اسقار مامين قازاقستاندىقتاردىڭ 99 پايىزى ينتەرنەتپەن قامتىلعانىن ايتىپتى. توقسان توعىز پايىز ينتەرنەت تۇرماق، ءالى قانشاما ۇيالى بايلانىسسىز وتىرعان اۋىلدار بار. ورال قالاسىنان 130, اۋدان ورتالىعىنان 10 شاقىرىم جەردەگى ءبىزدىڭ اۋىلعا ۇيالى بايلانىس ءالى كەلمەدى.
بۇل ماسەلەنى مەنىڭ ۇزدىكسىز كوتەرىپ كەلە جاتقانىما 7 جىلداي بولدى. باسىندا حالىق سانى 1000-عا جەتۋى كەرەك دەدى. ءبىزدىڭ اۋىلدا تۇرعىنى 600-ءدىڭ شاماسىندا عانا. جاقىن ارادا مىڭعا بارمايتىنى انىق. بۇعان جەتكەنشە، 20 جىل وركەنيتەتتەن ماقۇرىم قالىپ وتىرامىز با؟ مەن اۋدان اكىمىنىڭ ەسەپتىك جيىنىندا سولاي دەيتىنمىن.
ء"الاۋلايىم بىتسە، حالاۋلايىم بار". الدار كوسە سياقتى اكىمدەر دە سوڭعى ءبىر-ەكى جىلدا باسقاشا ايتاتىن بولدى. ەندىگى جەردە ءبىر عانا بايلانىس وپەراتورىنىڭ مۇناراسىن ورناتۋ ءتيىمسىز ەكەن. سوندىقتان دا "اكتيۆ", "تەلە-2", "بيلاين" - ۇشەۋىن ءبىر قوندىرعىمەن بىردەن قويماق.
ينتەرنەتى جاقسى بولسا، بىزگە سونىڭ بىرەۋى دە جارار ەدى دەيتىنبىز. ءسويتىپ جۇرگەندە "ەگەمەن قازاقستاننان" تۇرعىندارى 250-گە جەتەتىن اۋىلداردىڭ 2020 جىلدىڭ سوڭىنا دەيىن جاپپاي ۇيالى بايلانىسپەن قامتىلاتىنىن وقىدىق. مىنە، مەجەلەنگەن مەرزىمنەن اسىپ بارامىز. ءبىزدىڭ اۋدانىمىزدىڭ تالدىبۇلاق، تاسقۇدىق دەگەن اۋىلدارىندا "اكتيۆتىڭ" مۇناراسى ورناتىلىپتى. بىراق بايلانىس بولعانمەن، ينتەرنەت ۇستامايتىن كورىنەدى. "مەن نە دەيمىن، دومبىرام نە دەيدى؟". اسقار مامين 99 پايىز دەگەنمەن، ناقتى جاعداي باسقاشا دەيدى.
2013 جىلى قابىلدانعان "اقپاراتتى قازاقستان" باعدارلاماسى بويىنشا بىلتىرعى جىلدىڭ سوڭىنا دەيىن ەلىمىزدىڭ كەمى 75 پايىزى ساپالى ينتەرنەتپەن قامتىلۋى ءتيىس بولاتىن. قازىر قالالىق جەرلەردىڭ وزىندە ينتەرنەت ناشار جەرلەر بار. سىرىم اۋداننىڭ ورتالىعىنا ۇيالى بايلانىس 2007 جىلدىڭ ءساۋىر ايىندا كەلىپ ەدى. ون ءتورت جىلدان بەرى ون شاقىرىم جەردەگى ءبىزدىڭ اۋىلعا سول ءالى جەتپەدى. قازاقستاننىڭ قالاي دامىپ كەلە جاتقانىن سونىڭ وزىنەن كورۋگە بولادى عوي. نورۆەگيا تەڭىزدىڭ استىنان 501 كيلومەتر جول سالىپ، 827 ميلليارد دوللار قور جيناپتى دەگەندى وقىعاندا، جىلاپ جىبەرۋگە قالاتىنىمىز سوندىقتان...
سەرىك زياتوۆ، باتىس قازاقستان وبلىسىنىڭ تۇرعىنى.
