بۇعان دەيىن قازاقستانداعى ءار ادامنىڭ جەكە ءنومىرى بولادى دەگەندە، جۇرت ءارى قاۋىپتەنىپ، ءارى تاڭىرقاعان ەدى. كوپ ۇزاماي، اربىرىمىزگە جسن ءنومىرى بەكىتىلدى. ال قازىر 12 ساندى تەرىپ جىبەرسەڭىز، سول جسن يەسى تۋرالى اقپارات الاسىز. قاراپايىم ادامنىڭ قولى جەتە بەرمەس، قۇزىرلى مەكەمە وكىلى ءۇشىن الگى 12 سان ەلدەگى ءار ادامدى تىكەلەي باقىلاۋ قۇرالىنا اينالدى دەسەك، ارتىق بولماس. ەندى مىنە، تاياۋدا قازاقستانداعى ءار ادامنىڭ ساۋساق تاڭباسىن الۋ ناۋقانى باستالماق.
2016 جىلدىڭ 30 جەلتوقسانىندا ەلىمىزدە «داكتيلوسكوپيالىق جانە گەنومدىق تىركەۋ تۋرالى» زاڭ قابىلدانىپ، ول 2021 جىلدىڭ 1 قاڭتارىندا كۇشىنە ەنۋى كەرەك بولعان. الايدا، قر ىشكى ىستەر مينيسترلىگى زاڭنىڭ ەنگىزىلۋىن كەيىنگە قالدىرۋ تۋرالى ۇسىنىس تاستادى. قر ىشكى ىستەر مينيسترلىگى ىشكى جانە سىرتقى كوممۋنيكاتسيالار دەپارتامەنتى ديرەكتورىنىڭ مىندەتىن اتقارۋشى ا.ماحامبەتوۆا كەيىنگە قالدىرۋ ۇسىنىسى نە ءۇشىن جاسالعانىن جانە ساۋساق ىزدەرىن تىركەۋ نە ءۇشىن قاجەت ەكەنى تۋرالى ايتتى.
«ىشكى ىستەر مينيسترلىگى مۇددەلى مەملەكەتتىك ورگاندارمەن بىرلەسىپ، ساۋساق ىزدەرىن تىركەۋگە قاتىستى زاڭنىڭ جەكەلەگەن نورمالارىن 2023 جىلدىڭ 1 قاڭتارىنا قالدىرۋ تۋرالى ۇسىنىس تاستادى. قازىرگى ۋاقىتتا زاڭعا قاتىستى تۇزەتۋلەر قازاقستان رەسپۋبليكاسىنىڭ پارلامەنتىندە پىسىقتالۋدا»، – دەپ حابارلادى ول دەپ جازادى «Qadam.asia».
سونىمەن قاتار، ول قازاقستاندىقتار ساۋساق ىزدەرىن تىركەۋ پروتسەدۋراسىنان تەك 16 جاسقا تولۋىنا بايلانىستى تولقۇجات نەمەسە جەكە كۋالىك العان كەزدە، سونداي-اق ولاردىڭ قولدانىلۋ مەرزىمىنىڭ اياقتالۋىنا نەمەسە جوعالۋىنا بايلانىستى قۇجاتتاردى اۋىستىرعان كەزدە عانا وتەتىنىن اتاپ ءوتتى.
داكتيلوسكوپيالىق اقپارات، ياعني ساۋساق ىزدەرى – بۇل ادام ساۋساقتارىنىڭ پاپيلليارلىق ورنەكتەرىنىڭ قۇرىلىمدىق ەرەكشەلىكتەرى تۋرالى بيومەتريالىق مالىمەتتەر، بۇل ونىڭ جەكە باسىن جانە جەكە دەرەكتەرىن انىقتاۋعا مۇمكىندىك بەرەدى.
پاپيلليارلىق ورنەكتەردىڭ ەلەكتروندىق كودى قازاقستان رەسپۋبليكاسى ازاماتتارىنىڭ بيومەتريالىق پاسپورتتارىندا جانە جەكە كۋالىكتەرىندە بولادى.
