قر پرەمەر-ءمينيسترىنىڭ ورىنباسارى ەرالى توعجانوۆتىڭ توراعالىعىمەن مەملەكەت باسشىسىنىڭ تاپسىرماسى بويىنشا قۇرىلعان جەر رەفورماسى جونىندەگى كوميسسيانىڭ ەكىنشى وتىرىسى ءوتتى. سانيتارلىق تالاپتارعا سايكەس ءىس-شاراعا تەك كوميسسيا مۇشەلەرى قاتىستى.
كوميسسيا قۇرامىندا قر پارلامەنت دەپۋتاتتارى، وبلىستاردىڭ اكىمدەرىنىڭ اگروونەركاسىپ كەشەنى ماسەلەلەرىنە جەتەكشىلىك ەتەتىن ورىنباسارلارى، ۇلتتىق قوعامدىق سەنىم كەڭەسىنىڭ مۇشەلەرى، فەرمەرلەر، سالالىق بىرلەستىكتەر مەن فەرمەرلەر وداعىنىڭ، «اتامەكەن» ۇكپ-نىڭ وكىلدەرى، قوعام قايراتكەرلەرى، ساياساتتانۋشىلار، جۋرناليستەر مەن بلوگەرلەر بار. ولاردىڭ كوپشىلىگى بەينەكونفەرەنتسيا بايلانىسى ارقىلى قاتىستى. سونداي-اق، قازاقستاندىقتار اۋىل شارۋاشىلىعى مينسترلىگىنىڭ رەسمي سايتى مەن YouTube كانالىنداعى ونلاين-ترانسلياتسياعا قوسىلىپ، كوميسسيانىڭ جۇمىسىن باقىلاۋعا مۇمكىندىك الدى. ازاماتتارعا ىڭعايلى بولۋ ءۇشىن رەسپۋبليكالىق «حابار24» تەلەارناسىنان تىكەلەي ەفير ۇيىمداستىرىلدى. وتىرىستى اشقان ەرالى توعجانوۆ كوميسسيانىڭ ماقساتىن ايتا كەلىپ، اعىمداعى جىلدىڭ 25 اقپان كۇنى پرەزيدەنت قاسىم-جومارت توقاەۆ قازاقستاننىڭ اۋىل شارۋاشىلىعى جەرلەرىن شەتەلدىكتەرگە بەرۋگە تولىق تىيىم سالۋ تۋرالى تۇپكىلىكتى ساياسي شەشىم قابىلداعانىن ەسكە سالدى. سونداي-اق، ول قازىرگى تاڭدا كوميسسيا الدىندا اۋىل شارۋاشىلىعى سالاسىنداعى جەر قاتىناستارىن دامىتۋ ماسەلەلەرى بويىنشا ۇسىنىمدار ازىرلەۋ مىندەتى تۇرعانىن جەتكىزدى.
«زاڭ جوباسىنىڭ ءبىرىنشى وقىلىمى ماجىلىستە 7 ءساۋىر كۇنى وتەدى. بۇنى ايتىپ وتىرعان سەبەبىم، وزدەرىڭىزگە بەلگىلى، كوپشىلىك اراسىندا، اسىرەسە، الەۋمەتتىك جەلىلەردى ءالى دە جەكەلەگەن تۇسىنىسپەۋشىلىكتەر كەزدەسۋدە. جالعان قاۋەسەتتى ادەيى تاراتۋشىلار دا جوق ەمەس ەكەنىن ايتۋىمىز كەرەك. سوندىقتان، تاعى ءبىر ناقتىلاپ ايتامىن: جەردىڭ شەتەلدىكتەرگە بەرىلمەيتىنى جونىندە ناقتى شەشىم قابىلداندى. مەملەكەت باسشىسى قاسىم-جومارت كەمەلۇلى قوعام تاراپىنان كوتەرىلىپ وتىرعان نەگىزگى ماسەلەلەر بويىنشا ءتۇيىندى شەشىمىن ايتتى، نۇكتەسىن قويدى»، — دەدى جەر رەفورماسى جونىندەگى كوميسسيانىڭ توراعاسى. ودان كەيىن كوميسسيا مۇشەلەرى ءبىرىنشى وتىرىستىڭ قورىتىندىسى بويىنشا ازىرلەنگەن ۇسىنىستاردى قاراۋعا كوشتى. 25 ناۋرىزداعى ءبىرىنشى وتىرىستا ايتىلعان ۇسىنىستارعا سايكەس، كوميسسيا جۇمىسىنىڭ تيىمدىلىگىن ارتتىرۋ ماقساتىندا ەكى جۇمىس توبى قۇرىلدى. ەكونوميكالىق ماسەلەلەر جونىندەگى جۇمىس توبىنىڭ جەتەكشىسى پارلامەنت سەناتىنىڭ دەپۋتاتى اقىلبەك كۇرىشباەۆ بولدى. وعان كوميسسيانىڭ 33 مۇشەسى كىردى. قۇقىقتىق ماسەلەلەر جونىندەگى توپتى ءماجىلىس دەپۋتاتى ەرلان بارلىباەۆ باسقاردى. وعان 21 ادام قوسىلدى. مودەراتور بۇدان بولەك 25 ناۋرىزداعى وتىرىس قورىتىندىسى بويىنشا بارلىعى 55 ۇسىنىس، ونىڭ ىشىندە 11 ۇيىمداستىرۋشىلىق، سونداي-اق 29 ەكونوميكالىق جانە 15 قۇقىقتىق سيپاتتاعى