بىلتىر جول-كولىك وقيعالارى سالدارىنان ەلىمىزدە 285 بالا قازا تاپتى. بۇل تۋرالى ءىىم اكىمشىلىك پوليتسيا كوميتەتى توراعاسىنىڭ ورىنباسارى عالىم سارعۇلوۆ مالىمدەدى، دەپ حابارلايدى «ادىرنا» ءتىلشىسى.
ول زارداپ شەككەن كامەلەتكە تولماعانداردىڭ جارتىسىنان كوبى كولىك جولاۋشىلارى بولعانىن اتاپ ءوتتى.
سپيكەردىڭ ايتۋىنشا، كوپ جاعدايدا زارداپ شەككەن بالالاردى ەرەسەكتەر تاسىمالداۋ ەرەجەلەرىن بۇزعان: بالالاردى ارنايى ۇستاپ تۇرۋ قۇرىلعىلارىنسىز جانە قاۋىپسىزدىك بەلدىگىن تاقپاي الىپ جۇرگەن.
«جول قوزعالىسى قاۋىپسىزدىگى جۇرگىزۋشىلەرگە دە، جاياۋ جۇرگىنشىلەرگە دە بايلانىستى. قاۋىپ ەكى تاراپ ءۇشىن دە بار. جول-كولىك وقيعالارى سەبەپتەرىنىڭ ءبىرى – جولدى بەلگىلەنبەگەن جەردەن نەمەسە باعدارشامنىڭ تىيىم سالىنعان بەلگىسىنە ءوتۋ. بالالار كەيدە جول جاعدايىن ءتيىستى دەڭگەيدە باعالامايدى، جولدان وتەر الدىندا قاۋىپسىزدىككە كوز جەتكىزۋ قاجەتتىگىن ۇمىتىپ كەتەدى. سەبەبى بۇرىلىستان نەمەسە جول جيەگىندە تۇرعان كولىكتىڭ اراسىنان كەنەتتەن اۆتوكولىك شىعىپ قالۋى مۇمكىن. قاراڭعى ۋاقىتتا جۇرگىزۋشىلەرگە جاياۋ جۇرگىنشىلەردى كورۋ قيىنداي تۇسەدى، اسىرەسە ولاردىڭ كيىمىندە جارىق قايتاراتىن ەلەمەنتتەر بولماسا. وسىعان بايلانىستى بالالارعا جولدان وتپەس بۇرىن جۇرگىزۋشىمەن كوزبەن بايلانىس ورناتۋدىڭ ماڭىزىن ءتۇسىندىرۋ قاجەت»، – دەدى ول.
سونداي-اق عالىم سارعۇلوۆ جاس جول قوزعالىسى ينسپەكتورلارىنىڭ ءرولىن اتاپ ءوتتى. ولار ەلىمىزدىڭ بارلىق وڭىرىندە جۇمىس ىستەيدى. بۇگىندە رەسپۋبليكا بويىنشا 60 مىڭنان استام وقۋشى مەكتەپتەردە جول قاۋىپسىزدىگىن قامتاماسىز ەتۋ باعىتىندا اۋقىمدى جۇمىس جۇرگىزۋدە. سونىمەن قاتار مەكتەپتەردە جاسوسپىرىمدەر اراسىنداعى قۇقىق بۇزۋشىلىقتىڭ الدىن الۋعا باعىتتالعان «ساقشى» جاساقتارى قۇرىلعان.
«وكىنىشكە قاراي، كەيدە ەرەسەكتەردىڭ نەمقۇرايلىعى بالالاردىڭ تەك جولدا عانا ەمەس، قۇقىق بۇزۋشىلاردىڭ ارەكەتىنەن دە زارداپ شەگۋىنە سەبەپ بولىپ جاتادى. سوندىقتان قاۋىپسىز مىنەز-قۇلىق داعدىلارىن قالىپتاستىرۋ جانە پروفيلاكتيكا ماسەلەسىنە اتا-انالاردى، بالاباقشا تاربيەشىلەرىن جانە مەكتەپ مۇعالىمدەرىن كەڭىنەن تارتۋ ماڭىزدى. بالالار قاۋىپسىزدىك تۋرالى نەعۇرلىم كوپ اقپارات السا، ءبىز ولاردى سوعۇرلىم سەنىمدى قورعاي الامىز. قالاي دۇرىس ارەكەت ەتۋ كەرەكتىگى، كىمگە سەنۋگە بولاتىنى، قايدا جۇگىنۋ قاجەتتىگى تۋرالى ءاربىر ءسوز بالا ءۇشىن پايدالى. تەك بىرلەسكەن كۇش-جىگەردىڭ ارقاسىندا عانا بالالار ءۇشىن قاۋىپسىز ورتا قالىپتاستىرا الامىز»، – دەپ تۇيىندەدى سپيكەر.
