قاراعاندى وبلىسىنىڭ تالدى تاريحي-ارحەولوگيالىق پاركىندە بايقاسقا-2 قورىمىنداعى قازبا جۇمىستارى اياقتالدى. ەكسپەديتسيانى «ارحەولوگيالىق زەرتتەۋلەر» جشس ماماندارى قاراعاندى وبلىسىنىڭ تاريحي-مادەني مۇرانى ساقتاۋ ورتالىعىنىڭ قولداۋىمەن جۇرگىزدى، دەپ حابارلايدى «ادىرنا».
سىرت كوزگە قاراپايىم توبەشىككە ۇقساعان قورعاننىڭ استىنان ارحەولوگتار كۇردەلى قۇرىلىم اشتى. ول — ءىرى تاقتالارمەن جابىلعان ءماسسيۆتى تاس جاشىك، تاس پەن بالشىقتان تۇرعىزىلعان سىرتقى قابات جانە اينالدىرا شەڭبەر قۇرا ورنالاسقان قۋاتتى تاس بەلدەۋلەر. مامانداردىڭ پايىمداۋىنشا، مۇنداي قۇرىلىستار ەجەلگى داۋىردە جوعارى مارتەبەلى ادامدارعا ارنالىپ سالىنعان.
«ءبىزدىڭ ءوڭىر ءۇشىن بۇل وتە سيرەك كەزدەسەتىن ەسكەرتكىش. اسىرەسە ماڭداي تۇسىنان تەسىلگەن باس سۇيەك سىنىعى ەرەكشە نازار اۋدارتتى. مۇنداي تابىلىم ورتالىق قازاقستان اۋماعىندا وتە سيرەك ۇشىراسادى. بۇل عۇرىپتىق ءراسىمنىڭ بەلگىسى نەمەسە جەرلەنگەن ادامنىڭ ايرىقشا الەۋمەتتىك مارتەبەسىن ءبىلدىرۋى مۇمكىن», – دەدى «ارحەولوگيالىق زەرتتەۋلەر» جشس قىزمەتكەرى انۆار كاريموۆ.
ماۋسىمداعى نەگىزگى تابىلىمداردىڭ قاتارىندا ادام سۇيەكتەرى، جانۋارلاردىڭ قالدىقتارى، قولا مەن مۇيىزدەن جاسالعان جەبە ۇشتارى، سونداي-اق ورنەكتى كەراميكا بار.
سونىمەن بىرگە، قورعاننىڭ باتىس بولىگىنەن كەيىنگى كەزەڭگە جاتاتىن 11 جەرلەۋ ورنى انىقتالدى. بۇل ايماقتىڭ ەجەلدەن-اق قاسيەتتى مەكەن سانالعانىن ايعاقتايدى.
ەكسپەديتسيا سارىارقانىڭ سايىن دالاسى ءالى تالاي قۇپيانى ساقتاپ جاتقانىن تاعى ءبىر مارتك دالەلدەدى. ءاربىر جاڭا تابىلىم كونە كوشپەندىلەردىڭ مادەنيەتى مەن ءداستۇرىن تەرەڭىرەك تانۋعا جول اشادى.
