قاسيەتتى رامازان ايى باستالعالى الماتى وبلىسىندا كوپتەگەن يگى ءىس اتقارىلۋدا. وسىعان سايكەس تالدىقورعانداعى ورتالىق «يمان» مەشىتىندە 1000 ادامعا اۋىزاشار رەتىندە ازىق-تۇلىك تاراتىلدى. ايماقتاعى مەشىت يمامدارى ۇيىتقى بولعان بۇل شاراعا «قارايلاس» جوباسى قولداۋ كورسەتكەن.
جوبا جەتەكشىسى ءجانادىل رايىمبەكوۆتىڭ ايتۋىنشا، جاقىندا عانا قۇرىلعان «قارايلاس» جوباسىنىڭ باستى ماقساتى – تۇرمىسىندا قيىنشىلىعى بار جانە مۇقتاج جاندارعا كومەك كورسەتۋمەن قاتار جاڭادان جۇمىس باستاعان كاسىپ يەلەرىن قولداۋ. وسىعان دەيىن الماتى ماڭىنداعى بايسەركە اۋىلىنداعى 8 بالانىڭ اناسى ساۋلەنىڭ كاسىبىن قولداپ، بىرنەشە تىگىن ماشيناسىمەن باسقا دا زاتتار ساتىپ الىپ بەرسە، گاۋھار ەسىمدى تاعى ءبىر جالعىزباستى ءۇش بالانىڭ اناسىنا ارنايى سۇلۋلىق سالونىن اشىپ بەرگەن.
- بۇل جولعى ۇلەستىرىلگەن اۋىزاشار قورجىنىنا دا وسى «قارايلاس» قورى ۇلكەن كومەك كورسەتتى. ال، اۋىزاشار تاعامى ەلدەگى ەتەك الىپ تۇرعان ىندەتكە بايلانىستى ءار وتباسىنا جەتكىزىپ بەرىلدى. وعان ايماقتاعى جاستار ساياساتى باسقارماسىنىڭ جاس ماماندارى، ەرىكتىلەر جانە كولىك جۇرگىزۋشىلەرى جان-جاقتى اتسالىستى. تاراتىلعان ازىق- تۇلىكتەرمەن ايماقتاعى ىندەتپەن كۇرەسىپ جاتقان دارىگەرلەر، باسقا دا مۇقتاج جاندار، ورازا ۇستاۋشىلار، سونداي-اق تۇرمەدەگى جازاسىن وتەپ جاتقاندار مەن كۇزەتشىلەر جانە تازالىقشىلارعا دەيىن تەگىس قامتىلدى، -دەدى قمدب-نىڭ تالدىقورعان ءوڭىرى بويىنشا باس يمامى ارداق قاجى ءنۇسىپحانۇلى.
