الماتى وبلىسىندا العاش رەت 2020 جىلى ينكليۋزيۆتى باعىتتاعى ينتەرنەت-راديو جۇمىسىن باستاعان ەدى. جوبانىڭ نەگىزىن قالاۋشىلار «مەيىرىم» قوعامدىق بىرلەستىگى.
جەتىسۋ وڭىرىندە 67 مىڭ كەم باعالى ادام تۇرادى. ولاردى تۇراقتى جۇمىسپەن قامتۋ، بەلسەندى قوعام ومىرىنە تارتۋ ءىسى وزەكتىلىگىن جويعان ەمەس. وسى ورايدا، الماتى وبلىسىندا ماڭىزدى باستاما جولعا قويىلعان.
ەندىگى دە وڭىردەگى مۇمكىندىگى شەكتەۋلى ازاماتتار باق سالاسىندا باعىن سىناماق. وبلىستىق «مەيىرىم» قوعامدىق بىرلەستىگىنىڭ مۇرىندىق بولۋىمەن «DeFacto FM» ينتەرنەت-راديوسى ءوز جۇمىسىن باستاعان بولاتىن.
بۇگىنگى كۇنى مۇندا 4 كەمباعالى ازامات پەن 4 ستۋدەنت ەڭبەك ەتۋدە. ولاردىڭ ماماندىقتارى ءار ءتۇرلى بولعانىمەن شىعارماشىلىققا دەگەن قىزىعۋشىلىقتارى راديونىڭ ماڭىنا توپتاستىرعان.
سولاردىڭ ءبىرى ەرنات قاسمۇحانوۆ. ول 2-ءشى توپتاعى مۇگەدەك. تاعدىرى سىن تەزىنە سالسا دا ەش مويىماعان جان. نەگىزگى كاسىبى جاتتىقتىرۋشى، ءوزى دە سپورت سالاسىندا جەتىستىكتەرگە قول جەتكىزگەن ازامات، قر سپورت شەبەرى.
بالالاردى جاتتىقتىرىپ قانا قويماي، باق سالاسىنا بەت بۇرىپ جۇرگەن جايى بار. «DeFacto FM» ينتەرنەت-راديوسىندا جۋرناليست رەتىندە شىڭدالىپ، سۇحباتقا نەگىزدەلگەن باعدارلامالاردى ازىرلەيدى.
«DeFacto FM» راديوسى بۇل ەرەكشە قامقورلىقتى قاجەت ەتەتىن جانداردىڭ شىعارماشىلىق جاعىنان جۇلدىزىن جاعاتىن ورتا. مۇندا ولار دامۋ مەن جەتىلۋگە مۇمكىندىك الادى. سونىمەن قاتار جۇمىسقا ورنالاسىپ، وزدەرىنىڭ قۇقىقتارىن زاڭدى تۇردە قورعاي الاتىن دارەجەگە جەتەدى. سەبەبى، بۇل اقپاراتتىق الاڭ. مۇندا ءجۇرىپ وزدەرىنە كەرەكتى ماڭىزدى مالىمەتتەرمەن تانىسا الادى»،-دەيدى «DeFacto FM» ينكليۋزيۆتى ينتەرنەت-راديوسىنىڭ ينتەرۆيۋەرى ەرنات تولەۋعازىۇلى.
جوبا جەتەكشىلەرىنىڭ الدىعا قويعان ماقساتتى مۇگەدەكتەردى ەڭبەككە تارتۋ، ايماقتاعى جانە باسقا دا وبلىستاردىڭ مۇمكىندىكتەرى شەكتەۋلى ادامدارىنىڭ ادەبي جانە مۋزىكالىق شىعارماشىلىعىن دامىتۋ بولىپ تابىلادى.
بۇگىنگى تاڭدا راديوداعى مامان سانىن ارتتىرۋ، قاجەتتى قۇرال-جابدىقتارمەن قامتاماسىز ەتۋ ءىسى جولعا قويىلعان.
«ءبىز ارنايى گرانت ۇتىپ الدىق. وندا 1 ملن. تەڭگە قارجىلاي كومەككە يە بولدىق. سونىڭ ارقاسىندا ينتەرنەت-راديو اشتىق. بىزگە جۇمىسقا تۇرۋعا 20 شاقتى ادام كەلدى، ولاردىڭ ىشىنەن تەك 8-ءى عانا شتاتقا قابىلداندى. ءبىزدىڭ جۇمىستا كاسىبيلىكتەن بۇرىن ادامگەرشىلىك ءبىرىنشى ورىندا. ويتكەنى، مۇمكىندىگى شەكتەۋلى جاندارمەن جۇمىس جاساۋ وڭاي ەمەس»،-دەيدى «مەيىرىم» مۇگەدەكتەر قوعامدىق بىرلەستىگىنىڭ باسشىسى گۇلۆيرا نۇرحانقىزى.
بىرلەستىكتىڭ قولعا العان ءىسى مۇنىمەن تولاستار ەمەس. الداعى تاڭدا قوعامنىڭ ەرەكشە مۇشەلەرى ەڭبەك ەتەتىن سۇلۋلىق سالونى الىشماق. وسىلايشا وڭىردەگى شەكسىز مۇمكىندىككە يە ازاماتتار ءۇشىن دامۋدىڭ دارا جولى اشىلماق.
