ءساۋىر ايىنىڭ 13- جۇلدىزى كۇللى مۇسىلمان قاۋىمى اسىعا كۇتكەن قاسيەتتى رامازان ايىنىڭ العاشقى كۇنى. جۇرەگىنە ىزگىلىك پەن يمان ۇيالاعان ءاربىر جان 30 كۇن ورازا تۇتۋعا نيەت ەتىپ، جاراتۋشى جالعىز يەمىزدەن ەلىمىزگە، جەرىمىزگە، دىنىمىزگە، تىلىمىزگە بار جاقسىلىق تىلەپ جاتقانى انىق. وسى ءبىر قاستەرلى ايدا ەلدەگى ىندەتكە بايلانىستى شەكتەۋلەردى ساقتاي وتىرىپ تالدىقورعانداعى مەشىت يمامدارى ءتۇرلى قايىرىمدىلىق شارالارىن ۇيىمداستىرۋدا.
اتاپ ايتساق، رامازان ايىنىڭ قارساڭىندا قمدب-نىڭ تالدىقورعان ءوڭىرى بويىنشا وكىلدىگىنىڭ مۇرىندىق بولۋىندا دەمەۋشىلەردىڭ قولداۋىمەن، تالدىقورعانداعى ورتالىق «يمان» مەشىتى جانە قالالىق «جەتىسۋ» مەشىتىندە «رامازان سىيى» اتتى اكتسيا ۇيىمداستىردى. وندا تۇرمىسىندا قيىنشىلىعى بار 300 وتباسىنا 8 تونناعا جۋىق ازىق-تۇلىك سەبەتتەرى تاراتىلدى. ازىق-تۇلىك سالىنعان ءار قوراپتا 10 كەلى ۇن، 5 كەلى كۇرىش، 5 كەلى كەسپە، 5 ليتر ماي جانە 1 كەلى تۇز بار.
ارنايى ۇيىمداستىرىلعان شاراعا، ءوڭىردىڭ باس يمامى ارداق قاجى ءنۇسىپحانۇلى قاتىسىپ، جالپى جەتىسۋ جۇرتىن رامازان ايىمەن قۇتتىقتادى. ءارى مەشىتكە ءوتىنىش جازعان مۇقتاج جانداردان تىس، مەشىتتەردەگى 5 ۋاقىت نامازعا كەلۋشى جاماعاتتاردىڭ جۇبايلارىنا جانە مەشىت قىزمەتكەرلەرىنە، كۇزەتشى، تازالىقشىلارعا دەيىن ازىق-تۇلىك سەبەتتەرىن ءوز قولىمەن تابىس ەتتى. سونىمەن بىرگە رامازان ايىنىڭ العاشقى كۇنى مەشىت جاناشىرلارى يمامدارمەن اقىلداسىپ، 150-گە جۋىق ورازا ۇستاعان ادامعا جەمىس-جيدەك جانە اۋىزاشار تاعامدارىن ۇسىندى. ايماقتاعى كارانتين تالاپتارىنا ساي اس ءمازىرى مەشىتتە دايىندالىپ، ەرىكتىلەر ورازا ۇستاعان جانداردىڭ ۇيلەرىنە جەتكىزىپ بەردى.
— مۇنداي يگىلىكتى ىستەر تەك مۇنىمەن شەكتەلىپ قالماق ەمەس، اللا بۇيىرسا، الداعى ۋاقىتتا اۋىزاشار تاعامدارىن كۇندەلىكتى دايىنداپ تاراتۋ جوسپارلانسا، باسقا دا قايىرىمدىلىق شارالارى ايماقتاعى جومارت جانداردىڭ كومەگىمەن ءالى دە جالعاسىن تاباتىن بولادى، — دەيدى ءوڭىر يمامى.
ورازاڭ قابىل بولسىن ۇستاعان جان!