ۇسىنىس كەلىپ تۇسكەنىن حابارلادى. ولاردىڭ بارلىعى كوميسسيا مۇشەلەرىنىڭ، ۋاكىلەتتى ورگانداردىڭ جانە فەرمەرلىك قوعامداستىق وكىلدەرىنىڭ قاتىسۋىمەن جۇمىس توپتارىندا تالقىلانۋدا. ۇسىنىستاردى قاراۋ ناتيجەلەرى تۋرالى جۇمىس توپتارىنىڭ جەتەكشىلەرى ا. كۇرىشباەۆ پەن ە. بارلىباەۆ حابارلادى. ولاردىڭ ايتۋىنشا، كوپشىلىك داۋىسپەن شەتەلدىكتەرگە جانە شەتەلدىك كومپانيالارعا، شەتەلدىك قاتىسۋ ۇلەسى بار كومپانيالارعا، ازاماتتىعى جوق ادامدارعا، حالىقارالىق قاتىسۋى بار عىلىمي ورتالىقتارعا، سونداي-اق قانداستارعا اۋىل شارۋاشىلىعى جەرلەرىن بەرۋگە تىيىم سالۋ جونىندەگى زاڭ جوباسى قابىلدانعاننان كەيىن قازاقستاندىقتارعا جالعا بەرىلەتىن اۋىل شارۋاشىلىعى ماقساتىنداعى جەر ۋچاسكەلەرىنىڭ شەكتى ەڭ جوعارى مولشەرلەرىن بەكىتۋ تۋرالى ۇكىمەت قاۋلىسىن قابىلداۋ تۋرالى ۇسىنىس قولداۋ تاپتى. ەكىنشى جۇمىس توبى جەردى پايدالانۋ مەن قورعاۋدى مەملەكەتتىك باقىلاۋ فۋنكتسيالارىن قر اۋىل شارۋاشىلىعى مينيسترلىگىنىڭ جەر رەسۋرستارىن باسقارۋ كوميتەتىنىڭ قاراماعىنا قايتارۋدى قۇپ كوردى. 2014 جىلدان باستاپ جەردىڭ پايدالانىلۋى مەن قورعالۋىن مەملەكەتتىك باقىلاۋ فۋنكتسيالارى جەرگىلىكتى اتقارۋشى ورگاندارعا جۇكتەلدى، ال 2018 جىلى اۋدان اكىمدەرىنە باقىلاۋ فۋنكتسيالارى بەرىلدى. سونىمەن قاتار، بارلىق سالالاردا باقىلاۋ-قاداعالاۋ فۋنكتسيالارىن جۇزەگە اسىرۋ تاجىريبەسى باقىلاۋ ورگاندارىنىڭ (ورتالىق-وبلىس-اۋدان) بارىنشا تيىمدىلىگىن كورسەتەدى. «سالىستىرمالى تالداۋ كورسەتكەندەي، 2013 جىلدان بەرى جەردى پايدالانۋ جانە قورعاۋ ماسەلەلەرى بويىنشا اكىمدىكتەر جۇرگىزگەن تەكسەرۋلەر سانى 2,6 ەسەگە، ال انىقتالعان زاڭ بۇزۋشىلىقتاردى جويۋ 4,5 ەسەگە ارتقان»، — دەدى ماسەلەنىڭ وزەكتىلىگىن تۇسىندىرگەن ەرلان بارلىباەۆ. ونىڭ ايتۋىنشا، جەردى پايدالانۋ مەن قورعاۋدى باقىلاۋ فۋنكتسيالارىن ورتالىق ۋاكىلەتتى ورگانعا بەرۋ ماسەلەسىن پارلامەنت دەپۋتاتتارى، باس پروكۋراتۋرا، جوعارعى سوت، «اتامەكەن» ۇكپ جانە تاعى باسقالار كوتەرىپ وتىر. سونىمەن قاتار، قۇقىقتىق ماسەلەلەر جونىندەگى جۇمىس توبىنىڭ مۇشەلەرى باقىتجان بازاربەك كوتەرگەن جەردىڭ نىسانالى ماقساتىن باعباندىقتان باسقا ماقساتتارعا وزگەرتۋگە زاڭنامالىق تۇرعىدا تىيىم سالۋ تۋرالى باستاماسىن قولدادى. جەر رەفورمالارى جونىندەگى كوميسسيا مۇشەلەرى ايتىلعان ۇسىنىستار بويىنشا داۋىس بەردى. بۇدان بولەك، Qoldau پلاتفورماسىن قارجى مينيسترلىگىننەن الىپ، قر اۋىل شارۋاشىلىعى مينيسترلىگىنىڭ قاراماعىنا بەرۋ جانە ونى «اۋىل شارۋاشىلىعى جانۋارلارىن cايكەستەندىرۋ» اقپاراتتىق جۇيەسىمەن ينتەگراتسيالاۋ ماسەلەلەرى قارالدى. وتىرىس سوڭىندا جيىنعا قاتىسۋشىلار قوعام وكىلدەرى اراسىنان توراعا ورىنباسارىن سايلاۋدى ۇسىندى. اشىق داۋىس بەرۋ ناتيجەسىندە «قازاقستان فەرمەرلەر وداعى» رقب-ءنىڭ پرەزيدەنتى جيگۋلي دايراباەۆ كوميسسيا توراعاسىنىڭ ورىنباسارى بولىپ سايلاندى.
"ادىرنا" ۇلتتىق پورتالى
©prime.ministr.kz
