"ادىرنا" ۇلتتىق پورتالىنا م.س. نارىكباەۆ اتىنداعى KAZGUU ۋنيۆەرسيتەتى قۇقىق جوعارى مەكتەبىنىڭ زاڭ عىلىمدارىنىڭ كانديداتى، قۇقىق جوعارى مەكتەبىنىڭ دوتسەنتى - كۋدياروۆا ۋلبالا ەرزاتوۆنا سۇحبات بەردى.
- ۋلبالا حانىم، جالپى بارىمىزگە ءمالىم قازاقستاننىڭ اتا زاڭى 1995 جىلى بۇكىلحالىقتىق رەفەرەندۋمدا قابىلداندى. وسى ارالىقتا، كونستيتۋتسياعا 1100 رەت تولىقتىرۋلار مەن تۇزەتۋلەر ەنگىزىلدى. سونىمەن قاتار ءۇش كونستيتۋتسيالىق رەفورما جاسالدى. قالاي ويلايسىز، ەلىمىزدىڭ باستى قۇجاتى تاعى دا وزگەرتۋلەردى قاجەت ەتە مە؟ ەلىمىزدىڭ قانداي زاڭدىق جۇيەسىنە تولىقتىرۋلار ءالى دە كەرەك دەپ ويلايسىز؟
- بارشامىز بىلەتىندەي، 1993 جىلى 28 قاڭتاردا تاۋەلسىز جاس مەملەكەت - قازاقستان العاشقى كونستيتۋتسياسىن قابىلدادى. بۇل كونستيتۋتسيا 1995 جىلى 30 تامىزدا جاڭا نۇسقاسى قابىلدانعانعا دەيىن قولدانىستا بولدى. سوڭعى بەكىتىلگەن كونستيتۋتسيالىق ەرەجەمەن قازىر ءبىز ءومىر سۇرۋدەمىز، سول قاعيدا بويىنشا قادام باسۋدامىز. اتا زاڭىمىز 9 بولىمنەن جانە 98 باپتان تۇرادى. وندا جالپى ەرەجەلەر; ادام جانە ازامات; پرەزيدەنت; پارلامەنت; ۇكىمەت; كونستيتۋتسيالىق كەڭەس; سوتتار جانە سوت تورەلىگى; جەرگىلىكتى مەملەكەتتىك باسقارۋ جانە ءوزىن-ءوزى باسقارۋ; قورىتىندى جانە وتپەلى ەرەجەلەر قامتىلعان. بۇل بولىمدەر مەملەكەتتىڭ قۇرىلىمىنا جانە حالىقتىڭ مۇددەسى ءۇشىن جاسالعان نورمالاردىڭ جيىنتىعى. مەنىڭ ويىمشا، بۇل كونستيتۋتسيا وتە دۇرىس جازىلعان جانە ەلىمىزدىڭ باستى قۇجاتىنا تۇزەتۋلەردىڭ ەنگىزىلۋى بۇل – قالىپتى جاعداي. سەبەبى، زامان اعىمىنا قاراي مەملەكەت ءبىر جەردە، ءبىر ورىندا، دامىماي تۇرىپ قالمايدى عوي. ونىڭ وركەندەۋىنە،وسۋىنە سايكەس مەملەكەتتىك زاڭ دا وزىندىك وزگەرتۋلەرگە يە بولۋى، ونىڭ تولىقتىرىلۋى ورىندى دەپ بىلەمىز. «وركەنيەتتى ەل» مەملەكەتتەر قاتارىنا قوسىلۋىمىزعا بايلانىستى كونستيتۋتسياداعى ەرەجەلەردىڭ وزگەرتۋلەر، تۇزەتىلىمدەر ەنگىزىلۋى زاڭي تۇرعىدان ول – دۇرىس. سونىمەن قاتار، بايقاعان بولساق قانداي بولماسىن وزگەرتۋلەر ەنگىزىلسە دە ول ءبىزدىڭ مەنتاليتەتكە سايكەس كەلىپ جاتىر جانە تەك حالىقتىڭ مۇددەسى ءۇشىن جاڭا نۇسقاعا بەت بۇرۋدا. بالكىم ءالى دە تولىقتىرۋلار ورىن الار، دەگەنمەن دە كونستيتۋتسيا وتە دۇرىس جازىلعان. ەڭ باستىسى حالىقتىڭ مۇددەسى تولىق قامتىلعان. ول تۋرالى «ادام جانە ادامزات» بولىمىندە ايتىلادى.
