شوشقا فەرماسى جابىلسىن – اۋىل تۇرعىندارى

3117
Adyrna.kz Telegram

اقتوبە وبلىسىنىڭ تۇرعىندارى شوشقا فەرماسىن جابۋدى تالاپ ەتۋدە، دەپ حابارلايدى «ادىرنا»ۇلتتىق پورتالى «Astana TV» ارناسىنا سىلتەمە جاساپ. ولاردىڭ ايتۋلارىنشا، اۋىل ماڭىنا قونىس تەپكەن دوڭىزدار حالىقتى ابدەن مەزى ەتكەن. اينالا تەزەككە تولعان. ال قولقانى قاباتىن جاعىمسىز ءيىس قار جاۋسا دا باسىلماي تۇر.

تالپاق تاناۋدىڭ ىشەك-قارىندارى كومىلگەن جەردەن اياق الىپ ءجۇرۋ مۇمكىن ەمەس. اۋىل تۇرعىنى وسىنى ايتىپ الەۋمەتتىك جەلىدە اراشا سۇرادى. اۆتور شوشقا قالدىقتارىنىڭ 900 شارشى مەتر اۋماقتى الىپ جاتقانىن ايتتى. تۇنشىقتىق دەگەن حالىق 12 جىلدان بەرى جانايقايعا قۇلاق اسار جان تاپپاعاندارىنا اشۋلى. ولار ءاۋ-باستا كاسىپكەردىڭ بۇل جەرگە تۇيەقۇس وسىرەمىن دەپ رۇقسات العانىن ايتادى.

«تۇيەقۇس ۇستايمىز دەدى. ونىڭ اياعى نە بولىپ كەتتى. ءبىر ەمەس، ەكى ەمەس 26 باز بار. ءبىر بازدا مىڭداعان شوشقا بار. سونىڭ ءناجىسىن اكەپ، توككەندە مىنا بەستاماق قانا ەمەس بەسقوپا، قاراعاشقا دەيىن، ءتىپتى العاعا دا ءيىسى جەتەدى. تىنىس الۋ مۇمكىن ەمەس»،-دەدى اۋىل تۇرعىنى ەربولات كەنەتاەۆ.

اۋىلداسىنىڭ ءسوزىن گۇلنار ايتجانوۆا دا قوستادى.

« سۋىمىز لاس، اۋامىز لاس. ءتىپتى تەرەزە اشا المايمىز»،-دەدى ول.

بۇقارانىڭ ايتۋىنشا، 40 مىڭ شوشقا وسىرەتىن ۇلكەن فەرما كۇن سايىن 280 جانۋاردى ەتكە وتكىزۋ ءۇشىن باۋىزدايدى. ال ونىڭ زاردابى ۇشان-تەڭىز.

باسى داۋعا قالعان كاسىپكەر سوڭعى كەزدە قالدىقتاردى جەرگە كومىپ جۇرگەندەرىن مويىندادى. سوڭعى 20 كۇندە التى مىڭ تونناداي وندىرىستىك قالدىقتى كومىپتى.

«بىزدە ەكسترۋدەرلەر سىنىپ قالىپ، سودان وتكىر سودامەن ارالاستىرىپ، كومىپ تاستادىق. جيىرما كۇن بولدى»،– دەدى شارۋاشىلىقتىڭ اتقارۋشى ديرەكتورى نۇرىم قۇماروۆ.

اۋدان اكىمى جاعدايدان حاباردار. ول ارنايى كوميسسيا قۇرىپ، تەكسەرىس جۇرگىزەمىز دەپ ۋادە بەردى.

«ءبىراز كەمشىلىكتەر انىقتالدى. ارنايى كەلگەن كوميسسيا تەكسەرەدى. سونىڭ قورىتىندىسى بويىنشا ءىس سوتقا بەرىلەدى. سوتتىڭ شەشىمىمەن عانا مەكەمەنى توقتاتۋعا بولادى»،– دەيدى العا اۋدانىنىڭ اكىمى مامىرعالى اققاعازوۆ.

شوشقا فەرماسى جابىلى ما، جابىلماي ما ول جاعى ءازىر بەلگىسىز. ال تۇرعىندار فەرمانىڭ كوزىن جويۋ ءۇشىن ايانىپ قالمايمىز دەپ وتىر.

«ادىرنا» ۇلتتىق پورتالى

پىكىرلەر