ىشكى ىستەر مينيسترلىگىنىڭ تۇسىندىرۋىنە سايكەس، قازاقستان ازاماتتارىنىڭ ساۋساق ىزدەرى تۋرالى اقپارات يەسىزدەندىرىلەتىن بولادى، ياعني مالىمەتتەر بازاسىندا ساۋساق ىزدەرىنىڭ ساندىق مودەلى جانە بىرەگەي يدەنتيفيكاتور عانا بولادى، وندا تولىق اتى-ءجونى مەن جسن-ءنىڭ جەكە دەرەكتەرى كورسەتىلمەيدى.
سونىمەن قاتار، زاڭعا سايكەس ساۋساق ىزدەرى تۋرالى اقپارات قول جەتىمدىلىگى شەكتەۋلى جەكە دەرەكتەرگە جاتادى.
ءسىز نە دەيسىز؟
الماس قايناربەكوۆ، جۇمىسسىز: «قازىر ونسىز دا جسن ءنومىرىمىز بار ەمەس پە؟ ساۋساق ىزدەرىن الۋ نە ءۇشىن كەرەك؟ مەنىڭشە، سول باياعى بيۋدجەت اقشاسىن بولاتىنعا دا، بولمايتىنعا دا قۇرتۋ سياقتى بۇل دا. باسقا شارۋانىڭ ءبارى ءبىتىپ، ەندى ساۋساق ءىزىن الۋ عانا قالىپ پا؟»
ءاليا راحىمبەردىقىزى، ساتۋشى: «حالىقتى باقىلاۋدا ۇستاۋ ءۇشىن كەرەك تە، باسقا نە ءۇشىن كەرەك؟ تەلەفونىمىز تىڭدالادى. ينتەرنەتتە باقىلاۋدامىز. جسن نومىرىمىزبەن جەردىڭ تۇبىنە تۇسسەك تە، تابادى قازىر. ەندى ساۋساق تاڭباسىن الىپ، شىرماپ بايلاپ ۇستاپ وتىرماق شىعار بيلىك».
ءماريام ورازالى، زەينەتكەر: «ساۋساق تاڭباسىن الۋ-الماۋدى بىزدەن سۇراي ما؟ ارينە، سۇرامايدى. شەنەۋنىكتەر ويىنا نە كەلسە، سونى ىستەيدى عوي قازىر. ءار ادامنىڭ جەكە مالىمەتى قولىندا تۇرسا دا، ناعىز قىلمىسكەردى «تاپپاي» قالادى. ال ءبىز سياقتى قاراپايىم ادام ءمۇل كەتسە، سول زاماتتا ۇستايدى. بۇل ناۋقان دا سول باياعى بيلىكتىڭ حالىقتى باقىلاۋدا ۇستاۋى ءۇشىن كەرەك دەپ ويلايمىن».
گۇلدانا اشىربەكوۆا، ماگيسترانت: «ساۋساق ءىزىن الۋدا تۇرعان ەشتەڭە جوق. ەۋروپا ەلدەرىنىڭ كوبىسى بۇل شارۋانى باياعىدا رەتتەپ قويعان. مىسالى، مەن شەتەلگە وقۋعا بارار الدىن سولاي ساۋساق تاڭباسىن تاپسىرعانمىن. مۇندايدان قورقۋدىڭ قاجەتى جوق».
P.S ساۋساق ءىزىن الۋعا قاتىستى بىزگە پىكىر بىلدىرگەن ازاماتتار وسىلاي دەيدى. راسىمەن بۇل ءىس-شارا حالىقتىڭ قاۋىپسىزدىگى ءۇشىن بە، الدە باسقاشا ما؟ ءسىز قالاي ويلايسىز، قۇرمەتتى وقىرمان؟
راۋانا ديماشقىزى،
«ادىرنا» ۇلتتىق پورتالى.
فوتو اشىق دەرەككوزدەن الىندى.
