2 تامىزدا نۇر-سۇلتاندا جاڭا كارانتيندىك شەكتەۋلەر كۇشىنە ەندى. قالانىڭ باس مەملەكەتتىك سانيتارلىق دارىگەرىنىڭ قاۋلىسىنا سايكەس، بىرقاتار ۇيىمدار مەن وبەكتىلەردە شتاتتىق رەجيمدە جۇمىسقا COVID-19-قا قارسى ۆاكتسينا الماعان قىزمەتكەرلەردىڭ جۇمىسىنا شەكتەۋ (تۇراقتى مەديتسينالىق قارسى كورسەتىلىمدەرى بار جانە سوڭعى ءۇش ايدا كۆي-مەن اۋىرماعان ادامداردى قوسپاعاندا) قويىلادى، دەپ حابارلايدى "ادىرنا".
ولاردىڭ قاتارىندا: حالىققا قىزمەت كورسەتۋ ورتالىقتارى، مەملەكەتتىك ورگاندار مەن ۇيىمدار، ءوندىرىس ورىندارى، قۇرىلىس وبەكتىلەرى، كوتەرمە جانە بولشەك ساۋدا، مادەنيەت پەن دەمالىس، قوناق ۇيلەر، اۋەجايلار، ۆوكزالدار، ءبىلىم بەرۋ جانە وقىتۋ ۇيىمدارى، دەنساۋلىق ساقتاۋ، شيپاجايلار، ويىن -ساۋىق مەكەمەلەر، ءدارىحانالار جانە ت.ب.
سونىمەن قاتار، جۇمىس بەرۋشىلەر مەملەكەتتىك ورگانداردىڭ، كەڭسەلەردىڭ، ۇلتتىق كومپانيالاردىڭ جانە باسقا دا ۇيىمداردىڭ قىزمەتكەرلەرىنىڭ 80% -ىن قاشىقتىقتان جۇمىسقا اۋىستىرۋى ءتيىس.
ەرەكشەلىكتەر تەك سوڭعى ءۇش اي ىشىندە ۆاكتسيناتسيالانعان جانە اۋىراتىندارعا قاتىستى. باس سانيتارلىق دارىگەردىڭ قاۋلىسىنا سايكەس، 2021 جىلدىڭ 10 تامىزىنا دەيىن جۇمىسشىلار ءبىرىنشى كومپونەنتپەن، ال 2021 جىلدىڭ 1 قىركۇيەگىنە دەيىن - COVID -19 ۆاكتسيناسىنىڭ ەكىنشى كومپونەنتىمەن (ەكپە العان ادامداردى قوسپاعاندا) يممۋنيزاتسيالانۋى ءتيىس.
نۇر-سۇلتانداعى شەكتەۋ جانە كارانتيندىك شارالاردى قاتاڭداتۋ تۋرالى قاۋلى قازاقستان رەسپۋبليكاسىندا كوروناۆيرۋستىق ينفەكتسيانىڭ پايدا بولۋىن جانە تارالۋىن بولدىرماۋ ءۇشىن ماب وتىرىسىنىڭ حاتتاماسىنا سايكەس قابىلداندى.
"ادىرنا" ۇلتتىق پورتالى
