فوتو: dimashnews.com
الەمگە تانىمال قازاقستاندىق ءانشى ديماش قۇدايبەرگەننىڭ باستاماسىمەن جانە پروديۋسەرلىك قولداۋىمەن جۇزەگە اسىپ جاتقان «Voice Beyond Horizon» مۋزىكالىق جوباسى ءوزىنىڭ العاشقى كەزەڭىنىڭ جارتىسىن ەڭسەردى. ون ەكى بولىمنەن تۇراتىن تەلەشوۋدىڭ التاۋى ەفيرگە شىعىپ ۇلگەردى، دەپ حابارلايدى "ادىرنا".
بۇعان دەيىن باعدارلاما تۇركىستان وبلىسى مەن ماڭعىستاۋ وبلىسى وڭىرلەرىن حالىقارالىق اۋديتورياعا تانىستىرسا، ەندىگى باعىت الماتى قالاسىنا اۋىستى.
جوبا كورەرمەن قىزىعۋشىلىعىن تەك كاسىبي دەڭگەيدەگى ۆوكالدىق ونەر ارقىلى عانا ەمەس، ءار شىعارىلىم سايىن ساقتالاتىن ينتريگا مەن ەرەكشە فورمات ارقىلى ۇستاپ وتىر. سونىمەن قاتار، قازاقستاننىڭ تابيعي ءارى تاريحي كورىكتى ورىندارىندا وتكەن تۇسىرىلىمدەر دە باعدارلامانىڭ تارتىمدىلىعىن ارتتىرا تۇسكەن.
تەلەۆيزيالىق رەيتينگتەر بويىنشا جوبا قاتارىنان التى رەت كوش باستاپ، تۇراقتى اۋديتوريا قالىپتاستىرا الدى. جوبانىڭ باس رەجيسسەرى لو سينسين جاڭا فورماتتىڭ باستى ەرەكشەلىگىنە توقتالىپ، ءداستۇرلى «دايىندىق – جارىس – ىرىكتەۋ» جۇيەسىنەن وزگەشە باعىت تاڭدالعانىن اتاپ ءوتتى. ونىڭ ايتۋىنشا، بۇل جوبادا قاتىسۋشىلار مەن پروديۋسەرلەر مادەني-تانىمدىق زەرتتەۋلەر بارىسىندا العان اسەرلەرىن شىعارماشىلىققا اينالدىرادى. وسى ارقىلى الدىن الا دايىندالعان قويىلىمنان گورى، ءتۇرلى مادەنيەتتەر اراسىنداعى شىنايى يمپروۆيزاتسيالىق ديالوگ ۇسىنىلادى.
سونىمەن قاتار، جوبا حالىقارالىق ىنتىماقتاستىقتىڭ جاڭا مودەلىن كورسەتىپ وتىر. رەجيسسەر «شەتەلدىك ينۆەستيتسيالار، قىتايلىق ءوندىرىس جانە جاھاندىق الماسۋ» قاعيداتىنا نەگىزدەلگەن بۇل ءتاسىل مادەني بايلانىستى جاڭا دەڭگەيگە كوتەرەتىنىن ايتتى.
Hunan TV مالىمەتىنشە، «Voice Beyond Horizon» جوباسى Mango TV ۇسىنعان «لوكاليزاتسيالانعان بىرلەسكەن شىعارماشىلىق» باعىتىنداعى ماڭىزدى جوبالاردىڭ قاتارىنا ەنگەن. الداعى ۋاقىتتا باعدارلاما گەوگرافياسىن قىرعىزستان، وزبەكستان جانە ورتالىق ازيانىڭ وزگە ەلدەرىنە كەڭەيتۋ جوسپارلانۋدا. بۇل باستاما جىبەك جولى بويىنداعى ەلدەر اراسىنداعى مادەني بايلانىستى نىعايتۋعا باعىتتالعان.
ينتەرنەت كەڭىستىگىندە جوباعا قاتىستى 200-دەن استام ترەندتىك تاقىرىپ تىركەلىپ، ونىڭ كەڭ اۋديتورياعا اسەرى ايقىن بايقالدى.
ءتۇسىرىلىم جۇمىستارى دا اۋقىمدى كولەمدە ۇيىمداستىرىلعان. 22 كۇنگە سوزىلعان پروتسەسس بارىسىندا قازاقستاننىڭ بىرنەشە قالاسى مەن وڭىرلەرىندەگى تابيعي جانە تاريحي نىساندار قامتىلدى. نەگىزگى شىعارماشىلىق توپپەن قاتار، قوسىمشا جۇزدەن استام مامان لوگيستيكا مەن ۇيىمداستىرۋ جۇمىستارىن قامتاماسىز ەتكەن.
اسىرەسە، ەرەكشە لوكاتسيالاردا - كول ورتاسىنداعى ارالدا، كاسپي تەڭىزى جاعالاۋىندا جانە قارلى تاۋلى ايماقتاردا - ساحنالىق الاڭدار قۇرۋ مەن دىبىستىق ساپانى ساقتاۋ نەگىزگى مىندەتتەردىڭ ءبىرى بولدى. بۇل ءۇشىن ارنايى تەحنيكالىق شەشىمدەر مەن توتەنشە جاعدايلارعا ارنالعان جوسپارلار ازىرلەنگەن.
جوبا بارىسىندا مادەني ايىرماشىلىقتاردى ەسكەرۋ، كوپتىلدى ورتادا جۇمىس ىستەۋ جانە جەرگىلىكتى داستۇرلەردى ساقتاۋ دا باستى نازاردا بولدى. ناتيجەسىندە، باعدارلاما كورەرمەنگە تەك ۆيزۋالدى مازمۇن ەمەس، مادەنيەتتى تەرەڭ سەزىنۋگە مۇمكىندىك بەرەتىن ءونىم رەتىندە ۇسىنىلدى.
بۇل جوبا ءتۇرلى ەلدەردىڭ رەسمي قۇرىلىمدارىنىڭ دا قىزىعۋشىلىعىن تۋدىردى. قىتايدىڭ قازاقستان، مالايزيا، يتاليا، قىرعىزستان جانە سەربياداعى ەلشىلىكتەرى باعدارلامانى وزدەرىنىڭ رەسمي پلاتفورمالارىندا بىرنەشە رەت جاريالاپ، «ەرەكشە ۇسىنىلاتىن كونتەنت» رەتىندە تانىستىردى. قازاقستاننىڭ قىتايداعى ەلشىلىگى دە جوبانى قولداپ، اقپاراتتىق ماتەريالدار تاراتقان.
سونىمەن قاتار، قازاقستان پرەزيدەنتى قاسىم-جومارت توقاەۆ جوباعا قۇتتىقتاۋ حات جولداپ، ونىڭ ەكى ەل اراسىنداعى مادەني جانە دوستىق بايلانىستاردى نىعايتۋداعى ماڭىزىن اتاپ ءوتتى.