ءوزىڭىز ايتقانداي، 1100 رەت تولىقتىرۋلار جاسالسا دا، بۇل قايتا حالىقتىڭ مۇددەسىنە نەگىزدەلىپ جاسالعان ءىس. بيىل تاۋەلسىزدىگىمىزگە 30 جىل تولماق. وسى جىلدىڭ ىشىندە وزگەرتۋلەرگە يە بولعان اتا زاڭىمىز، كەيىن دە ەلىمىز دامىعان سايىن، مەملەكەتتىك زاڭىمىز دا جاڭارىپ، جاندانىپ وتىرعانى دۇرىس.
- زاڭ جوبالارى مەن مەملەكەتتىك ورگاندار قابىلدايتىن شەشىمدەر حالىقتىڭ پىكىرىمەن ساناسقانى دۇرىس پا؟ سوڭعى ورىن العان جاعداي بويىنشا حالىق تۇرمىستىق زورلىق-زومبىلىق زاڭىنا قاتىستى پىكىر بىلدىرگەن ەدى. بۇعان مەملەكەت قۇلاق استى ما؟
- ءيا بارىمىزگە ءمالىم، ءححى عاسىردا Facebook,Instagram جانە وزگە دە الەۋمەتتىك جەلىلەردىڭ دامىعان ۋاقىتىندا، كوبىنە وسى Facebook-تا حالىقتىڭ تاراپىنان تۇرمىستىق زورلىق-زومبىلىققا قاتىستى سان ءتۇرلى اعىمداعى، سان ءتۇرلى كوزقاراستاعى پىكىرلەر ايتىلدى. دەگەنمەن دە، زاڭ شىعارۋشى ورگانداردى، اسىرەسە مەملەكەتتىك ورگانداردىڭ شەشىم شىعارۋىن، حالىقپەن ساناسۋ، ساناسپاۋىندا دەپ تۇسىنبەۋ كەرەك. قانداي جاعداي بولماسىن، مەملكەتتىك ورگانداردىڭ شەشىمى حالىقتىڭ مۇددەسىنە، حالىقتىڭ ەكونوميكالىق تۇرعىدان وسۋىنە جۇمسالاتىندىعى ءسوزسىز.
زاڭعا قاتىستى ايتار بولساق، بەلگىلى ءبىر زاڭ نورمالارىنىڭ حالىقتىڭ ويىمەن، پىكىرىمەن ساناسقانى دۇرىس. بىراق، زاڭدى قابىلدار الدىندا ەڭ الدىمەن تەورەتيكتەر مەن عالىمداردىڭ پىكىرى، دالەلدەمەلەرى قارالادى. ول – اۋادان الا سالاتىن نارسە ەمەس. يا بولماسا، باسقا مەملەكەتتەردىڭ بەلگىلى ءبىر زاڭ نورمالارىن، ءبىزدىڭ مەنتاليتەتكە ساي كەلۋ، كەلمەسىنە قاراماستان ءبىز ونى الىپ كوشىرە الا المايمىز. كەز-كەلگەن زاڭ شىقپاس بۇرىن، ءبىرىنشى تەوريالىق تۇرعىدان قاراستىرىلىپ، ودان سوڭ تاجىريبەلىك تۇرعىدا قالاي ىسكە اسادى دەگەن سەكىلدى ءتۇرلى كوزقاراستار مەن تالقىلاۋعا ءتۇسىپ، ۇسىنىس رەتىندە پارلامەنتكە بارادى. دەي تۇرعانمەن، كەز-كەلگەن ءىستىڭ «اتتەگەن-اي» دەيتىن تۇسى بولاتىنى راس. ونسىز بولماس. ولقىلىقتار ورىن الىپ جاتقاندا، مەملەكەت قاشان دا حالىقتىڭ پىكىرىن اشىق تۇرعىدان تىڭداۋعا، قاراستىرۋعا قارسىلىق ەشقاشان تانىتپاعان. مىسالى، وسى تۇرمىستىق زورلىق-زومبىلىق زاڭىنا بايلانىستى Facebook جەلىسىندە حالىق تاراپىنان كوپتەگەن پىكىرلەر ايتىلدى. ولاردىڭ بىرقاتارىن وقىپ شىقتىم. قازىرگى تاڭدا، كەيبىر زاڭنىڭ كەم-كەتىك تۇستارىنا حالىقتىڭ كوڭىلى تولماعان جاعدايدا كەز-كەلگەن ازامات ءوز ويىن اشىق ايتا الاتىن مۇمكىندىگى بار. سايكەسىنشە، ەلىمىز ايتىلعان پىكىرلەردى وڭ كوزقاراسپەن قابىلداپ، ءتيىستى شارالار جۇرگىزدى. مەنىڭ ويىمشا، بولىپ جاتقان كەيس، سيتۋاتسيالار، وسىنداي جاعدايلاردىڭ ورىن الۋى – دۇرىس. قازىرگى تاڭدا مەملەكەت ەل الدىندا ءاربىر زاڭنىڭ ناتيجەسى مەن ىسكە اسۋ بارىسى جونىندە ەسەپ بەرىپ ءجۇر، بەرىلەدى دە. نارازىلىق تۋىنداعان جاعدايدا، كونستيتۋتسيادا جازىلعان قۇقىق بويىنشا حالىق ءوز ويىن اشىق ءارى نەگىزدەلگەن تۇردە ايتا الادى. بۇدان ءبىز زاڭ شىعارۋشى ورگاننىڭ حالىقتىڭ پىكىرىمەن ساناساتىندىعىن اڭعارا الامىز.
