5-shi jyl. Alǵashqyda múgedekterge arnalǵan oblystyq mamandandyrylǵan sport mektebine kelgende onyń múmkinshiligine saı keletin arnaıy sadaq joq bolypty. Sonyń saldarynan biraz ýaqytyn joǵaltyp alǵan eken. Degenmen, sáti túsip, sońǵy eki jylda sadaq atýmen bilek túre aınalysyp keledi. 2019 jyly sport sheberligine úmitker bolsa, bıyl sport sheberi ataǵyn ıelenip otyr. Sońǵy jetistigine keler bolsaq, bir aı buryn ǵana Almaty qalasynda ótken el birinshiliginde eki altyn, bir kúmis medaldi enshilegen. Ol jerde sportshy sadaq atýdyń úsh túrli erejesi boıynsha sheberligin synapty. Munyń aldynda (2019 jyly) Talǵar qalasynda ótken Qazaqstan chempıonatynda bir altyn, bir kúmis medal taǵyp qaıtqany bar.
Saǵdat qazir Chehııada ótetin álem birinshiligine qyzý daıyndalýda. Ashyq aspan astynda jattyǵý jasap, sheberligin barynsha shyńdap júr. Armany – sol jerden joldama utyp alyp, Japonııada bolatyn parolımpıadalyq oıyndarǵa qatysý. Osylaısha, álemdik arenada elimizdiń kók baıraǵyn bıikten jelbiretkisi keledi.
Bizge onyń bapkeri Aıbek Beısembaevpen de áńgimelesýdiń sáti tústi. Qazir ol S.Dúısenbaevtan bólek, Qaırat Syrqulov, Aleksandr Rıabov, Alla Grıznova syndy múmkindigi shekteýli jandarǵa da bilgenin úıretip keledi.
- Múgedekterge arnalǵan oblystyq mamandandyrylǵan sport mektebinde jumys jasaǵanyma bıyl 10 jyl boldy. Búginde 8 sportshymen jumys jasap júrmin. Olardyń jetistikteri de aıtarlyqtaı. Máselen, naýryz aıynda Qazaqstan chempıonaty ótti. Bul dodadan sadaqshylarymyz 9 altyn, 4 kúmis, 3 qola medaldi enshilep qaıtty. Endi shilde aıynda Chehııada parolımpıada oıyndaryna irikteý saıysy ótpek. Qazir soǵan daıyndalyp jatyrmyz, - deıdi A.Beısembaev.
Ol osy baıraqty básekege 4 sportshyny aparmaq nıette. Onyń ishinde bizdiń keıipkerimiz de bar. Bapkerdiń sózine súıensek, Saǵdat qazir babynda turǵan sadaqshy. Bir sózben aıtqanda bolashaǵynan zor úmit kútýge bolady.
