ەل تاۋەلسىزدىگىنىڭ 30 جىلدىعى اياسىندا «تاڭبالى» مەملەكەتتىك تاريحي-مادەني جانە تابيعي قورىق مۋزەيىندە ءال-فارابي اتىنداعى قازۇۋ-دەگى ارحەولوگيا، ەتنولوگيا جانە مۋزەولوگيا كافەدراسىنىڭ فيليالى اشىلدى.
تاڭبالى قورىق-مۇراجايى الماتى قالاسىنىڭ 170 شاقىرىم سولتۇستىك-باتىسىندا، جامبىل اۋدانىنا قاراستى قاراباستاۋ اۋىلىنىڭ ماڭىندا ورنالاسقان. يۋنەسكو-نىڭ قورعاۋىنداعى تاريحي نىساندا ءار ءتۇرلى ۋاقىت ارالىعىن قامتيتىن ءۇش مىڭعا جۋىق پەتروگليفتەردى قۇرايتىن جۇزدەن استام ەسكەرتكىش بار.
ارحەولوگ، ەتنولوگ، مۋزەيتانۋشى ماماندار دايارلاۋدا مۇراجاي مەن ءال-فارابي اتىنداعى قازاق ۇلتتىق ۋنيۆەرسيتەتى بىرلەسىپ ۇلت قازىناسىن مولايتار جەمىستى جۇمىستار اتقارماق. بولاشاق ارحەولوگيا، ەتنولوگ ماماندارىنىڭ بىلىمدەرىن جەتىلدىرىپ، ناقتى وندىرىستىك ءىس-تاجىريبە الۋ ءۇشىن مۇراجاي بازاسىندا وزەكتى تاقىرىپتار بويىنشا سەمينارلار، كونفەرەنتسيالار، عىلىمي-زەرتتەۋ جوبالارى، شەبەرلىكتى شىڭداۋ ساباقتارى، ترەنينگتەر وتكىزۋ سياقتى عىلىمي-تاجىريبەلىك ءىس-شارالار جۇزەگە اسىرىلاتىن بولادى.
«تاڭبالى» قورىق-مۇراجايىندا اشىلعان ارحەولوگيا، ەتنولوگيا جانە مۋزەولوگيا كافەدراسىنىڭ فيليالى قيلى داۋىرلەردەگى ارحەولوگيالىق ەسكەرتكىشتەرگە بىرلەسكەن عىلىمي-زەرتتەۋلەر جۇرگىزۋ، تاڭبالى شاتقالىنىڭ پەتروگليفتەرىن زەرتتەۋ، جارتاس سۋرەتتەرىنىڭ تاريحي-مادەني جانە پالەوەكولوگيالىق ماعىنالى ءماتىنىن قايتا قۇرۋ جۇمىستارىمەن اينالىسادى.