- مەملەكەت ازاماتتارىنىڭ قۇقىقتىق سانا دەڭگەيىن كوتەرۋ ءۇشىن، جالپى ءوز قۇقىعىن ءبىلۋ تۇرعىسىندا قانداي ارەكەتتەر جاسالۋى ءتيىس دەپ ويلايسىز؟
- ەڭ الدىمەن قۇقىقتىق ساۋاتتىلىق، قۇقىقتىق سانا دەڭگەيى جوعارى بولۋى ءۇي تاربيەسىنەن، وتباسىدان باستالادى. كىشكەنتايدان دۇرىس تاربيەلەنۋى، دۇرىس جانە بۇرىس دۇنيەلەر جايلى ايتىلۋى، قانداي دا ءبىر ماڭىزدى زاڭ بار ەكەنىن، زاڭ اياسىندا بارلىق ءىستىڭ قارالاتىندىعىن، ەڭ قاراپايىمىن العاندا بالانىڭ باعدارشامنان دۇرىس ءوتۋى تۋرالى بەرىلەتىن تاربيەنىڭ ءوزى – وتباسىدان باستالادى. كەيىن مەكتەپ قابىرعاسىندا ءپان رەتىندە «قۇقىقتانۋ»، «ادام.قوعام.قۇقىق» سىندى پاندەردىڭ قوسىلۋى ارقىلى قۇقىقتىق ساۋاتتىلىق دەڭگەيى كوتەرىلە باستايدى.
قاراپايىم مىسال رەتىندە ايتار بولساق، حح عاسىردىڭ كەزىندە بىزدە Facebook جەلىسى جوق ەدى. سول ۋاقىتتاردا، وسيەت جازۋدى كوپشىلىك قولعا الا بەرمەيتىن، ءجيى جازىلمايتىن. تۇلعا قايتىس بولسا، زاڭ بويىنشا عانا مۇلىك تابىستالاتىن. ال وسيەت جازاتىندار تەك بىرەن-ساران بولاتىن. قازىرگى تاڭدا كەرىسىنشە. وتكەن جولى تۇرمىستىق زورلىق-زومبىلىق تۋرالى زاڭ بويىنشا پىكىر بىلدىرگەن جاننىڭ كوبىسى زاڭنىڭ اۋىلىنان الىس، قۇقىقتانۋ ءبىلىمىن الماعان كىسىلەر. ولار تەك جەتكىلىكتى تۇردە، ءوز ويلارىن ساۋاتتى ءتۇسىندىرىپ بەردى. بارىنشا حالىق پىكىر ءبىلدىرۋ بارىسىندا، ارنايى ءبىلىم الماسا دا مىسال كەلتىرە وتىرىپ، ءوز نارازىلىعىن نەگىزدەلگەن كۇيى اشىق جەتكىزە ءبىلدى. پىكىر بىلدىرگەن حالىقتىڭ ويىنان بايقايتىنىمىز – جاستاردىڭ، ءححى عاسىر جاستارىنىڭ كوكىرەگى وياۋ، كوزى اشىق ەكەندىگى. دەگەنمەن دە، قازىر ەل ازاماتتارى الاياقتارعا كوپ الدانۋدا. باق وكىلدەرىنەن ءجيى ەستيمىز، قانداي دا ءبىر بانك اتىنان جەكە تۇلعانىڭ كارتالىق ءنوىمىرى ارقىلى بارلىق اقپاراتتاردى ءبىلىپ الۋ ماقساتىندا كوپتەگەن الاياقتىق ىستەر ورىن الۋدا. ويىن رەتىندە ۇيىمداسقان الاياقتىق توپتىڭ ويى، وكىنىشكە وراي حالىقتىڭ قۇقىقتىق سانا دەڭگەيى تومەندەۋ بولعاندىقتان ىسكە استى. حابارلاسىپ اقپاراتتار سۇراسا، اشىق تۇردە جاۋاپ بەرىپ، كەيىننەن بانك كارتاسىنداعى بۇكىل سومادان ايىرىلىپ قالعان جانداردى دا كەزىكتىردىك. الايدا، حالىق الدانىپ قالسا دا سوتقا بارىپ شاعىمدانىپ، سىزدەرگە ياعني جۋرناليستەرگە ءوز مۇڭىن شاعىپ ايتىپ جاتىر. بۇل جاعىنان الساق حالىقتىڭ قۇقىقتىق سانا دەڭگەيى حح عاسىرمەن سالىستىرعاندا جوعارىلاعان دەۋگە كەلەدى. دەي تۇرعانمەن ءالى دە، مەملەكەت ازاماتتارىنىڭ قۇقىقتىق ساۋاتتىلىعىنا مەكتەپتەردە، جوو-دا دا كوڭىل ءبولىنۋى قاجەت.
- سوت جۇيەسىندەگى رەفورمالاردىڭ مازمۇنى قانداي بولىپ كەلەدى؟ جالپى، سوت جۇيەسىنە ەنگىزىلگەن جاڭا رەفورمالار ءوز ماقسات-مۇددەسى بويىنشا قالاي جۇمىس ىستەۋدە؟
- سوت جۇيەسىن رەفورمالاۋعا بىردەن-ءبىر سەبەپ، بۇل ەلباسىمىزدىڭ سوت جۇيەسىن جەتىلدىرۋگە باعىتتالعان يدەياسىنان تۋىندادى. وعان قر پرەزيدەنتىنىڭ 2015 جىلعى 20 مامىرداعى «100 ناقتى قادام» باعدارلاماسى نەگىز بولىپ تابىلادى. وسى باعدارلامانىڭ ەكىنشى ءبولىمى زاڭنىڭ ۇستەمدىگىن قامتاماسىز ەتۋگە باعىتتالعان. ياعني، وندا ازاماتتاردىڭ سوت تورەلىگىنە قولجەتىمدىلىگىن جەڭىلدەتۋ ءۇشىن، سوت جۇيەسى ينستانتسيالارىن وڭتايلاندىرۋ. سونىمەن قاتار سۋديا لاۋازىمىنا كانديداتتاردى ىرىكتەۋ تەتىكتەرىن كوبەيتۋ جانە بىلىكتىلىگىن، تالاپتارىن قاتايتۋ، مىندەتتى تۇردە تالاپ رەتىندە سوت ىستەرىن جۇرگىزۋگە قاتىستى 15 جىلدىق ءوتىلىمى تۋرالى ايتىلعان. سۋديالاردى وقىتۋ جانە سوت تاجىريبەسى اراسىنداعى ءوزارا بايلانىستى كۇشەيتۋگە جانە سۋديالاردىڭ ەسەپ بەرۋ ءتارتىبىن كۇشەيتۋگە قاتىستى بارلىق سوت پروتسەستەرىن بەينەتاسپاعا جازۋ شارالارىن مىندەتتى تۇردە ەنگىزۋ قاراستىرىلعان. وزگە دە وسىعان ۇقساس قاراستىرۋلار سوت جۇيەسىن جەتىلدىرۋگە قاتىستى جوسپاردا جاريالانعان بولاتىن. جالپى سۋديالارعا، سوت جۇيەسىنە جانە سۋديالاردىڭ مارتەبەسىنە قاتىستى، بىزدە قر كونستيتۋتسيالىق زاڭى بار. ول 2000 جىلى 25 جەلتوقساندا قابىلدانعان بولاتىن. ودان باسقا دا ۇقساس مىسال رەتىندە سوت تورەلىگىنىڭ جەتى ءتۇيىنىن اتاۋعا بولادى.
