قازاقتىڭ ەڭ ۇزدىك وقۋشىلارى اقش-تىڭ جوعارى بەدەلگە يە اقىلى مەكتەپتەرىنە جولداما الدى. وسى جولى 5 ۇزدىك شاكىرت قازاقستاندىق ءبىلىم مەنەدجەرى عابيت بەكاحمەتوۆ پەن امەريكاندىق فيلانتروپ وليۆەر گرەيس ۇسىنعان 2 جىلدىق شاكىرتاقىعا يە بولدى.
“Oliver Grace Scholars Program” دەپ اتالاتىن ول گرانت وقۋ اقىسىن، جاتاقحاناعا تۇرۋدى، اس-سۋىن، مەديتسينالىق ساقتاندىرۋدى، وقۋ قۇرالدارىن جانە اقش-قا جىلىنا 2 رەت بارىپ-قايتۋ شىعىنىن قامتيدى.
اقشالاي بالاماسى – ەكى جىلعا ءار بالاعا $160 مىڭ دوللار، ياعني شامامەن 80 ملن تەڭگە.
ەراسىل. ارىستان. ءالىمجان. قازاقتىڭ ءبىلىمدى دە دارىندى وقۋشىلارىنىڭ ىشىندە بيىل وزا شاۋىپ، اقش-تىڭ Salisbury School جەكەمەنشىك مەكتەبىنىڭ وليۆەر گرەيس اتىنداعى 2 جىلدىق گرانتىن ۇتىپ العان ۇلاندار – وسىلار.
بىلتىر ارنايى شاكىرتاقىعا العاش رەت مۇقاعالي، ميراس جانە ايدار اتتى قازاق جاستارى يە بولعان ەدى. ولار وسى وقۋ جىلىن اياقتاعان سوڭ، قولدارىنا حالىقارالىق ستاندارتتاعى اتتەستاتتارىن الماق. 
2025/2026 وقۋ جىلىندا Salisbury مەكتەبىندە اكادەميالىق ۇلگەرىمى بويىنشا ەڭ ۇزدىك ءۇش وقۋشىنىڭ ەكەۋى ءبىزدىڭ بالالار بولعانى – زور ماقتانىش.
تابيعاتى عاجايىپ، 300 گەكتار جەردە ورنالاسقان، 300 وقۋشىعا ارنالعان جەكەمەنشىك ءبىلىم ورداسى – اقش-تىڭ ۇزدىك اقىلى مەكتەپتەرىنىڭ ءبىرى. نيۋ-يورك جانىنداعى كوننەكتيكۋت شتاتىندا ورنالاسقان. 1901 جىلى نەگىزى قالانعان ول، بيىل 125 جىلدىعىن اتاپ وتپەك. 9-12 سىنىپ وقۋشىلارىن ينتەللەكتۋالدىق، فيزيكالىق، مورالدىك جانە رۋحاني تۇرعىدان بارىنشا دامىتىپ، اقش-تىڭ ۇزدىك ۋنيۆەرسيتەتتەرىنە تۇسۋگە جاقسىلاپ دايىندايدى. ءدال قازىر وندا 49 ەلدەن جانە اقش-تىڭ 40 شتاتىنان كەلگەن بالالار وقيدى، ونىڭ 6-ۋى قازاقتار. ال سونىڭ 5-ءۋى نزم ءتالىمىن الىپ، شىڭدالعان.
اقش-تىق فيلانتروپ وليۆەر گرەيس نە سەبەپتى ءوزى كەزىندە وقىپ كەتكەن مەكتەپكە جىل سايىن ناقتى 3 قازاقتىڭ ۇلىنا گرانت بولەمىن دەپ شەشتى؟ ءبارى دە 25 جىل بۇرىن باستالعان. قاراعاندىداعى قازاق-تۇرىك ليتسەيىنىڭ العىر وقۋشىسى عابيت بەكاحمەتوۆ مەكتەپ بىتىرگەن سوڭ، ارمان قۋىپ، اقش-قا اتتانادى. سولتۇستىك كارولينا شتاتىنداعى 1838 جىلى نەگىزى قالانعان تاڭداۋلى Duke ۋنيۆەرسيتەتىنە تمد مەملەكەتتەرىنەن شىققان دارىندى ستۋدەنتتەرگە ارنالعان وليۆەر گرەيس شاكىرتاقىسىمەن وقۋعا ءتۇسىپ، ونى ءساتتى اياقتايدى. 
بۇگىندە عابيت بەكاحمەتوۆ – قازاقستاننىڭ بىلىكتى ءبىلىم مەنەدجەرى، ء“بىلىم كەمەلەرى: نزم، بيل، رفمم”، “بارساكەلمەس” سياقتى بىرنەشە كىتاپتىڭ اۆتورى، زاماناۋي جەكەمەنشىك مەكتەپتەردىڭ نەگىزىن قالاۋشى.
عابيت قايراتۇلىنىڭ قانداي مىقتى ازامات بولىپ قالىپتاسقانىن كورگەن وليۆەر مىرزا ءدال قازاقستاننىڭ جاستارىن قولداۋدى جالعاستىرامىن دەپ شەشكەن. Salisbury مەكتەبىن 1972 جىلى بىتىرگەن تۇلەك رەتىندە، 2025 جىلى ع.بەكاحمەتوۆپەن بىرلەسە جاريالاعان جاڭا باعدارلامانى ىسكە قوسقان. 200-300 ۇمىتكەردەن 3 بالا ىرىكتەلەدى. ول ءۇشىن ساناتقا ساي ءاربىر ۇمىتكەر ۇلگەرىمى مەن جەتىستىگى بويىنشا سىنعا ءتۇسىپ، اڭگىمەلەسۋدەن وتەدى.
بىلتىر تەك ۇلدار مەكتەبىنە تاڭدالعان كەزدە، قىزدارىن دا ءبىلىم دوداسىنا قاتىستىرعىسى كەلگەن قازاق اتا-انا كوپ بولعان. عابيت بەكاحمەتوۆ وليۆەر مىرزامەن كەلىسىپ، ۆاشينگتون جانىنداعى Episcopal High School جەمەنشىك مەكتەبىنە قازاق قىزدارىنا دا ارناپ بيىل العاشقى 2 گرانتتى بولگىزدى. الماتىلىق ءاسيا مەن ايبيكە قاتارلاستارىنان وزا شاۋىپ، بىرنەشە كۇن بۇرىن جاڭا ەلدەگى ساباقتارىن باستاپ كەتتى. ءبىر ايتا كەتەرلىگى، ول ەكەۋى دە وسىعان دەيىن الماتىداعى نزم-دە وقىعان. 
قازاقتىڭ دارىندى ۇل-قىزدارى ءبىلىم دوداسىندا الەمنىڭ ۇزدىكتەرى بولۋعا ابدەن لايىقتى. ەل بولاشاعىن سونداي جاستار جارقىن ەتپەك. ال ءبىلىمدى تۋ ەتكەن كەلەسى ۇمىتكەر ۇل-قىز دايىندىقتى بۇگىننەن باستاي بەرسە بولادى.
باعدارلامانى ۇيىمداستىرۋشىلار الداعى ۋاقىتتا ءبىلىمدى ءارى تالانتتى قازاقستاندىق جاستاردى قولداۋدى جالعاستىرۋدى كوزدەپ وتىر.
الما سايلاۋقىزى
