El atyn álemde asqaqtatyp júrgen 21 jastaǵy Sofıa Berýleva búginde Qazaqstan Respýblıkasynyń halyqaralyq dárejedegi sport sheberi. Karate-domen aınalysqanyna bıyl 14 jyl toldy.
Shymkenttik sportshy óziniń jetistikterin jattyqtyrýshylarynyń eńbegi dep biledi.
«Alty jasymnan bastap kúreske qatystym. Oqyǵan mektebimdegi sport úıirmesine baryp júrdim. Sporttyń osy karate-do salasy ózime óte qyzyq boldy. Sondyqtan úzdiksiz daıyndalyp, jeńiske jetip kelemin. Jeńisterimniń barlyǵy jattyqtyrýshylarymnyń eńbegi der edim. Alǵashqy jattyqtyrýshym B.Alykov boldy. Qazir Alekseı Repınpen jattyǵyp júrmin. Bilikti maman Nurmahan Meldehanov ta ustazdyq jasaǵan» - deıdi názik karatıst.
Sofıa Berýleva karateden ótken jastar arasyndaǵy Álem, Azııa chempıonattarynyń 1-oryn ıegeri. Ispanııa, Qytaı, Túrkııa elderinde ótken Halyqaralyq týrnırlerdiń jeńimpazy. Al Avstrııa, Túrkııa jerinde bolǵan Premer-Lıgalardan 3-oryndy jeńip alǵan.
Aldaǵy basty maqsaty Olımpıada oıyndaryna lıenzııa alý. Olımpıadalyq reıtıngte joǵary orynǵa jetý úshin áli de bar kúshimdi jumsaımyn deıdi ol.
Shymkent qalasy ákimdiginiń baspasóz qyzmeti