جالپى سوت جۇيەسىندەگى رەفورمالاردىڭ باستى ماقساتى ول – ازاماتتاردىڭ ءوز قۇقىقتارى مەن زاڭدى مۇددەلەرىن سوت ارقىلى قورعاۋدىڭ تيىمدىلىگىن ارتتىرۋ. حالىقتىڭ قۇقىقتارىن قالپىنا كەلتىرۋ جانە ولاردىڭ قاۋىپسىزدىگىن كۇشەيتۋ دە نەگىزگى ماقسات بولىپ تابىلادى. سۋديالار ءوز شەشىمدەرىن ادال، ءادىل، پاراساتتى تۇردە ءوز قاعيدالارىن ۇستانۋى ءتيىس. وسى تۇرعىدان سۋديالاردىڭ ءبىلىمىن جەتىلدىرۋ دە سوت جۇيەسىندەگى رەفورمالاردىڭ باستى ماقساتى بولىپ تابىلادى. شىن مانىسىندە،قازىرگى تاڭدا سوت كابينەتىنە كىرسەك ونىڭ ىشكى اقپاراتتىق جۇيەسىن بىلە الامىز. ونداعى حالىققا قولجەتىمدى سوت قۇجاتتارىمەن، سوت ىستەرىن قاراۋ كەستەلەرىن قاراي الامىز، ولارمەن تانىسا الامىز. سوتقا شاقىرۋ قاعازدارى، سمس جانە تاعى دا باسقا جۇيەلەردى قاراۋىمىزعا بولادى. بۇل بىزدە سۋديالاردىڭ اشىقتىعى مەن جاريالىلىعى بولىپ تابىلادى.
سوت جۇيەسىندەگى رەفورمالار قازىرگى تاڭدا جوسپار بويىنشا جانە زاڭ شەڭبەرى اياسىندا جۇمىس جاساپ جاتىر دەپ ەسەپتەيمىن. الايدا، ءوز ماقسات-مۇددەسى بويىنشا جۇمسالاتىن رەفورمالاردا كەم-كەتىك تۇستارى بولىپ جاتاتىندىعىن مويىنداماسقا بولماس. «سىن تۇزەلمەي، ءمىن تۇزەلمەيدى» دەمەكشى ولاردىڭ قايبىرى بولماسىن جوسپار بويىنشا جۇمىس ىستەۋدە. ال ەگەر تۇلعا سوت شەشىمىنە نارازى بولىپ جاتسا، ارى قاراي شاعىمدانۋىنا بايلانىستى سوت جۇيەسىندە ينستانتسيالار قۇرىلعان. سوندىقتان وسىنداي جاعدايدى ەسكەرە وتەتىن وسى سوت جۇيەسىندەگى رەفورمالار، قازىر ءوز ماقساتىنا سايكەس جۇمىس جاساۋدا دەپ ويلايمىن.
- ەلىمىزدە جازىلاتىن زاڭداردىڭ تۇپكى نۇسقاسى ورىس تىلىندە جازىلادى. وسى ماسەلەنى قالاي شەشۋگە بولادى دەپ ويلايسىز؟ جالپى مەملەكەتتىك زاڭداردىڭ مەملەكەتتىك تىلدە جازىلۋى ءۇشىن ءبىز نە ىستەي الامىز؟
- جالپى مەن زاڭ سالاسىنداعى وقىتۋشىمىن، ءارى «ازاماتتىق قۇقىق» پانىنەن ساباق بەرەمىن. ءوزىمنىڭ ستۋدەنتتەرىمە ازاماتتىق كودەكستى ءبىلۋدى مىندەتتەيمىن. قازاق توبىنا ءبىلىم بەرسەم دە، ولارعا ازاماتتىق كودەكستىڭ تۇپكى نۇسقاسىن قاراستىرۋدى، ياعني ورىس تىلىندەگى نۇسقاسىن قاراستىرۋدى تالاپ ەتەمىن. نەگە دەسەڭىز، ءتۇپ نۇسقا بولعاندىقتان ول ناقتى بولىپ كەلەدى. الايدا قازاقشا نۇسقاسى اۋدارما بولسا دا، اۋدارماسىندا ەشقانداي ءمىن جوق. دەگەنمەن دە، قاتەلىكتەر بولىپ جاتادى. «رۇقسات بەرىلەدى» دەلىنۋ كەرەك بولسا، «بەرىلمەيدى» دەلىنىپ قاتەلىكتەر بولىپ قالا ما دەگەن ويلار تۋىندايدى. ءتۇپ نۇسقا، ول قاشان دا ءتۇپ نۇسقا. سونىمەن قاتار ەلىمىزدىڭ ءار ايماعىنىڭ ديالەكتىسىنە دە قاراي، زاڭي تىلدە جازىلعان ازاماتتىق كودەكستى كەيبىرى ءتىپتى تۇسىنە الماي جاتادى. ديپلومدىق جۇمىس جازىپ جاتقان ستۋدەنتتەرىمە، ماگيسترانتارىما ءتۇپ نۇسقانى ۇسىنامىن. ولاردان سالىستىرمالىق ناتيجە كۇتەمىن. دۇرىس اۋدارىلعان با، دۇرىس جازىلعان با دەپ ءجيى سۇرايمىن.
