دارىندى دارىگەر، مىقتى نەيروحيرۋرگ مىڭجىلقى بەردىقوجاەۆ شىمكەنتكە قونىس اۋداردى. بۇل تۋرالى شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان فەيسبۋك الەۋمەتتىك جەلىسىندە حابارلادى.
ەلىمىزدەگى ۇزدىك ماماندار ءۇشىنشى مەگاپوليستىڭ دامۋى مەن گۇلدەنۋىنە ۇلەسىن قوسۋ ماقساتىندا شىمكەنتكە قونىس اۋدارۋدا.
شىمكەنت باسشىلىعى بىلىكتى دارىگەرمەن بىلتىردان بەرى كەلىسسوز جۇرگىزىپ كەلگەن.
– بەردىقوجاەۆ اتاقتى “سوۆمينكانىڭ” نەيروحيرۋرگيا ءبولىمىنىڭ جەتەكشىسى. مىڭجىلقىنى بۇكىل قازاقستاننان ىزدەپ كەلەدى. كونسۋلتاتسياسىنا كەزەككە تۇرادى. ءتىپتى ءبىر-بىرىنەن ەستىپ، قىرعىزستان مەن وزبەكستاننان دا مىڭجىلقىنى ىزدەپ كەلىپ جاتقان ناۋقاستار بار. شەتەلدىكتەرگە جاسالعان ءار وتاسى 20 مىڭ دوللارعا باعالانادى. ول قارجى ەلگە، دەنساۋلىق سالاسىنا كەلەدى. قازىر قارجى ناۋقاستىڭ ىزىنەن جۇرەدى. ەگەر ناۋقاستار ورالدان نەمەسە سەمەيدەن وتا جاساۋ ءۇشىن شىمكەنتكە كەلەتىن بولسا، قارجى دا شىمكەنتكە كەلەدى، – دەپ مالىمدەدى شىڭعىس مۇقان.
مىڭجىلقى بەردىقوجاەۆ – قاراعاندى مەملەكەتتىك مەديتسينا اكادەمياسىنىڭ تۇلەگى، «بولاشاق» باعدارلاماسىمەن رەسەي اسكەري-مەديتسينالىق اكادەمياسىندا (سانكت-پەتەربور) كلينيكالىق تاجىريبەدەن وتكەن. 2008 جىلدان باستاپ استانا قالاسىنداعى ۇلتتىق نەيروحيرۋرگيا ورتالىعىندا مي-قان تامىرلارى بولىمىندە جۇمىس ىستەدى. 2014 جىلى الماتىداعى №7 قالالىق اۋرۋحانادا ينتەرۆەنتسيالىق حيرۋرگيا ءبولىمىن اشۋعا مۇرىندىق بولدى. مۇندا العاشقى 2 جىلدا-اق وڭتۇستىك وبلىستارداعى ناۋقاستاردىڭ مي تامىرلارىنا 330 وتا جاسالدى. وتاندىق ەندوۆاسكۋليارلى نەيروحيرۋرگيانىڭ نەگىزىن قالاعان مىڭجىلقى بەردىقوجاەۆ 2016 جىلدان الماتى قالالىق ورتالىق كلينيكالىق اۋرۋحانادا نەيروحيرۋرگيا ءبولىمىنىڭ مەڭگەرۋشىسى بولدى.
شىڭعىس جۇمابەكۇلىنىڭ مالىمدەۋىنشە، شىمكەنت اكىمدىگى مەديتسينا تۋريزمىنە دە كوپ كوڭىل ءبولىپ وتىر.
– ساناۋلى جىلداردان سوڭ حالىقتىڭ كوبى شىمكەنتكە كەلىپ ەمدەلەتىن بولادى. قازىر مەملەكەتتىك-جەكەمەنشىك ارىپتەستىك ارقىلى شىمكەنتتە 1000 توسەك-ورىندىق سۋپەرزاماناۋي، سەرۆيسى 5 جۇلدىزدى قوناقۇيدەي اۋرۋحانا سالۋ بويىنشا جۇمىستار جۇرگىزىلۋدە. ىسكە قوسىلعان سوڭ، تۇركيا نەمەسە كورەياعا ەمدەلۋگە باراتىندار اتتىڭ باسىن شىمقالاعا بۇراتىن بولادى. جالپى، شىمكەنت قالاسىنىڭ دەنساۋلىق ساقتاۋ سالاسىنىڭ الدىندا تۇرعان مىندەت مىناداي، قالاداعى اۋرۋحانالاردىڭ ءبىر ءبولىمى بولسا دا رەسپۋبليكالىق دارەجەدە قىزمەت كورسەتە الۋى ءتيىس. ءبىزدىڭ №1 اۋرۋحانا ترانسپلانتولوگيا بويىنشا، №2 اۋرۋحانا نەيروحيرۋرگيا بويىنشا ماماندانعان سالاسىنىڭ قازاقستانداعى «ءنومىر ءبىرىنشى» بولۋى كەرەك. مەديتسينا ءتۋريزمىن دامىتۋ ءۇشىن ماماندارىمىز مىقتى بولۋى قاجەت، - دەدى ش. مۇقان.
«ادىرنا» ۇلتتىق پورتالى
