سەنات توراعاسى ماۋلەن اشىمباەۆ شىمكەنت قالاسىنىڭ ءماسليحات دەپۋتاتتارىمەن كەزدەستى. وندا مەملەكەت باسشىسى جولداۋدا جانە ۇكىمەتتىڭ كەڭەيتىلگەن وتىرىسىندا بەرگەن تاپسىرمالاردى ىسكە اسىرۋعا جولىنداعى مىندەتتەر، قالانىڭ دامۋىنا تيگىزەتىن سەناتتىڭ ىقپالى جانە پالاتا مەن ءماسليحاتتاردىڭ بىرلەسكەن جۇمىسىنىڭ جاڭا فورماتى تالقىلاندى.
ءىس-شارادا ماۋلەن اشىمباەۆ مەملەكەت باسشىسىنىڭ باستاماسىمەن ەلىمىزدە ادىلەتتى قازاقستان قۇرۋ، مەملەكەتتىلىكتى نىعايتۋ جانە ازاماتتاردىڭ ءال-اۋقاتىن ارتتىرۋ جولىندا كەشەندى رەفورمالار جۇزەگە اسىرىلىپ جاتقانىن اتاپ ءوتتى. بۇل باعىتتاعى بەلگىلەنگەن مىندەتتەردى ورىنداۋ بارلىق مۇددەلى تاراپتىڭ بەلسەندى ءارى جۇيەلى ءوزارا ءىس-قيمىلىن تالاپ ەتەدى. سونداي-اق اتالعان سالادا جۇمىستىڭ جاڭا فورماتى قاجەت.
«پرەزيدەنتىمىز قاسىم-جومارت كەمەلۇلى توقاەۆتىڭ باستاماسىمەن قولعا الىنعان رەفورمالاردىڭ ناتيجەسىندە الەۋمەتتىك-ەكونوميكالىق جانە ساياسي سالادا ۇلكەن وزگەرىستەر بولدى. بيلىك تارماقتارىنىڭ اراسىنداعى تەڭگەرىمدىلىك كۇشەيىپ، ساياسي باسەكەلەستىك ارتتى. سونداي-اق مەملەكەتتىك ينستيتۋتتار كەشەندى تۇردە جاڭعىرتىلدى. سونىڭ ناتيجەسىندە قازىرگى تاڭدا ەل ەكونوميكاسىنىڭ جاڭا ۇلگىسىن قالىپتاستىرۋ ءۇشىن دايەكتى جۇمىستار جۇرگىزىلىپ كەلەدى. مۇنداي ناقتى قادامدار ازاماتتاردىڭ ءال-اۋقاتىن ارتتىرىپ، وڭىرلەردىڭ دامۋىنا تىڭ سەرپىن بەرەدى دەپ سەنەمىز»، – دەدى سەنات سپيكەرى.
ماۋلەن اشىمباەۆ ءوز سوزىندە پارلامەنتتىڭ سەگىزىنشى شاقىرىلىمىنىڭ ەكىنشى سەسسياسىن قورىتىندىلاي كەلە، سەنات پەن ءماسليحاتتاردىڭ بىرلەسكەن جۇمىسىنىڭ ماڭىزدى باسىمدىقتارىنا توقتالدى. سونىمەن بىرگە پالاتا سپيكەرى زاڭ شىعارۋ قىزمەتىنە ءماسليحات دەپۋتاتتارى، ساراپشىلار مەن ازاماتتىق قوعام وكىلدەرى بەلسەندى جۇمىلدىرىلعانىن تىلگە تيەك ەتتى. سەنات توراعاسىنىڭ ايتۋىنشا، جەرگىلىكتى وكىلدى ورگانداردىڭ ۇسىنىستارى مەن باستامالارى وڭىرلەردى دامىتۋعا قاتىستى ماسەلەلەردى شەشۋ كەزىندە ماڭىزدى ءرول اتقارۋعا ءتيىس.
«پارلامەنت بۇل سەسسيادا 102 زاڭ قابىلدادى. ونىڭ ىشىندە قوعامدىق باقىلاۋدى كۇشەيتۋ، ايەلدەر مەن بالالاردىڭ قۇقىقتارىن قورعاۋ، ادام ساۋداسىنا قارسى ءىس-قيمىل سياقتى اسا ماڭىزدى ماسەلەلەردى قامتيتىن زاڭدار بار. سەناتورلار ۇنەمى وڭىرلەرگە بارىپ، جەرگىلىكتى جەرلەردەگى ارىپتەستەرىمەن بىرگە تۇرعىندارمەن كەزدەسىپ، وزەكتى پروبلەمالاردى شەشۋ جولدارىن تالقىلادى. سونىڭ ناتيجەسىندە ۇكىمەتكە جانە ءتيىستى مەملەكەتتىك ورگاندارعا 200 دەپۋتاتتىق ساۋال جولداندى. الداعى سەسسيا كەزىندە دە بىرلەسكەن جۇمىسىمىزدى وسى قارقىنمەن جالعاستىرامىز دەپ سەنەمىن»، – دەدى ماۋلەن اشىمباەۆ.
سونداي-اق كەزدەسۋدە مەگاپوليستەگى وزەكتى تۇيتكىلدەر، ناقتى ايتقاندا، ينفراقۇرىلىم جانە لوگيستيكا ماسەلەلەرىن شەشۋ بارىسى تالقىلاندى. اتالعان پروبلەمالاردىڭ وڭ شەشىمىن تابۋ ءۇشىن رەسپۋبليكالىق بيۋدجەتتەن قاراجات ءبولۋ ماسەلەسى دە ءسوز بولدى.
«شىمكەنتتە جەدەل شەشۋدى قاجەت ەتەتىن ماڭىزدى ماسەلەلەر بار. بۇل، ەڭ الدىمەن، مەملەكەت باسشىسىنىڭ تاپسىرماسىمەن حالىقارالىق ساۋدا-لوگيستيكالىق ورتالىعىن سالۋعا قاتىستى ەكەنىن اتاپ وتكەن ءجون. باتىس اينالما جولىن جانە باسقا دا باعىتتارداعى جولداردى سالۋ دا نەگىزگى مىندەت. شىمكەنت ءۇشىن مۇمكىندىگى شەكتەۋلى جانداردى وڭالتۋ ورتالىعىنىڭ قۇرىلىسى دا وزەكتى. سوندىقتان الداعى سەسسيادا رەسپۋبليكا بيۋدجەتىن قاراعان كەزدە سەناتورلار اتالعان باسىمدىقتاردى جانە ءماسليحات دەپۋتاتتارىنىڭ ۇسىنىستارىن نازارعا الادى»، – دەدى ماۋلەن اشىمباەۆ.
