ەل اتىن الەمدە اسقاقتاتىپ جۇرگەن 21 جاستاعى سوفيا بەرۋلتسەۆا بۇگىندە قازاقستان رەسپۋبليكاسىنىڭ حالىقارالىق دارەجەدەگى سپورت شەبەرى. كاراتە-دومەن اينالىسقانىنا بيىل 14 جىل تولدى.
شىمكەنتتىك سپورتشى ءوزىنىڭ جەتىستىكتەرىن جاتتىقتىرۋشىلارىنىڭ ەڭبەگى دەپ بىلەدى.
«التى جاسىمنان باستاپ كۇرەسكە قاتىستىم. وقىعان مەكتەبىمدەگى سپورت ۇيىرمەسىنە بارىپ ءجۇردىم. سپورتتىڭ وسى كاراتە-دو سالاسى وزىمە وتە قىزىق بولدى. سوندىقتان ۇزدىكسىز دايىندالىپ، جەڭىسكە جەتىپ كەلەمىن. جەڭىستەرىمنىڭ بارلىعى جاتتىقتىرۋشىلارىمنىڭ ەڭبەگى دەر ەدىم. العاشقى جاتتىقتىرۋشىم ب.الىكوۆ بولدى. قازىر الەكسەي رەپينپەن جاتتىعىپ ءجۇرمىن. بىلىكتى مامان نۇرماحان مەلدەحانوۆ تا ۇستازدىق جاساعان» - دەيدى نازىك كاراتيست.
سوفيا بەرۋلتسەۆا كاراتەدەن وتكەن جاستار اراسىنداعى الەم، ازيا چەمپيوناتتارىنىڭ 1-ورىن يەگەرى. يسپانيا، قىتاي، تۇركيا ەلدەرىندە وتكەن حالىقارالىق تۋرنيرلەردىڭ جەڭىمپازى. ال اۆستريا، تۇركيا جەرىندە بولعان پرەمەر-ليگالاردان 3-ورىندى جەڭىپ العان.
الداعى باستى ماقساتى وليمپيادا ويىندارىنا ليتسەنزيا الۋ. وليمپيادالىق رەيتينگتە جوعارى ورىنعا جەتۋ ءۇشىن ءالى دە بار كۇشىمدى جۇمسايمىن دەيدى ول.
شىمكەنت قالاسى اكىمدىگىنىڭ ءباسپاسوز قىزمەتى
