قازاقستاننان ءبىلىم ميگراتسياسىن قالاي توقتاتۋعا بولادى؟

3893
Adyrna.kz Telegram

سوڭعى جىلدارى قازاقستاندىق تۇلەكتەر جاپپاي شەتەل اسۋدا. كورشىلەس رەسەيدىڭ وزىندە عانا 70 مىڭنان استام تۇلەك ءبىلىم الىپ جاتىر. ساراپشىلاردىڭ ايتۋىنشا، وتاندىق جوعارى وقۋ ورىندارى رەسەيلىك ۋنيۆەرسيتەتتەردەن كەم ەمەس. وسى ورايدا، ءبىلىم ميگراتسياسىن قالاي توقتاتۋعا بولاتىنى تۋرالى اكادەميالىق ادالدىق ليگاسى جالپى جينالىسىنىڭ مۇشەسى تالعات نارىكباەۆ مالىمدەدى.

ستۋدەنتتەردىڭ شەتەلگە كەتۋىنىڭ نەگىزگى سەبەبى — شەت ەلدەردە ءبىلىم ساپاسى جوعارى دەگەن پىكىر ءارى وتاندىق جوو-لارعا دەگەن سەنىمسىزدىك. ءبىلىم مەن تۇراتىن ورىن تەگىن بولعاندىقتان قازاقستاندىقتار رەسەيدى تاڭدايدى.
بىراق ول جاقتا ءبارى ءبىز ويلاعانداي كەرەمەت ەمەس.

«رەسەيدىڭ ءبىلىمى ساپالى دەگەن ستەرەوتيپكە مەنىڭ كۇمانىم بار. نەگىزىندە جوعارى دەڭگەيلى ۋنيۆەرسيتەتتەرى ماسكەۋ مەن سانكت-پەتەربۋرگتە شوعىرلانعان. ال باسقا وقۋ ورىندارىنىڭ كوپشىلىگى ساپالى ءبىلىم بەرمەيدى، كەيبىرى تىپتەن ناشار»،- دەيدى م.س. نارىكباەۆ اتىنداعى كازگيۋ ۋنيۆەرسيتەتىنىڭ باسقارما باسشىسى.

ونىڭ ايتۋىنشا، ەلىمىزدەن كەتۋگە تىيىم سالۋ مۇمكىن ەمەس، بىراق مەملەكەت ازامتتاردىڭ قالۋى ءۇشىن بار جاعدايدى جاساۋى قاجەت.

«ارينە، ءاربىر جاس باي، تابىستى، كاسىبي مامان بولعىسى كەلەدى. سول سەبەپتى جاستاردى ەلىمىزدەن كەتكىسى كەلمەس ءۇشىن مەملەكەت ولارعا بارلىق جاعدايدى جاساۋى ءتيىس، ەڭبەك نارىعىندا جالاقى مولشەرى جوعارى بولۋى قاجەت. سونداي-اق مامانداردى جۇمىسقا الۋ پروتسەسى اشىق جۇرگىزىلۋى كەرەك. جاستار جۇمىسقا تانىسى، تۋىسى ارقىلى ەمەس، كاسىبي بىلىكتىلىگىنىڭ ارقاسىندا ادال جولمەن ورنالاسۋى ءتيىس»، - دەپ قورىتىندىلادى تالعات نارىكباەۆ.
كوروناۆيرۋستىق پاندەمياعا بايلانىستى ەلدەر اراسىنداعى قوزعالىس شەكتەۋلى بولعانىنا قاراماستان، قازاقستاندا وقىعىسى كەلەتىن شەتەلدىكتەردىڭ سانى ارتىپ كەلەدى. ماسەلەن، 2020 جىلى ەلىمىزدە ءبىلىم الىپ جاتقان شەتەلدىك ستۋدەنتتەر سانى 34 452 ادامدى قۇرادى.
انىقتاما. اكادەميالىق ادالدىق ليگاسى - بۇل 11 جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدار بىرلەستىگى. ءبىلىم بەرۋ ساپاسىن ارتتىرۋ جانە اكادەميالىق ادالدىق پرينتسيپتەرىن قولداۋ ليگانىڭ ميسسياسى بولىپ سانالادى.

اكادەميالىق ادالدىق ليگاسىنىڭ ءباسپاسوز قىزمەتى

پىكىرلەر