قازاقستاننىڭ حالىق سانى 19 ميلليونعا جۋىقتادى

1374

قازاقستان حالىق سانى 19 ميلليونعا جۋىقتادى. بۇل تۋرالى ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسى مالىمدەدى، دەپ حابارلايدى "ادىرنا" ۇلتتىق پورتالى دەرەككوزگە سىلتەپ.

"2021 جىلى 1 ناۋرىزدا ەلىمىزدەگى حالىق سانى 18 917,2 مىڭ ادام بولدى, ونىڭ ىشىندە قالالىقتار - 11 187, 2 (59,1 پايىز), اۋىلدىقتار - 7 730,0 ادام (40,9 پايىز).

2020 جىلعى 1 ناۋرىزبەن سالىستىرعاندا حالىق سانى 245,3 مىڭ ادامعا نەمەسە 1,3 پايىزعا ءوستى", - دەپ حابارلادى ۆەدومستۆوداعىلار.

بيىل قاڭتار-اقپاندا رەسپۋبليكا حالقىنىڭ تابيعي ءوسىمى 2020 جىلعى قاڭتارمەن سالىستىرعاندا (42,0 مىڭ ادام) 0,2 پايىز ءوسىپ، 42,1 مىڭ ادام بولدى. تابيعي ءوسىمنىڭ جالپى كوەففيتسيەنتى 1000 ادامعا شاققاندا 13,71 ادام.

تۋ جانە ءولىم كورسەتكىشى

احات ورگاندارى ۇسىنعان ازاماتتىق حال اكتىلەرى جازبالارىنداعى مالىمەتتەردى وڭدەۋ ناتيجەسىندە، 2021 جىلعى قاڭتار-اقپاندا تۋعاندار سانى 65,7 مىڭ ادامدى قۇرادى، بۇل 2020 جىلعى قاڭتار-اقپانعا (64,7 مىڭ ادام) قاراعاندا 1,6 پايىزعا كوپ. تۋدىڭ جالپى كوەففيتسيەنتى 1000 ادامعا 21,41 ءسابي.

قاراستىرىلىپ وتىرعان كەزەڭدە قايتىس بولعاندار سانى 23,7 مىڭ ادام, بۇل 2020 جىلعى قاڭتار-اقپانعا (22,7 مىڭ ادام) قاراعاندا 4,2 پايىز كوپ. ءولىم-ءجىتىمنىڭ جالپى كوەففيتسيەنتى 1000 ادامعا 7,70.

2021 جىلعى قاڭتار-اقپاندا رەسپۋبليكادا 1 جاسقا دەيىن شەتىنەگەن 517 نارەستە تىركەلدى. 2020 جىلعى ءتيىستى كەزەڭمەن سالىستىرعاندا (583 شەتىنەگەن نارەستە) 11,3 پايىزعا ازايدى. نارەستە ءولىم-ءجىتىمىنىڭ كوەففيتسيەنتى 1000 تۋعاندارعا شاققاندا 7,86 وقيعا.

حالىقتىڭ كوشى-قونى

كوشى-قون قىزمەتى ورگاندارى ۇسىنعان مالىمەتتەردى وڭدەۋ ناتيجەسىندە، 2021 جىلى قاڭتار-اقپاندا ەلىمىزگە تۇرعىلىقتى تۇرۋعا كەلىپ، تىركەلگەندەر سانى 1 398 ادام، ەلىمىزدەن كەتكەندەر سانى 3 422 ادام، كوشى-قون ايىرىمى - 2 024 ادام ەكەنى بەلگىلى بولدى.

ەل ىشىندە قونىس اۋداراتىن كوشىپ-قونۋشىلار سانى 19,7 پايىزعا كەمىدى. وڭىرارالىق قونىس اۋدارۋ بويىنشا حالىق كوشى-قونىنىڭ وڭ ايىرىمى ەلىمىزدىڭ 4 وڭىرىندە بايقالدى: الماتى (5 834 ادام), شىمكەنت (4 842ادام), نۇر-سۇلتان (4 516 ادام) قالالارىندا جانە ماڭعىستاۋ وبلىسىندا (216 ادام).

"ادىرنا" ۇلتتىق پورتالى

پىكىرلەر
ۇقساس جاڭالىقتار