جاز ايى باستالعان تۇستا، وزەن مەن كولدەردىڭ ماڭىندا دەمالۋشىلاردىڭ سانى ارتادى. دەگەنمەن دە كوپتەگەن ادامدار تجد قىزمەتكەرلەرىنىڭ ەسكەرتۋىنە ءمان بەرمي، بەلگىلەنبەگەن ورىنداردا جازاتايىم وقيعالارعا تاپ بولىپ جاتادى.
ناقتىراق ايتساق، شىمكەنت قالاسىنىڭ توتەنشە جاعدايلار دەپارتامەنتىنىڭ رەسمي مالىمەتىنە سايكەس، قالا اۋماعىنداعى سۋ ايدىندارىندا 5 رەسمي ورىن بەلگىلەنگەن. ونىڭ ۇشەۋىنە شومىلۋعا رۇقسات ەتىلگەن. ولار: «حولوديلنيك» جانە «راحات بادام» دەمالىس ورىندارىمەن قوشقار اتا وزەنىنىڭ باستاۋى. سونىمەن قاتار، ەكەۋى سپورت جانە تۋريزمعا ارنالعان دەندرولوگيالىق ساياباق پەن جايلاۋ كولى بار.
سونداي- اق، شومىلۋعا تىيىم سالىنعان 13 ورىن ايقىندالىپ، 72 ەسكەرتۋ بەلگىلەرى ورناتىلعان. تجد قىزمەتكەرلەرى ءساۋىر ايىنان باستاپ، سۋداعى قاۋىپسىزدىكتى ساقتاۋ بويىنشا 195 رەت رەيد جۇرگىزىپ، 20 952 ادام قامتىدى.
قاۋىپسىزدىكتى كۇشەيتۋ باعىتىندا جازاتايىم وقيعالاردىڭ الدىن الۋ ماقساتىندا، ادامدار كوپ شوعىرلاناتىن ورىنداردا LED ەكراندار ارقىلى بەينەروليكتەر كورسەتىلىپ، تۇرعىنداردىڭ ءموبيلدى تەلەفوندارىنا 112 قىزمەتى ارقىلى كۇندەلىكتى ەسكەرتۋ حابارلامالارى جىبەرىلۋدە.
قۇرمەتتى شىمكەنت قالاسىنىڭ تۇرعىندارى مەن قوناقتارى! سىزدەردى سۋعا شومىلۋ ەرەجەلەرى مەن قاۋىپسىزدىك شارالارىن قاتاڭ ساقتاۋعا شاقىرامىز! ءار ادامنىڭ ءومىرى – باعا جەتپەس قۇندىلىق!
