پرەزيدەنت قاسىم-جومارت توقاەۆ پەن پاكىستان پرەمەر-ءمينيسترى شاحباز شاريف ەكى ەل اراسىندا ستراتەگيالىق سەرىكتەستىك ورناتۋ تۋرالى بىرلەسكەن دەكلاراتسياعا قول قويدى. بۇل تۋرالى بۇگىن، 4 اقپاندا اقوردا جازدى، دەپ حابارلايدى «ادىرنا» ءتىلشىسى.
مەملەكەت باسشىسى حالىقارالىق ساحناداعى بەدەلى بيىك باۋىرلاس پاكىستانعا كەلگەنىنە قۋانىشتى ەكەنىن جەتكىزدى.
«پاكىستان – قازاقستاننىڭ وڭتۇستىك ازياداعى جانە ودان تىسقارى جەرلەردەگى سەنىمدى ءارى ماڭىزدى سەرىكتەسى. حالىقتارىمىزدى ۇلى جىبەك جولىنان باستاۋ العان تاعدىرلى بايلانىس پەن مادەني-رۋحاني ساباقتاستىق جالعاپ كەلەدى. بۇگىن قادىرلى پرەمەر-مينيستر مىرزامەن تاريحي قۇجاتقا – قازاقستان مەن پاكىستان اراسىندا ستراتەگيالىق سەرىكتەستىك ورناتۋ تۋرالى بىرلەسكەن دەكلاراتسياعا قول قويدىق. بۇل قۇجات ءوزارا بايلانىستاردى جاڭا دەڭگەيگە كوتەرۋگە، سونداي-اق ەكىجاقتى جانە كوپجاقتى كۇن ءتارتىبىنىڭ بارلىق سپەكترى بويىنشا ىنتىماقتاستىقتى كەڭىنەن دامىتۋعا جول اشادى. ەلدەرىمىز اراسىنداعى دوستىق قاتىناستاردى جانە ءوزارا ءتيىمدى ىقپالداستىقتى تەرەڭدەتۋگە پاكىستان پرەمەر-ءمينيسترى شاحباز شاريف ايتارلىقتاي زور ۇلەس قوستى. سول ءۇشىن وعان العىس ايتامىن»،- دەدى ول.
قاسىم-جومارت توقاەۆ شاحباز ءشاريفتى ەلىن العا باتىل باستاعان كورەگەن كوشباسشى دەپ اتادى. ونىڭ كەلەشەككە باعدارلانعان ساليقالى ساياسات جۇرگىزۋىنىڭ ارقاسىندا يسلامابادتىڭ ايماقتاعى جانە الەمدەگى بەدەلى جىلدان جىلعا ارتىپ كەلەدى.
«بىلتىر پاكىستان بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. ەلدىڭ سىندارلى ءارى جاۋاپتى قادامدارى ايماقتاعى بەيبىتشىلىك پەن تۇراقتىلىقتى نىعايتۋعا سەپتىگىن تيگىزدى. پاكىستاننىڭ ەكونوميكالىق الەۋەتى زور، ونەركاسىپتىك بازاسى دامىعان، كولىك-ترانزيت مۇمكىندىكتەرى مول. پاكىستاننىڭ اۋىل شارۋاشىلىعى، جەڭىل ونەركاسىبى، مەديتسينا ونىمدەرى حالىقارالىق نارىقتا كەڭىنەن تارالعان. اسكەري-ونەركاسىپتىك كەشەنىنىڭ سەرپىندى دامۋى الەمدىك دەڭگەيدە تانىلعان. دوستاس حالىقتىڭ ءتۇرلى سالالارداعى ءاربىر جەتىستىگىنە شىن جۇرەكتەن ريزامىز، سىزدەرگە ءاردايىم تىلەكشىمىز»،-دەدى قازاقستان پرەزيدەنتى.
ايتا كەتەيىك، كەلىسسوزدەر بارىسىندا ساۋدا-ەكونوميكالىق بايلانىستارعا، ينۆەستيتسيالارعا جانە كولىك-لوگيستيكالىق ءوزارا بايلانىسقا ەرەكشە نازار اۋدارىلدى.
