شىمكەنت قالاسىنداعى «قاجىمۇقان» اتىنداعى ورتالىق ستاديون اۋماعىندا كەزەكتى سەنبىلىك ازىق-تۇلىك جارمەڭكەسى ءوتتى. اپتا سايىن ۇيىمداستىرىلاتىن شارانىڭ باستى ماقساتى – قالا تۇرعىندارىن ساپالى ءارى قولجەتىمدى ونىممەن قامتاماسىز ەتۋ جانە جەرگىلىكتى كاسىپكەرلەر مەن شارۋا قوجالىقتارىن قولداۋ.
تاڭعى ۋاقىتتان باستاپ جارمەڭكە الاڭىنا تۇرعىندار كوپتەپ جينالدى. مۇندا شىمكەنتتىڭ جەرگىلىكتى وندىرۋشىلەرىمەن قاتار كورشىلەس وبلىستاردان كەلگەن شارۋالار دا ءوز ونىمدەرىن ۇسىندى. ساتىپ الۋشىلار كوكونىس پەن جەمىس-جيدەك، جاڭا سويىلعان ەت، ءسۇت ونىمدەرى، ۇن جانە نان ونىمدەرى، سونداي-اق ءتۇرلى كونديتەرلىك جانە توقىما بۇيىمدارىن نارىقتاعى باعادان تومەن باعادا ساتىپ الدى.
جارمەڭكەنىڭ باستى ەرەكشەلىگى – ونىمدەردىڭ تىكەلەي وندىرۋشىلەردەن جەتكىزىلۋى.
شىمكەنت قالاسى اۋىل شارۋاشىلىعى جانە ۆەتەريناريا باسقارماسىنىڭ «ازىق-تۇلىك قاۋىپسىزدىگىن قامتاماسىز ەتۋ» ءبولىمىنىڭ باسشىسى جاندوس حانيەۆتىڭ ايتۋىنشا، جارمەڭكە بارىسىندا بارلىق سانيتارلىق تالاپتار قاتاڭ ساقتالادى.
– كاسىپكەرلەرگە ساۋدا ورىندارى تەگىن بەرىلەدى. جارمەڭكەنىڭ قاۋىپسىز ءوتۋىن قامتاماسىز ەتۋ ءۇشىن پوليتسيا قىزمەتكەرلەرى مەن سانيتاريالىق-ەپيدەميولوگيالىق باقىلاۋ ماماندارى قاتىسادى. سونىمەن قاتار كوشپەلى زەرتحانا جۇمىس ىستەپ، ساتىلىپ جاتقان ونىمدەردىڭ ساپاسىن تەكسەرىپ وتىرادى، – دەدى ول.
جارمەڭكەگە تۇراقتى قاتىساتىن كاسىپكەرلەردىڭ ءبىرى – ەت ونىمدەرىن ساتۋشى كوشگار ابدۋالى. ونىڭ ايتۋىنشا، ول اپتا سايىن شامامەن 100 كەلى ەت ءونىمىن اكەلىپ، تۇگەلگە جۋىق ساتىپ كەتەدى.
ال جارمەڭكەنىڭ تۇراقتى كەلۋشىلەرىنىڭ ءبىرى جۇماكۇل ماحانوۆا بۇل جەرگە تەك ساۋدا جاساۋ ءۇشىن ەمەس، ادامدارمەن ارالاسىپ، قوعامعا پايداسىن تيگىزۋ ءۇشىن كەلەتىنىن ايتادى. قوعامدىق جۇمىستارعا بەلسەندى قاتىساتىن ول كەيدە مۇقتاج جاندارعا ونىمدەردى تەگىن بەرىپ، قايىرىمدىلىقپەن دە اينالىسادى.
جالپى سەنبىلىك جارمەڭكە تەك ساۋدا الاڭى عانا ەمەس، تۇرعىندار مەن كاسىپكەرلەردىڭ كەزدەسىپ، پىكىر الماساتىن ورتاسىنا اينالىپ وتىر. ايتا كەتەيىك، مۇنداي جارمەڭكەلەر شىمكەنت قالاسىنىڭ بەس اۋدانىندا ۇيىمداستىرىلۋدا.
