ءماجىلىس دەپۋتاتى، ايتىسكەر اقىن رينات زايىتوۆ ەلىمىزدەگى سپورتشىلار اراسىندا تەرىس ءدىني اعىمعا بەت بۇرىپ جۇرگەندەر بار ەكەنىن ايتتى، دەپ حابارلايدى "ادىرنا" ۇلتتىق پورتالى Adal Adam YouTube-ارناسىنا سىلتەپ.
«ءىس-شارالارعا بارامىز، ءتۇرلى سالانىڭ وكىلدەرىمەن ارالاسامىز. سونداي جيىنداردا سپورتشىلار دا بولادى. سولاردىڭ اراسىندا «ءبىز حاليفات قۇرۋىمىز كەرەك» دەپ اشىق ايتاتىندارى بار»، – دەيدى دەپۋتات.
ونىڭ ايتۋىنشا، اسىرەسە كۇش قولدانىلاتىن سپورت تۇرلەرىندە جۇرگەن كەيبىر سپورتشىلاردىڭ ءدىني كوزقاراسى الاڭداتارلىق.
«MMA جارىستارىندا ءبىر جاعىنا قازاقستاننىڭ تۋىن، ەكىنشى جاعىنا جاسىل ءتۇستى، ارابشا جازۋى بار تۋدى الىپ شىعاتىن قازاقتىڭ جىگىتتەرىن ءوز كوزىممەن كوردىم. ول قانداي تۋ – تۇسىنبەدىم. بىراق ولار نەگە وسى سپورت ءتۇرىن تاڭدايدى، تۇپكى ماقساتى نە – بۇل جاعى زەرتتەلمەي جاتىر»، – دەپ الاڭداۋشىلىعىن ءبىلدىردى زايىتوۆ.
دەپۋتاتتىڭ سوزىنشە، بۇگىندە تەرىس اعىم وكىلدەرىن سىرتقى كەلبەتى ارقىلى تانۋ دا قيىن.
«باياعىداي ساقال قويىپ، سىرتتاي بىلىنەتىن ۋاقىت ەمەس. قازىر وندايلار ساقال دا وسىرمەيدى. مىسالى، سيريادا ءبىر كۇندە بۇلىك بولعاندا، قاۋىپتىڭ قايدان كەلگەنىن حالىق تۇسىنبەي قالعان. كەيىن بەلگىلى بولعانداي، دايش وكىلدەرى سول ەلدىڭ بيلىگىنە دەيىن كىرىپ العان ەكەن. سوندىقتان ونداي قاۋىپ بىزدە جوق دەپ كەسىپ ايتۋ قيىن. تاڭداناتىنىم – بۇل ماسەلە نەگە ءالى كۇنگە دەيىن تەرەڭ زەرتتەلمەي كەلەدى؟»، – دەيدى ماجىلىسمەن.
ايتا كەتەيىك، بۇعان دەيىن قر سپورت جانە دەنە شىنىقتىرۋ ىستەرى اگەنتتىگىنىڭ باسشىسى ەربول مىرزابوسىنوۆ «ءدىندار» سپورتشىلارمەن جۇمىس جۇرگىزىلەتىنىن، بۇل باعىتتا ارنايى جول كارتاسى جاسالعانىن مالىمدەگەن ەدى.
ۇقساس جاڭالىقتار
