مەملەكەتتىك ورگان وكىلدەرى كارانتين تالاپتارىن كۇشەيتۋ، ونى بۇزعانداردى جاۋاپقا تارتۋ تۋرالى كوپ ايتىپ كەتتى. ارينە، ىندەتتى تاراتپاۋ مىندەت. بىراق ونىڭ سىرتىندا كارانتينمەن قوسا كەلگەن قيىندىقتىڭ قىسپاعىندا قالعان شاعىن جانە ورتا بيزنەس وكىلدەرىنە، سولاردىڭ جۇمىس ورنىندا ناپاقاسىن ايىرىپ جۇرگەن جۇزدەگەن مىڭ ادامعا مەملەكەت تاراپىنان قانداي قولداۋ بولادى؟
سالىقتان، جالداۋ اقىسىنان بوساتۋ، ۋاقىتشا جۇمىسسىز قالعاندارعا ەڭ تومەنگى ايلىق كولەمىندە (بىلتىرعى 42 500-ءدى ايتام) جاردەماقى بەرۋ جاعى قاراستىرىلىپ جاتىر ما؟ سىركەسى سۋ كوتەرمەي جۇرگەن جۇرت قازىر تالاپ بارىنە بىردەي بولۋ كەرەك دەگەنگە بۇرىنعىدان بەتەر ءمان بەرە باستايدى. ايتپادى دەمەڭىز، جابىق تۇرعان باراحولكانىڭ ساۋداگەرلەرى قالا باسشىلىعىنا "نە "التىن وردانى" دا جاپ، نە بىزگە دە رۇقسات بەر" دەپ تالاپ قويارى انىق. ەگەر ول تالاپقا ەشكىم قۇلاق اسپاسا ساۋداگەرلەردىڭ نارازىلىعى كوشەگە لىقسىپ شىعارىن بولجاۋ قيىن ەمەس. ولاردى "التىن وردا" وبلىستىڭ اۋماعىندا دەگەن قيسىنى ءالسىز ءۋاج دە توقتاتپايدى.
سوسىن ءبارىمىز بەكشيندى مۇيىزدەپ جاتىرمىز. انىعىندا ول سانيتارلىق تالاپقا ساي جۇمىسىن شاماسى كەلگەنشە دۇرىس ىستەپ وتىر دەپ سانايمىن. تەك جامان حاباردى كىم ءبىرىنشى ايتسا، سول سۇيكىمسىز كورىنەتىننىڭ كەرى بولىپ تۇر. ىندەت پەن كارانتيننەن تۋعان تۇيتكىلدىڭ بارىنە بەكشين كىنالى بولماسا دا، "تازى اشۋىن تىرنادان" الادى دەگەندەي، قاۋلى شىعاراتىن سانيتار دارىگەرلەرگە جابىلامىز.
كىم جامان؟ قوجا جامان دەۋشى مە ەدى؟
جازباسىنان.