ارينە، مەملەكەتتىك ءتىل – قازاق ءتىلى. مەملەكەتتىك زاڭنىڭ دا ءتۇپ نۇسقاسى، مەملەكەتتىك تىلدە جازىلسا جاقسى بولار ەدى. اۋدارمادا قانشا دەگەنمەن قاتەلىكتەر بولا ما دەپ الاڭدايمىز. كودەكستەن باسقا مەن ءوز ستۋدەنتتەرىمە باسقا دا وقۋلىقتاردى ۇسىنامىن. ولارعا ب.تولەۋعاليەۆتىڭ، س.يدرىشەۆانىڭ مەملەكەتتىك تىلدە جازىلعان اۆتورلىق كىتاپتارىن وقۋعا كەڭەس بەرەمىن. ەگەر ءسىز ءوز تىلىڭىزدە جازساڭىز ەشقانداي كەدەرگىسىز، قيىندىقسىز ويىڭىزدى جەتكىزەسىز. ورىس تىلىندە دە كەرەمەت عالىمداردىڭ كىتاپتارى بار. الايدا ولاردىڭ كەيبىر سوزدەرى بىزدەر ءۇشىن تۇسىنىكسىز. بۇرىنعى اۋدارمالارمەن سالىستىرعاندا، قازىرگى اۋدارمالاردىڭ ساپاسى، اۋدارىلىم دەڭگەيى جوعارى دەسەك بولادى. سەبەبى، ءبىزدىڭ فيلولوگتار، عالىمدار قازاقشا نۇسقاسىن دايىنداۋدا، اۋدارمانى ساۋاتتى تۇردە جازعان. ال مەملەكەتتىك تىلدەگى ءتۇپ نۇسقا جازىلۋ ءۇشىن قازاق ءتىلىن جاقسى مەڭگەرگەن عالىمدار، زاڭگەرلەر قاجەت. ونداي جاندار بىزدە كوبىنە – فيلولوگتار. فيلولوگتار كوبىنە كوركەم-ادەبي تۇردە جازاتىندىقتان، ولاردىڭ سويلەۋ مانەرى، جازۋ داعدىسى زاڭگەرلەردىكىمەن سايكەس بولماۋى مۇمكىن. ويتكەنى ءبىز زاڭگەرلەر ناقتىلىقتى دۇرىس دەپ سانايمىز.
ۇسىنىس رەتىندە ايتار بولسام، بۇل ماسەلە ءوز شەشىمىن تابۋ ءۇشىن، مەملەكەتتىك تىلدەگى عالىمدار، زاڭگەرلەر زاڭ سالاسىندا كوپ كىتاپ جازۋ كەرەك دەپ ويلايمىن. يا بولماسا، پارلامەنتكە زاڭ تۋرالى ۇسىنىستاردى قازاق تىلىندە نەمەسە ەكى تىلدە بەرگەن دۇرىس. سولاي جايلاپ-جايلاپ بۇل ۇردىسكە كوشۋىمىزگە بولادى. بۇل بىردەن بولاتىن نارسە ەمەس. سەبەبى، قانشا جىلدار بويى قالىپتاسىپ كەتكەن ءۇردىس قوي. بۇدان شىعۋ – تەك ءوز قولىمىزدا.
-جاۋاپتارىڭىزعا راقمەت!
سۇحباتتاسقان: دينا ليتپين،
«ادىرنا» ۇلتتىق پورتالى
