13 ءساۋىر كۇنى قاسيەتتى رامازان ايى باستالدى. ايلاردىڭ سۇلتانى اتالعان بۇل اي، مۇسىلماننىڭ بەس پارىزىنىڭ ءبىرى بولعان ورازا ۇستاۋ ۇردىسىمەن، جاسالعان يگى امالداردىڭ ەسەلەنۋىمەن ەرەكشەلەنەدى.
بيىل رامازان ايى 30 كۇنگە سوزىلادى: 13 ساۋىردە باستالىپ، 12 مامىردا اياقتالادى.
ورازا ايت مەيرامى 13 مامىردا باستالادى. ال تۇندەردىڭ سۇلتانى اتالعان - قادىر ءتۇنى 8 مامىردان 9 مامىرعا قاراعان ءتۇنى بولادى دەپ كۇتىلۋدە.
ءپىتىر-ساداقا بيىل 420 تەڭگە دەپ بەلگىلەندى.
ورازانى نە بۇزبايدى؟
1. ۇمىتىپ ءىشىپ-جەۋ ورازانى بۇزبايدى. بىراق ۇمىتقان ادام ەسىنە تۇسكەن كەزدە جەۋدى دەرەۋ توقتاتۋى كەرەك;
2. ۇيقىدان ءجۇنىپ بولىپ ويانۋ;
3. ايەلىن ءسۇيۋ نەمەسە دەنەسىنە قولىن تيگىزۋى. مۇنداي جاعدايلاردا ەگەر ءماني شىقپاسا، ورازا بۇزىلمايدى;
4. ايەلىنە قولىن تيگىزبەسە دە وعان قاراۋدان نەمەسە ءشاھۋاتىن قوزدىراتىن جاعدايلاردى ويلاپ ءماني شىقسا;
5. تۇندە ءجۇنىپ بولىپ، عۇسىل الۋدى سارەسى ۋاقىتىنان كەيىنگە قالدىرۋ;
6. اۋزىنا كەلگەن قاقىرىقتى جۇتۋ;
7. تۇكىرىك نەمەسە مۇرىندى تارتۋ ارقىلى ءبىر نارسەنىڭ تاماققا كەتۋى;
8. قۇلاققا سۋ كىرۋ، بۇلىق اعۋ;
9. تەمەكى ءتۇتىنى نەمەسە توپىراق، شاڭ، ۇننىڭ توزاڭى، قاردىڭ ۇشقىنى، جاۋىننىڭ تامشىلارى تاماققا ەرىكسىز كىرسە، ورازا بۇزىلمايدى;
10. تىستەردىڭ اراسىندا قالعان تاماق قالدىقتارى نوقاتتان كىشكەنە بولسا، ونى جۇتۋ ورازانى بۇزبايدى;
11. ەرىكسىز اۋىز تولى قۇسۋ نەمەسە ونىڭ ىشكە قايتا كەتۋى ورازانى بۇزبايدى;
12. قان الدىرۋ نەمەسە سۇلىك سالدىرۋ;
13. كوزگە ءدارى تامىزۋ;
14. ميسۋاك نەمەسە ءتىس پاستاسىن قولدانۋ ورازانى بۇزبايدى. بىراق پاستاسى ىشكە كەتىپ قالسا بۇزىلادى. ەڭ ابزالى تاڭ نامازى كىرمەي تۇرىپ تىستەردى جۋ;
15. ءتىس جۇلدىرۋ ورازاعا كەدەرگى جاسامايدى. بىراق جۇلدىرعان ۋاقىتتا اۋىزداعى قاندى ياكي ءدارىنى جۇتپاۋ شارت;
16. اۋىز بەن مۇرىنعا سۋ الىپ شايقاۋ ورازانى بۇزبايدى. بىراق تاماققا كەتپەۋىن قاداعالاۋ قاجەت;
17. دۋشقا جۋىنۋ، تەڭىزگە، كولگە ءتۇسۋ ورازانى بۇزبايدى. بىراق سۋ جۇتىپ قويۋدان ساقتانۋى كەرەك.
ورازانى نە بۇزادى؟
- ادەيى ءبىر نارسەنى جەپ-ءىشۋ;
- تەمەكى شەگۋ، ناسىباي اتۋ، ءدارى ءىشۋ، قۇرامىندا ءنارلى زاتتارى بار ۋكول قابىلداۋ;
- اۋزىنداعى جاڭبىر تامشىلارىن ادەيى جۇتۋ; بۇل جايلى مىنا حاديستە ايتىلعان: «ورازا كىرگەن نارسەلەردەن عانا بۇزىلادى، شىققاننان ەمەس».
- ايەلىمەن جاقىنداسۋ (ياعني، تاڭ نامازىنان اقشام نامازىنا دەيىن جاقىنداسۋ ورازانى بۇزادى);
- Cەبەپسىز قورەك نەمەسە قورەكتىك قاسيەتى بار بارلىق زاتتاردى بىلە تۇرا ادەيىلەپ جەۋ ورازانى بۇزادى;
- مۇنداي جاعدايلاردا كاففارات ورازاسىن ۇستاۋ قاجەت. (كاففارات دەپ – رامازان ايىنىڭ ورازاسىن سەبەپسىزدەن-سەبەپسىز بىلە تۇرا بۇزىپ جىبەرسە، ەكى اي ورازا ۇستاۋدى، وعان شاماسى كەلمەسە الپىس كەدەيدى تاماقتاندىرىپ، تويعىزۋدى ايتادى).
ورازانى كىمدەرگە ۇستاماۋعا رۇقسات؟
- جولاۋشىلىق; (ساپاردا اۋىز بەكىتپەۋگە بولادى، بىراق باسقا كۇندەردە سانىن تولتىرىپ ورازا ۇستايدى).
- جۇكتىلىك پەن بالا ەمىزۋ; (ەگەر دەنساۋلىعى مەن بالاسىنا زيان كەلۋدەن قورىقسا ورازا ۇستاماي كەيىن قازاسىن وتەسە بولادى).
- اۋرۋ-سىرقاۋ; (سەنىمدى دارىگەر ورازا دەنساۋلىعىنا زيان تيگىزەتىنىن جان-جاقتى انىقتاپ بارىپ ايتسا، جازىلعان سوڭ ۇستاۋعا بولادى).
- كارىلىك; (قارتايىپ ورازانى دەنساۋلىعى كوتەرمەيتىن كىسىلەر ءبىر كەدەيدىڭ تاڭعى جانە كەشكى اسىن بەرىپ تويدىرادى. وعان شاماسى كەلمەسە تاۋبە ەتەدى).
-حايىز (ەتەككىر) بەن نيفاس; ء(بىر ايەل ورازا كەزىندە ەتەككىر كورسە نەمەسە بوسانسا ورازا بۇزىلادى. مۇنداي جاعدايدا توقتاعان سوڭ قازاسىن وتەيدى).
"ادىرنا" ۇلتتىق پورتالى
قمدب شاريعات جانە ءپاتۋا ءبولىمى
