Sáýir aıynyń 13- juldyzy kúlli musylman qaýymy asyǵa kútken qasıetti Ramazan aıynyń alǵashqy kúni. Júregine izgilik pen ıman uıalaǵan árbir jan 30 kún oraza tutýǵa nıet etip, jaratýshy jalǵyz ıemizden elimizge, jerimizge, dinimizge, tilimizge bar jaqsylyq tilep jatqany anyq. Osy bir qasterli aıda eldegi indetke baılanysty shekteýlerdi saqtaı otyryp Taldyqorǵandaǵy meshit ımamdary túrli qaıyrymdylyq sharalaryn uıymdastyrýda.
Atap aıtsaq, Ramazan aıynyń qarsańynda QMDB-nyń Taldyqorǵan óńiri boıynsha ókildiginiń muryndyq bolýynda demeýshilerdiń qoldaýymen, Taldyqorǵandaǵy ortalyq «Iman» meshiti jáne qalalyq «Jetisý» meshitinde «Ramazan syıy» atty akııa uıymdastyrdy. Onda turmysynda qıynshylyǵy bar 300 otbasyna 8 tonnaǵa jýyq azyq-túlik sebetteri taratyldy. Azyq-túlik salynǵan ár qorapta 10 keli un, 5 keli kúrish, 5 keli kespe, 5 lıtr maı jáne 1 keli tuz bar.
Arnaıy uıymdastyrylǵan sharaǵa, óńirdiń bas ımamy Ardaq qajy Núsiphanuly qatysyp, jalpy Jetisý jurtyn Ramazan aıymen quttyqtady. Ári meshitke ótinish jazǵan muqtaj jandardan tys, meshitterdegi 5 ýaqyt namazǵa kelýshi jamaǵattardyń jubaılaryna jáne meshit qyzmetkerlerine, kúzetshi, tazalyqshylarǵa deıin azyq-túlik sebetterin óz qolymen tabys etti. Sonymen birge Ramazan aıynyń alǵashqy kúni meshit janashyrlary ımamdarmen aqyldasyp, 150-ge jýyq oraza ustaǵan adamǵa jemis-jıdek jáne aýyzashar taǵamdaryn usyndy. Aımaqtaǵy karantın talaptaryna saı as máziri meshitte daıyndalyp, eriktiler oraza ustaǵan jandardyń úılerine jetkizip berdi.
— Mundaı ıgilikti ister tek munymen shektelip qalmaq emes, Alla buıyrsa, aldaǵy ýaqytta aýyzashar taǵamdaryn kúndelikti daıyndap taratý josparlansa, basqa da qaıyrymdylyq sharalary aımaqtaǵy jomart jandardyń kómegimen áli de jalǵasyn tabatyn bolady, — deıdi óńir ımamy.
Orazań qabyl bolsyn ustaǵan jan!
